ಕಳೆದ ಡಿಸೆಂಬರ್‌ನಲ್ಲಿ 146 ವಿರೋಧ ಪಕ್ಷದ ಸದಸ್ಯರನ್ನು ಅಮಾನತುಗೊಳಿಸಲಾಯಿತು ಅಥವಾ ಅವರ ಧ್ವನಿಯನ್ನು ಹತ್ತಿಕ್ಕಲು ಎರಡೂ ಸದನಗಳಿಂದ ಸಾಮೂಹಿಕವಾಗಿ ಹೊರಹಾಕಲಾಯಿತು. ಆಗ ಬಿಜಪಿ ಆಡಿದ್ದೇ ಆಟವಾಗಿತ್ತು. ದೊಡ್ಡ ಮಟ್ಟದ ಬಹುಮತದೊಂದಿಗೆ ಆಯ್ಕೆಯಾಗಿದ್ದ ಬಿಜೆಪಿ ವಿಪಕ್ಷಗಳನ್ನು ತನಗೆ ಬೇಕಾದಂತೆ ಕುಣಿಸುತ್ತಿತ್ತು. ಸದನದಲ್ಲಿ ಸರಿಯಾದ ವಿರೋಧ ಪಕ್ಷವೂ ಇದ್ದಿರಲಿಲ್ಲ.
ಆದರೆ ಈ ಬಾರಿ ಆಟ ಅಷ್ಟು ಸುಲಭವಿಲ್ಲ. ಸರಕಾರದ ಇಂಜಿನ್ ಹಳಿ ಹತ್ತುವ ಮೊದಲೇ ಹಲವು ಬೋಗಿಗಳು ಹಳಿತಪ್ಪಿವೆ. ರೈಲು ಅಪಘಾತ, ಜಮ್ಮು ಕಾಶ್ಮೀರದ ಭಯೋತ್ಪಾದಕರ ಕಾಟ, ನೀಟ್‌ ಪರೀಕ್ಷೆ, ಮಣಿಪುರ ಹಿಂಸಾಚಾರ ಮತ್ತು ಅಗ್ನಿವೀರ್‌ ಯೋಜನೆ ಇವೆಲ್ಲದರ ಕುರಿತೂ ಈ ಬಾರಿ ಮೋದಿ ಸರ್ಕಾರ ವಿಪಕ್ಷಗಳಿಗೆ ಉತ್ತರ ಕೊಡಲೇಬೇಕಾಗುತ್ತದೆ.
ಕಳೆದ ಹತ್ತು ವರ್ಷಗಳ ಮೋದಿಯವರ ಆಡಳಿತದಲ್ಲಿ ರೈತರ ಚಳವಳಿಯನ್ನು ಹೊರತುಪಡಿಸಿದರೆ ಅನೇಕ ಆಂದೋಲನಗಳು ಮತ್ತು ಪ್ರತಿಭಟನೆಗಳು ಯಶಸ್ವಿಯಾಗಲಿಲ್ಲ. ಎಲ್ಲಾ ಪ್ರತಿಭಟನೆಗಳನ್ನು ಸಹ ಸರ್ಕಾರ ಹತ್ತಿಕ್ಕಿತ್ತು. ಆದರೆ ಈ ಬಾರಿ ಈಗ ಪ್ರತಿಪಕ್ಷಗಳು ಬಲಗೊಳ್ಳುತ್ತಿರುವುದರಿಂದ ಇಂತಹ ಏಕಪಕ್ಷೀಯ ಕ್ರಮಗಳು ಸಾಧ್ಯವಾಗುವುದಿಲ್ಲ.
ಈ ವರ್ಷಾಂತ್ಯದಲ್ಲಿ ಮಹಾರಾಷ್ಟ್ರ, ಹರಿಯಾಣ ಮತ್ತು ಜಾರ್ಖಂಡ್, ಮುಂದಿನ ವರ್ಷ ಜನವರಿಯಲ್ಲಿ ದೆಹಲಿ ಮತ್ತು ಸೆಪ್ಟೆಂಬರ್‌ನಲ್ಲಿ ಬಿಹಾರದಲ್ಲಿ ನಡೆಯಲಿರುವ ವಿಧಾನಸಭಾ ಚುನಾವಣೆಗಳು ಮೋದಿಯವರಿಗೆ ಅಗ್ನಿಪರೀಕ್ಷೆಯಾಗಲಿವೆ. ಮೋದಿ ಪ್ರತಿಷ್ಠೆ ಮಂಕಾಗುತ್ತಿರುವ ಹೊತ್ತಿನಲ್ಲಿ ಬಿಜೆಪಿಗೆ ಈ ಚುನಾವಣೆ ನಿರ್ಣಾಯಕವಾಗಲಿದೆ.
ಇನ್ನು ಮುಂದೆ ಎಲ್ಲಾ ವಿಧೇಯಕಗಳನ್ನು ಕೂಲಂಕುಷವಾಗಿ ಚರ್ಚಿಸಿದ ನಂತರವೇ ಮತಕ್ಕೆ ಹಾಕಬೇಕು ಎಂದು ವಿರೋಧ ಪಕ್ಷಗಳು ಹೇಳಿವೆ. ಸಂಸದೀಯ ಸಮಿತಿಗಳೂ ಹೊಸ ಅಧಿಕಾರ ಪಡೆಯಲಿವೆ. ಅಂತಹ ಸಂದರ್ಭಗಳಲ್ಲಿ ಹೊಸ ಸ್ಪೀಕರ್ ನಿರ್ವಹಿಸುವ ಪಾತ್ರವು ಬಹಳ ಮುಖ್ಯವಾಗಿರುತ್ತದೆ. ಬಿಜೆಪಿ ಭಾರಿ ಬಹುಮತ ಪಡೆಯಲಿದೆ ಎಂಬ ಖ್ಯಾತ ರಾಜಕೀಯ ತಂತ್ರಜ್ಞ ಪ್ರಶಾಂತ್ ಕಿಶೋರ್ ಅವರ ಭವಿಷ್ಯ ಸುಳ್ಳಾಗಿದೆ. ಆದರೆ ಅವರು ಹೇಳಿದ ಮತ್ತೊಂದು ಭವಿಷ್ಯ ನಿಜವಾಗಲಿದೆ. ಬಿಜೆಪಿ ಭಾರಿ ಮುನ್ನಡೆ ಸಾಧಿಸಿದರೂ ಪ್ರತಿಪಕ್ಷಗಳಿಂದ ತೀವ್ರ ವಿರೋಧ ಎದುರಿಸಬೇಕಾಗುತ್ತದೆ ಎಂದು ಅವರು ಹೇಳಿದ್ದರು. ಅದು ಈ ಬಾರಿ ನಿಜವಾಗುವ ಎಲ್ಲ ಲಕ್ಷಣಗಳೂ ಕಾಣುತ್ತಿವೆ.
ಪ್ರತಿಪಕ್ಷಗಳು ಈಗಾಗಲೇ ತಮ್ಮ ಕತ್ತಿಗಳನ್ನು ಹರಿತಗೊಳಿಸುತ್ತಿವೆ. ಪ್ರಶ್ನೆ ಪತ್ರಿಕೆಗಳ ಸೋರಿಕೆ, ಅಗ್ನಿಪಥ ಯೋಜನೆ, ಮಣಿಪುರ ಹಿಂಸಾಚಾರ… ಈ ಮೂರೂ ವಿಚಾರಗಳಲ್ಲಿ ಸರ್ಕಾರವನ್ನು ಇಕ್ಕಟ್ಟಿಗೆ ಸಿಲುಕಿಸಲು ತಂತ್ರ ಹೆಣೆಯಲಾಗುತ್ತಿದೆ. ಈ ಬಗ್ಗೆ ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಈಗಾಗಲೇ ಸುಳಿವು ನೀಡಿದ್ದಾರೆ.
ಚುನಾವಣೆಗೂ ಮುನ್ನ ಅಗ್ನಿಪಥ್ ಕಾರ್ಯಕ್ರಮವನ್ನು ಸರ್ಕಾರ ಪರಿಶೀಲಿಸಿದೆ ಎಂಬ ವರದಿಗಳು ಬಂದಿದ್ದವು. ಆದರೆ ಈ ಯೋಜನೆಯನ್ನು ಸಂಪೂರ್ಣವಾಗಿ ಹಿಂಪಡೆಯುವುದನ್ನು ಹೊರತುಪಡಿಸಿ ಯಾವುದಕ್ಕೂ ಒಪ್ಪುವುದಿಲ್ಲ ಎಂದು ಪ್ರತಿಪಕ್ಷಗಳು ಸ್ಪಷ್ಟಪಡಿಸುತ್ತಿವೆ. ಪ್ರಶ್ನೆ ಪತ್ರಿಕೆ ಸೋರಿಕೆ ವಿಚಾರದಲ್ಲಿ ಶಿಕ್ಷಣ ಇಲಾಖೆ ಈಗಾಗಲೇ ಹಿಂದೆ ಸರಿದಿದೆ. ಅಕ್ರಮದ ಜವಾಬ್ದಾರಿಯನ್ನು ಒಪ್ಪಿಕೊಳ್ಳುವುದರ ಜೊತಗೆ ವಿಮರ್ಶೆಗಳು ಮತ್ತು ವಿಚಾರಣೆಗಳಿಗೆ ಆದೇಶಿಸಲಾಗಿದೆ.
ಮಣಿಪುರದಲ್ಲಿ ಸಹಜ ಸ್ಥಿತಿ ಸ್ಥಾಪಿಸಲು ಅಲ್ಲಿನ ಮತ್ತು ಕೇಂದ್ರದ ಬಿಜೆಪಿ ಸರ್ಕಾರ ವಿಫಲವಾಗಿದೆ. ಅದರ ಪರಿಣಾಮ ಲೋಕಸಭೆ ಚುನಾವಣೆಯಲ್ಲಿ ಕಂಡುಬಂದಿದೆ. ರಾಜ್ಯದ ಎರಡೂ ಲೋಕಸಭಾ ಕ್ಷೇತ್ರಗಳಲ್ಲಿ ಕಾಂಗ್ರೆಸ್ ಗೆಲುವು ಸಾಧಿಸಿದೆ. ಮುಖ್ಯಮಂತ್ರಿ ಬಿರೇನ್ ಸಿಂಗ್ ತನ್ನ ವೈಫಲ್ಯವನ್ನು ಒಪ್ಪಿಕೊಳ್ಳುತ್ತಿಲ್ಲ. ಆದರೆ ಇನ್ನು ಮುಂದೆ ಮೋದಿ ಸರ್ಕಾರ ಆ ರಾಜ್ಯದ ವ್ಯವಹಾರಗಳತ್ತ ಗಮನ ಹರಿಸುವ ಸಾಧ್ಯತೆಗಳಿವೆ.
ರಾಜ್ಯಸಭೆಯಲ್ಲೂ ಬಿಜೆಪಿಗೆ ಸವಾಲುಗಳ ಕೊರತೆಯಿಲ್ಲ. ಆದರೆ ಅದು ಲೋಕಸಭೆಯಲ್ಲಿರುವಷ್ಟು ಗಂಭೀರವಾಗಿಲ್ಲದಿರಬಹುದು. ಇದುವರೆಗೆ ಆಂಧ್ರಪ್ರದೇಶದ ವೈಎಸ್‌ಆರ್‌ಸಿಪಿ ಮತ್ತು ಒಡಿಶಾದ ಬಿಜೆಡಿ ಮೇಲ್ಮನೆಯಲ್ಲಿ ಅಗತ್ಯವಿದ್ದಾಗ ಬಿಜೆಪಿಗೆ ಬೆಂಬಲ ನೀಡಿವೆ. ವಿವಾದಾತ್ಮಕ ಮಸೂದೆಗಳ ಅಂಗೀಕಾರಕ್ಕೆ ಕೊಡುಗೆ ನೀಡಿವೆ.
ಆದರೆ ಇನ್ನು ಮುಂದೆ ಹಾಗಾಗುವುದು ಕಷ್ಟವಿದೆ. ಏಕೆಂದರೆ ತೆಲುಗು ದೇಶಂ ಮತ್ತು ಜನಸೇನಾ ಪಕ್ಷಗಳು ಈಗ ಆಂಧ್ರಪ್ರದೇಶದಲ್ಲಿ ಎನ್‌ಡಿಎ ಪಾಲುದಾರರಾಗಿದ್ದಾರೆ. ಒಡಿಶಾದಲ್ಲಿ ಬಿಜೆಪಿ ಸ್ವತಂತ್ರವಾಗಿ ಸ್ಪರ್ಧಿಸಿದೆ. ಆಯಾ ರಾಜ್ಯಗಳಲ್ಲಿ ನಿನ್ನೆ ಮೊನ್ನೆಯವರೆಗೆ ಅಧಿಕಾರದಲ್ಲಿದ್ದ ಪಕ್ಷಗಳು ಈಗ ವಿರೋಧ ಪಕ್ಷದ ಸ್ಥಾನದಲ್ಲಿವೆ. ಈಗ ಬಿಜೆಪಿ ಅವರ ಬೆಂಬಲ ಪಡೆಯುತ್ತದೆಯೋ ಇಲ್ಲವೋ ಎಂಬುದನ್ನು ಕಾದು ನೋಡಬೇಕಿದೆ. ಬಿಜೆಪಿ ಅಥವಾ ಅದರ ಮಿತ್ರಪಕ್ಷಗಳ ಕೈಯಲ್ಲಿ ಆ ಪಕ್ಷಗಳ ಸೋಲಿನ ನಂತರ ಎರಡೂ ರಾಜ್ಯಗಳಲ್ಲಿ ರಾಜಕೀಯ ಹೊಂದಾಣಿಕೆಗಳು ಬದಲಾಗಿವೆ.
ಈಗ ಸಂಸತ್ತಿನ ವಿಷಯಕ್ಕೆ ಬರೋಣ. ರಾಹುಲ್ ಗಾಂಧಿ ವಿರೋಧ ಪಕ್ಷದ ನಾಯಕನ ಸ್ಥಾನವನ್ನು ವಹಿಸಿಕೊಳ್ಳಲು ಒಪ್ಪಿಕೊಂಡರೆ, ಪ್ರಮುಖ ಹುದ್ದೆಗಳ ನೇಮಕಾತಿಗೆ ಸಂಬಂಧಿಸಿದಂತೆ ಅವರು ಸಾಂವಿಧಾನಿಕ ಹಕ್ಕುಗಳನ್ನು ಹೊಂದಿರುತ್ತಾರೆ. ಪ್ರಧಾನಿ ಎದುರು ಕುಳಿತು ಆಯಾ ಅಧಿಕಾರಿಗಳ ಆಯ್ಕೆಯಲ್ಲಿ ಭಾಗವಹಿಸಬಹುದು. ಸಿಬಿಐ, ಕೇಂದ್ರ ಜಾಗೃತ ಆಯೋಗ, ಚುನಾವಣಾ ಆಯೋಗ ಸೇರಿದಂತೆ ವಿವಿಧ ಹುದ್ದೆಗಳಿಗೆ ಸಂಬಂಧಿಸಿದ ನೇಮಕಾತಿಗಳಲ್ಲಿ ಅವರ ಮಾತಿಗೆ ಬೆಲೆ ಇರುತ್ತದೆ. ಇನ್ನು ಅವರು ಮೋದಿಗೆ ಸರಿಸಮಾನಾಗಿ ಕುಳಿತು ಅವರನ್ನು ಪ್ರಶ್ನಿಸಲಿದ್ದಾರೆ.
