ಹೊಸದೆಹಲಿ: ದೇಶದಲ್ಲಿ ಪ್ರಸ್ತುತ ಎರಡು ಸಿದ್ಧಾಂತಗಳ ನಡುವೆ ಸಂಘರ್ಷ ನಡೆಯುತ್ತಿದೆ ಎಂದು ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಹೇಳಿದ್ದಾರೆ. ಒಂದೆಡೆ ಡಾ. ಬಿ.ಆರ್. ಅಂಬೇಡ್ಕರ್, ಮಹಾತ್ಮ ಗಾಂಧಿ, ಜವಾಹರಲಾಲ್ ನೆಹರೂ ಮತ್ತು ಸರ್ದಾರ್ ಪಟೇಲ್ ಅವರ ಆಶಯದ ಭಾರತದ ಸಂವಿಧಾನವಿದ್ದರೆ, ಇನ್ನೊಂದೆಡೆ ಬಿಜೆಪಿ ಮತ್ತು ಆರ್ಎಸ್ಎಸ್ನ ಸಿದ್ಧಾಂತವಿದೆ; ಇವೆರಡರ ನಡುವಿನ ಕದನವೇ ದೇಶದ ಇಂದಿನ ರಾಜಕೀಯ ವಾಸ್ತವವಾಗಿದೆ ಎಂದು ಅವರು ಪ್ರತಿಪಾದಿಸಿದ್ದಾರೆ.
ದೇಶದಲ್ಲಿ ಸಾವಿರಾರು ವರ್ಷಗಳಿಂದ ದಲಿತರ ಮೇಲೆ ದೌರ್ಜನ್ಯ ಮತ್ತು ಹಿಂಸಾಚಾರಗಳು ನಡೆಯುತ್ತಲೇ ಬಂದಿವೆ ಎಂದು ರಾಹುಲ್ ಗಾಂಧಿ ಆತಂಕ ವ್ಯಕ್ತಪಡಿಸಿದ್ದಾರೆ. ಸಂವಿಧಾನವು ಇಂತಹ ತಾರತಮ್ಯಗಳನ್ನು ಕಾನೂನುಬಾಹಿರಗೊಳಿಸಿದ್ದರೂ, ಇಂದಿಗೂ ಶಾಲೆಗಳಲ್ಲಿ ದಲಿತ ಮಕ್ಕಳ ಕೈಯಲ್ಲಿ ಶೌಚಾಲಯ ಸ್ವಚ್ಛಗೊಳಿಸುವುದು, ನೆಲ ಒರೆಸುವ ಕೆಲಸಗಳನ್ನು ಮಾಡಿಸಲಾಗುತ್ತಿದೆ. ತಮ್ಮ ಸಹಪಾಠಿಗಳು ಕಸ ಗುಡಿಸುವುದನ್ನು ಇತರ ಮಕ್ಕಳು ನೋಡುವುದು ಮತ್ತು ಕಸ ಗುಡಿಸುವ ಮಕ್ಕಳು ಇತರರನ್ನು ನೋಡುವುದು ಮುಂದಿನ ಪೀಳಿಗೆಯ ಮನಸ್ಸಿನ ಮೇಲೆ ಎಂತಹ ಪರಿಣಾಮ ಬೀರುತ್ತದೆ ಎಂಬುದನ್ನು ಯೋಚಿಸಬೇಕಿದೆ ಎಂದು ಅವರು ಹೇಳಿದ್ದಾರೆ.
ಇದು ಇಂದಿನ ಭಾರತದ, ಮುಖ್ಯವಾಗಿ ಉತ್ತರ ಪ್ರದೇಶ ಹಾಗೂ ಉತ್ತರ ಭಾರತದ ಹಳ್ಳಿ ಮತ್ತು ನಗರಗಳ ಕಹಿ ವಾಸ್ತವ ಎಂದು ವಿವರಿಸಿದ ಅವರು, ದಲಿತರಿಗೆ ಗ್ರಾಮದ ಸಾರ್ವಜನಿಕ ಬಾವಿಗಳಿಂದ ನೀರು ಕುಡಿಯಲು ಬಿಡದೆ ಅವರು ಪ್ರತ್ಯೇಕ ಬಾವಿ ತೋಡಿಕೊಳ್ಳಬೇಕಾದ ಸ್ಥಿತಿ ಇದೆ ಎಂದಿದ್ದಾರೆ. ಚಹಾ ಅಂಗಡಿಗಳಲ್ಲಿ ಇಂದಿಗೂ ಎರಡು ರೀತಿಯ ಲೋಟಗಳನ್ನು ಬಳಸಲಾಗುತ್ತಿದ್ದು, ಸಾಮಾನ್ಯರಿಗೆ ಗಾಜಿನ ಲೋಟಗಳಲ್ಲಿ ಹಾಗೂ ದಲಿತರಿಗೆ ಬಿಸಾಡುವ ಪ್ಲಾಸ್ಟಿಕ್ ಅಥವಾ ಪೇಪರ್ ಕಪ್ಗಳಲ್ಲಿ ಚಹಾ ನೀಡುವ ತಾರತಮ್ಯ ಜೀವಂತವಾಗಿದೆ ಎಂದು ಅವರು ತೀವ್ರ ಬೇಸರ ವ್ಯಕ್ತಪಡಿಸಿದ್ದಾರೆ.
