ಕೋಲ್ಕತ್ತಾ: ನವ ಉದಾರವಾದಿ ನೀತಿಗಳ ತಂತ್ರ ಮುಂದುವರಿದರೆ ದೇಶಕ್ಕೆ ಅಪಾಯ ಎದುರಾಗಲಿದ್ದು, ಆಹಾರ ಉತ್ಪಾದನೆ, ಶಿಕ್ಷಣ, ಆರೋಗ್ಯ ಕ್ಷೇತ್ರಗಳಿಗೆ ಧಕ್ಕೆಯಾಗಲಿದೆ ಎಂದು ಖ್ಯಾತ ಅರ್ಥಶಾಸ್ತ್ರಜ್ಞ ಪ್ರೊ.ಪ್ರಭಾತ್ ಪಟ್ನಾಯಕ್ ಎಚ್ಚರಿಸಿದ್ದಾರೆ.
ಕಲ್ಕತ್ತಾ ವಿಶ್ವವಿದ್ಯಾನಿಲಯ ಸಂಸ್ಥೆ ಸಭಾಂಗಣದಲ್ಲಿ ‘ಪ್ರಸ್ತುತ ಪರಿಸ್ಥಿತಿಯಲ್ಲಿ ದೇಶದ ಸ್ವಾವಲಂಬನೆ’ ಕುರಿತ ಚರ್ಚಾ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ವಿದೇಶಿ ಹೂಡಿಕೆದಾರರ ಹಿತಾಸಕ್ತಿಗಿಂತ ದೇಶದ ನಾಗರಿಕರ ಅಗತ್ಯಗಳನ್ನು ಸರ್ಕಾರ ಪರಿಗಣಿಸಬೇಕು ಎಂದು ಸಲಹೆ ನೀಡಿದರು. ಶ್ರೀಮಂತರಿಗೆ ಹೆಚ್ಚಿನ ತೆರಿಗೆ ವಿಧಿಸದಿದ್ದರೆ ದೇಶದ ಬಡ ಜನರ ಸ್ಥಿತಿ ಬದಲಾಗುವುದಿಲ್ಲ ಎಂದು ಹೇಳಿದರು. ಇದೇ ಸಂದೇಶವನ್ನು ದೇಶದ ಎಡಪಂಥೀಯರು ಪದೇ ಪದೇ ನೀಡುತ್ತಿದ್ದಾರೆ ಎಂದು ನೆನಪಿಸಿದರು. ಕಾರ್ಯಕ್ರಮವನ್ನು ಪಶ್ಚಿಮ ಬಂಗಾಳದ ವಿಜ್ಞಾನ ವೇದಿಕೆ ಮತ್ತು ವಿಜ್ಞಾನಿಗಳು, ಎಂಜಿನಿಯರ್‌ಗಳು ಮತ್ತು ತಂತ್ರಜ್ಞರ ವೇದಿಕೆ (FOSET) ಜಂಟಿಯಾಗಿ ಆಯೋಜಿಸಿತ್ತು.
ಉತ್ಪಾದನೆ ಮತ್ತು ದೇಶೀಯ ಸಂಪನ್ಮೂಲಗಳನ್ನು ದೇಶದ ಜನತೆಯ ಒಳಿತಿಗೆ ಸಂಪೂರ್ಣವಾಗಿ ಬಳಸಿಕೊಳ್ಳಬೇಕು. ವಿದೇಶದಿಂದ ಹಣ ಬಂದರೆ ದೇಶದಲ್ಲಿ ಆದಾಯವಿರುವುದಿಲ್ಲ. ತಂತ್ರಜ್ಞಾನವನ್ನು ಬಳಸಿಕೊಂಡು ದೇಶವು ಹೆಚ್ಚಿನ ಕೃಷಿ ಮತ್ತು ಕೈಗಾರಿಕಾ ಉತ್ಪಾದನೆಯನ್ನು ಸಾಧಿಸಬೇಕಾಗಿದೆ. ನಾವು ದೇಶವನ್ನು ನಡೆಸಲು ವಿದೇಶಿ ಬಂಡವಾಳವನ್ನು ಅವಲಂಬಿಸಿದ್ದರೆ, ಆ ಹಣವು ದೇಶವನ್ನು ತೊರೆದಾಗ ಜನರು ರಸ್ತೆಗಳಲ್ಲಿ ಕುಳಿತುಕೊಳ್ಳಬೇಕಾಗುತ್ತದೆ. ಪ್ರಸ್ತುತ ಪರಿಸ್ಥಿತಿ ಇದನ್ನು ಸೂಚಿಸುತ್ತಿದೆ ಎಂದು ಪ್ರಭಾತ್ ಪಟ್ನಾಯಕ್ ಹೇಳಿದ್ದಾರೆ.
ದೇಶದ ಆರ್ಥಿಕತೆಯ ಬಗ್ಗೆ ಮಾತನಾಡಿದ ಅವರು, ʼರಫ್ತು ಕಡಿಮೆಯಾಗಿದೆ ಮತ್ತು ರೂಪಾಯಿ ಮೌಲ್ಯ ಕುಸಿಯುತ್ತಿದೆ. ಜಗತ್ತಿನಲ್ಲಿ ಆರ್ಥಿಕ ಪ್ರಗತಿಗೆ ಅಡೆತಡೆಗಳಿವೆ. ದೇಶಕ್ಕೆ ಆಹಾರ ಸ್ವಾವಲಂಬನೆಯ ಅಗತ್ಯವಿದೆ. ಆದರೆ ಆಹಾರ ಉತ್ಪಾದನೆಯಲ್ಲಿ ದೇಶ ಹಿಂದುಳಿದಿದೆ. ದೇಶದ ಬಹುತೇಕ ಭೂಮಿ ಮತ್ತು ಸಂಪನ್ಮೂಲಗಳು ವ್ಯರ್ಥವಾಗಿ ಬಿದ್ದಿವೆ. ಅವು ಬಳಕೆಯಲ್ಲಿಲ್ಲ. ಮತ್ತೊಂದೆಡೆ ಸರಕಾರವೇ ಸಬ್ಸಿಡಿ ಹಿಂಪಡೆಯುತ್ತಿದೆ. ಇದರಿಂದ ರೈತರ ಆತ್ಮಹತ್ಯೆ ಹೆಚ್ಚುತ್ತಿದೆ’ ಎಂದು ವಿವರಿಸಿದರು.
ʼಸರ್ಕಾರ ವಿದೇಶಿ ವಿನಿಮಯ ವಹಿವಾಟಿನ ಮೂಲಕ ದುಬಾರಿ ಉತ್ಪನ್ನಗಳತ್ತ ಗಮನ ಹರಿಸಿದರೆ ಜನತೆ ದೊಡ್ಡ ಅಪಾಯ ಎದುರಿಸಬೇಕಾಗುತ್ತದೆ ಎಂದು ಪ್ರಭಾತ್ ಹೇಳಿದರು. ಏಕೆಂದರೆ ಇದರಿಂದ ಜನರ ಕೊಳ್ಳುವ ಶಕ್ತಿ ಕಡಿಮೆಯಾಗುತ್ತದೆ. ಇಂದು ರೈತರಿಗೆ ಕೊಳ್ಳುವ ಶಕ್ತಿ ಇಲ್ಲ. ಹೀಗಾಗಿ ದೇಶ ಸ್ವಾವಲಂಬನೆ ಸಾಧಿಸಲು ಸಾಧ್ಯವಾಗುತ್ತಿಲ್ಲ. ಕೈಗಾರಿಕೆ ಮತ್ತು ಕೃಷಿಯಂತಹ ಪ್ರಮುಖ ಕ್ಷೇತ್ರಗಳಿಗೆ ಸರ್ಕಾರದ ಬೆಂಬಲದ ಅಗತ್ಯವಿದೆ’ ಎಂದು ಅವರು ಹೇಳಿದರು.
ಶಿಕ್ಷಣದ ಖಾಸಗೀಕರಣ ಅಪಾಯಕಾರಿ ಎಂದು ಪ್ರಭಾತ್ ಎಚ್ಚರಿಸಿದರು. ಶಿಕ್ಷಣ ಸಂಸ್ಥೆಗಳು, ವಿಶ್ವವಿದ್ಯಾನಿಲಯಗಳಲ್ಲಿ ನಾಡಿನ ಇತಿಹಾಸ, ಸಂಸ್ಕೃತಿಗೆ ಆದ್ಯತೆ ನೀಡುವ ಅಗತ್ಯವಿದ್ದು, ಇದಕ್ಕೆ ಸರಕಾರ ಬೆಂಬಲ ನೀಡಬೇಕು ಎಂದು ಮನವಿ ಮಾಡಿದರು. ‘ವಿದೇಶಗಳನ್ನು ಅನುಸರಿಸಬೇಡಿ. ಹಾಗೆ ಮಾಡಿದರೆ ಉನ್ನತ ಶಿಕ್ಷಣದಲ್ಲಿ ಹಿಂದುಳಿಯುತ್ತೇವೆ. ಹೊಸ ಉದಾರೀಕರಣ ನೀತಿಗಳಿಂದ ಸಮಸ್ಯೆಯಾದರೆ ಅದು ದೇಶದ ಜನರ ಮೇಲೆ ಗಂಭೀರ ಪರಿಣಾಮ ಬೀರುತ್ತದೆ. ಆಹಾರ ಸ್ವಾವಲಂಬನೆ, ಉದ್ಯೋಗ, ಸರಕಾರಿ ಅನುದಾನಿತ ಶಿಕ್ಷಣ, ಆರೋಗ್ಯ ಕ್ಷೇತ್ರದ ಸುಧಾರಣೆ ಹಾಗೂ ವೃದ್ಧಾಪ್ಯ ವೇತನಕ್ಕೆ ಸರಕಾರ ಒತ್ತು ನೀಡಬೇಕು ಎಂದು ಪ್ರಭಾತ್ ಸಲಹೆ ನೀಡಿದರು.
ವಿಲೀನ ಅಥವಾ ಖಾಸಗೀಕರಣದ ಮೂಲಕ ಸಾರ್ವಜನಿಕ ವಲಯದ ಬ್ಯಾಂಕಿಂಗ್ ವ್ಯವಸ್ಥೆಯನ್ನು ದುರ್ಬಲಗೊಳಿಸುವ ಪ್ರಯತ್ನಗಳು ನಡೆಯುತ್ತಿವೆ ಎಂದು ‘ಬ್ಯಾಂಕ್ ಬಚಾವೋ – ದೇಶ್ ಬಚಾವೋ’ ಸಂಚಾಲಕಿ ಸೌಮ್ಯಾ ದತ್ತಾ ಕಳವಳ ವ್ಯಕ್ತಪಡಿಸಿದರು. ಇದರಿಂದ ಜನಸಾಮಾನ್ಯರು ಶೋಷಣೆಗೆ ಒಳಗಾಗುತ್ತಾರೆ ಎಂದರು. ದೇಶದಲ್ಲಿ ವಿಜ್ಞಾನ ಮತ್ತು ತಂತ್ರಜ್ಞಾನ ಸಂಶೋಧನೆಗಳು ಸರಿಯಾಗಿ ಬಳಕೆಯಾಗುತ್ತಿಲ್ಲ ಎಂದು ಜಾದವಪುರ ವಿಶ್ವವಿದ್ಯಾಲಯದ ಮಾಜಿ ಉಪಕುಲಪತಿ ಸಿದ್ಧಾರ್ಥ್ ದತ್ತಾ ಅಭಿಪ್ರಾಯಪಟ್ಟರು. BEFI, BSNLU, WBMSRU ಮತ್ತು ಇತರ ಸಂಸ್ಥೆಗಳ ವಿಶ್ವವಿದ್ಯಾಲಯದ ಪ್ರಾಧ್ಯಾಪಕರು ಚರ್ಚಾ ವೇದಿಕೆಯಲ್ಲಿ ಭಾಗವಹಿಸಿದ್ದರು.
