ಪಂಜಾಬ್‌ನ ಲುಧಿಯಾನದಲ್ಲಿ ನಡೆಯುತ್ತಿರುವ ‘ಶ್ರೀ ಹನುಮಂತ್ ಕಥಾ’ ಧಾರ್ಮಿಕ ಕಾರ್ಯಕ್ರಮದಲ್ಲಿ ಬಾಗೇಶ್ವರ ಧಾಮದ ಮುಖ್ಯಸ್ಥ ಧೀರೇಂದ್ರ ಕೃಷ್ಣ ಶಾಸ್ತ್ರಿ ನೀಡಿರುವ ಹೇಳಿಕೆಗಳು ತೀವ್ರ ವಿವಾದಕ್ಕೆ ಕಾರಣವಾಗಿವೆ. ಪಂಜಾಬ್‌ನಲ್ಲಿನ ಮಾದಕ ವ್ಯಸನ ಹಾಗೂ ಧಾರ್ಮಿಕ ಮತಾಂತರದ ಕುರಿತು ಮಾತನಾಡುವ ವೇಳೆ ಶಾಸ್ತ್ರಿ ಅವರು ಆಕ್ಷೇಪಾರ್ಹ ಹೇಳಿಕೆಗಳನ್ನು ನೀಡಿದ್ದಾರೆ ಎಂದು ಆರೋಪಿಸಿರುವ ಲುಧಿಯಾನದ ಶಾಹಿ ಇಮಾಮ್ ಮೌಲಾನಾ ಉಸ್ಮಾನ್ ರೆಹಮಾನಿ ಲುಧಿಯಾನ್ವಿ ಸಾನಿ, ಶಾಸ್ತ್ರಿ ಅವರು ತಮ್ಮ ಹೇಳಿಕೆಗಳನ್ನು ಹಿಂಪಡೆದು ಸಾರ್ವಜನಿಕವಾಗಿ ಕ್ಷಮೆಯಾಚಿಸಬೇಕು ಎಂದು ಆಗ್ರಹಿಸಿದ್ದಾರೆ. ಕ್ಷಮೆಯಾಚಿಸದಿದ್ದಲ್ಲಿ ಅವರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳುವುದಾಗಿ ಎಚ್ಚರಿಸಿದ್ದಾರೆ.
ಕಾರ್ಯಕ್ರಮದಲ್ಲಿ ಮಾತನಾಡಿದ್ದ ಧೀರೇಂದ್ರ ಶಾಸ್ತ್ರಿ, ಸಿಖ್ ಸಮುದಾಯವನ್ನುದ್ದೇಶಿಸಿ ಗುರು ಗ್ರಂಥ ಸಾಹಿಬ್ ಅನ್ನು ಅನುಸರಿಸುವವರು ಯಾವುದೇ ಕಾರಣಕ್ಕೂ ಮತಾಂತರಗೊಳ್ಳಬಾರದು ಮತ್ತು ಮತಾಂತರದ ವಿರುದ್ಧ ತಾವು ಸಿಖ್ಖರ ಪರವಾಗಿ ನಿಲ್ಲುವುದಾಗಿ ಹೇಳಿದ್ದರು. ಭಾಷಣದ ವೇಳೆ “ಭೈಯಾ”ವನ್ನು “ಸೈಯಾಂ” ಆಗಿ ಪರಿವರ್ತಿಸುವ ಕುರಿತು ಅವರು ನೀಡಿದ ಹೇಳಿಕೆ ವಿವಾದವನ್ನು ಮತ್ತಷ್ಟು ತೀವ್ರಗೊಳಿಸಿದೆ. ತಮ್ಮ ವಿರುದ್ಧ ಎಫ್‌ಐಆರ್ ದಾಖಲಾಗಬಾರದು ಎಂಬ ಕಾರಣಕ್ಕೆ ಈ ವಿಷಯದ ಕುರಿತು ಹೆಚ್ಚು ವಿವರ ನೀಡುವುದಿಲ್ಲ ಎಂದೂ ಅವರು ಹೇಳಿದ್ದರು. ತಮ್ಮ ಹೇಳಿಕೆ ಇಸ್ಲಾಂ ಧರ್ಮದ ವಿರುದ್ಧವಾಗಿರಲಿಲ್ಲ, ಸಾಮಾಜಿಕ ವಾತಾವರಣವನ್ನು ಹಾಳುಮಾಡುವ ಅಥವಾ ಮತಾಂತರಕ್ಕೆ ಕಾರಣವಾಗುವ ಸಾಂಪ್ರದಾಯಿಕ ಪದ್ಧತಿಗಳ ವಿರುದ್ಧವಾಗಿತ್ತಷ್ಟೇ ಎಂದು ಶಾಸ್ತ್ರಿ ನಂತರ ಸ್ಪಷ್ಟನೆ ನೀಡಿದ್ದಾರೆ.
ಈ ಹೇಳಿಕೆಗಳನ್ನು ತೀವ್ರವಾಗಿ ಖಂಡಿಸಿರುವ ಶಾಹಿ ಇಮಾಮ್, ಪಂಜಾಬ್ ನೆಲವು ಗುರು ನಾನಕ್ ದೇವ್ ಮತ್ತು ಬಾಬಾ ಫರೀದ್ ಅವರ ಶಾಂತಿ ಹಾಗೂ ಭ್ರಾತೃತ್ವದ ಸಂದೇಶವನ್ನು ಸಾರಿದ ಪವಿತ್ರ ಭೂಮಿಯಾಗಿದ್ದು, ಇಲ್ಲಿ ಇಂತಹ ಆಕ್ಷೇಪಾರ್ಹ ಹೇಳಿಕೆಗಳನ್ನು ನೀಡುವುದು ದುರದೃಷ್ಟಕರ ಎಂದಿದ್ದಾರೆ. ದುಬೈ ಮತ್ತು ಪಂಜಾಬ್‌ನ ‘ಅಬ್ದುಲ್ಲಾ’ ಕುರಿತು ಶಾಸ್ತ್ರಿ ನೀಡಿದ ಪ್ರಸ್ತಾಪವನ್ನು ಪ್ರಶ್ನಿಸಿರುವ ಅವರು, ಮುಸ್ಲಿಮರನ್ನು ಅವರ ಧರ್ಮದ ಆಧಾರದ ಮೇಲೆ ವಿಭಿನ್ನವಾಗಿ ಕಾಣಬಾರದು ಎಂದು ವಾದಿಸಿದ್ದಾರೆ. ಧೀರೇಂದ್ರ ಶಾಸ್ತ್ರಿ ಮತ್ತು ಕಾರ್ಯಕ್ರಮದ ಆಯೋಜಕರ ವಿರುದ್ಧ ಪೊಲೀಸ್ ದೂರು ದಾಖಲಿಸುವುದಾಗಿ ಎಚ್ಚರಿಸಿರುವ ಶಾಹಿ ಇಮಾಮ್, ನಗರದಲ್ಲಿ ಧಾರ್ಮಿಕ ಸಾಮರಸ್ಯ ಕಾಪಾಡುವ ನಿಟ್ಟಿನಲ್ಲಿ ವಿವಿಧ ಸಮುದಾಯಗಳ ಮುಖಂಡರ ತುರ್ತು ಸಭೆಗೂ ಕರೆ ನೀಡಿದ್ದಾರೆ. ಕ್ರಿಶ್ಚಿಯನ್ ಸಮುದಾಯದ ಮುಖಂಡರೂ ಸಹ ಶಾಸ್ತ್ರಿ ಅವರ ಹೇಳಿಕೆಗೆ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
