ಎಟಿಎಂ ಎನ್ನುವುದು ಬ್ಯಾಂಕಿಂಗ್ ಸೇವೆಗಳನ್ನು ಸುಗಮಗೊಳಿಸುವ ಸಲುವಾಗಿ ಸಂಶೋಧಿಸಲಾದ ಯಂತ್ರ. ಇದನ್ನು ಡೆಬಿಟ್ ಅಥವಾ ಕ್ರೆಡಿಟ್ ಕಾರ್ಡ್ ಬಳಸಿ ನಗದು ಹಿಂಪಡೆಯಲು, ಬ್ಯಾಲೆನ್ಸ್ ಪರಿಶೀಲಿಸಲು, ಮಿನಿ ಸ್ಟೇಟ್‌ಮೆಂಟ್ ಪಡೆಯಲು ಮತ್ತು ಇತರ ಬ್ಯಾಂಕಿಂಗ್ ಸೇವೆಗಳನ್ನು ಪಡೆಯಲು ಬಳಸಬಹುದು.
ಕೆಲವು ಎಟಿಎಂಗಳಲ್ಲಿ ಹಣವನ್ನು ಡೆಪಾಸಿಟ್‌ ಮಾಡುವ ಸೌಲಭ್ಯವೂ ಇದೆ. ಡಿಜಿಟಲ್ ಪಾವತಿಗಳು ಹೆಚ್ಚಾದರೂ, ಅನೇಕ ಜನರು ಈಗಲೂ ಎಟಿಎಂಗಳ ಮೂಲಕ ಹಣವನ್ನು ಪಡೆಯುತ್ತಾರೆ. ನಗದು ವಹಿವಾಟು ಹೆಚ್ಚಾದಂತೆ ಎಟಿಎಂಗಳ ಬಳಕೆಯ ಮೇಲೆ ಹೊಸ ಶುಲ್ಕಗಳನ್ನು ಜಾರಿಗೆ ತರಲು ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್‌ಬಿಐ) ಸಜ್ಜಾಗಿದೆ. ಇದರ ಭಾಗವಾಗಿ, ಮೇ 1ರಿಂದ, ಎಟಿಎಂಗಳಿಂದ ಹಣವನ್ನು ಹಿಂಪಡೆಯಲು ಅಥವಾ ಬ್ಯಾಲೆನ್ಸ್ ಪರಿಶೀಲಿಸಲು ಗ್ರಾಹಕರಿಗೆ ಹೆಚ್ಚುವರಿ ಶುಲ್ಕ ವಿಧಿಸಲಾಗುತ್ತದೆ.
ವೈಟ್-ಲೇಬಲ್ ಎಟಿಎಂ ನಿರ್ವಾಹಕರ ನಿರ್ವಹಣಾ ವೆಚ್ಚಗಳು ಹೆಚ್ಚಾಗಿದ್ದರಿಂದ ಎಟಿಎಂ ವಹಿವಾಟುಗಳ ಮೇಲಿನ ಶುಲ್ಕವನ್ನು ಹೆಚ್ಚಿಸುವಂತೆ ಮನವಿ ಮಾಡಲಾಗಿತ್ತು. ಈ ಪ್ರಸ್ತಾವನೆಯನ್ನು ಭಾರತೀಯ ರಾಷ್ಟ್ರೀಯ ಪಾವತಿ ನಿಗಮ (NPCI) ಅನುಮೋದಿಸಿದೆ. ಇದರೊಂದಿಗೆ, ಹೊಸ ಶುಲ್ಕಗಳು ಮೇ 1 ರಿಂದ ಜಾರಿಗೆ ಬರಲಿವೆ.
ಹೊಸ ಎಟಿಎಂ ಶುಲ್ಕಗಳ ವಿಷಯಕ್ಕೆ ಬಂದರೆ, ಪ್ರತಿ ವಹಿವಾಟಿಗೆ ನಗದು ಹಿಂಪಡೆಯುವ ಶುಲ್ಕವನ್ನು ರೂ. 17 ರಿಂದ 19ಕ್ಕೆ ಹೆಚ್ಚಿಸಲಾಗಿದೆ. ಏರಿಕೆಯಾಗಿದೆ. ಅಲ್ಲದೆ, ಪ್ರತಿ ವಹಿವಾಟಿಗೆ ಬಾಕಿ ವಿಚಾರಣೆ ಶುಲ್ಕವನ್ನು ರೂ. 6ರಿಂದ ರೂ. 7 ಕ್ಕೆ ಹೆಚ್ಚಿಸಲಾಗಿದೆ. ಈಗ, ಯಾವುದೇ ಬ್ಯಾಂಕ್ ಖಾತೆದಾರರು ಮೆಟ್ರೋ ನಗರಗಳಲ್ಲಿ ತಿಂಗಳಿಗೆ 5 ಉಚಿತ ವಹಿವಾಟುಗಳನ್ನು ಮತ್ತು ಮೆಟ್ರೋ ಅಲ್ಲದ ಪ್ರದೇಶಗಳಲ್ಲಿ ತಿಂಗಳಿಗೆ 3 ಉಚಿತ ವಹಿವಾಟುಗಳನ್ನು ಮಾಡಬಹುದು. ಈ ಮಿತಿಯನ್ನು ಮೀರಿದರೆ, ಹೊಸದಾಗಿ ನಿರ್ಧರಿಸಲಾದ ಶುಲ್ಕಗಳು ಅನ್ವಯವಾಗುತ್ತವೆ. ನೀವು ನಿಮ್ಮ ಬ್ಯಾಂಕಿನ ಕಾರ್ಡ್‌ನೊಂದಿಗೆ ಇತರ ಬ್ಯಾಂಕುಗಳ ಎಟಿಎಂಗಳನ್ನು ಬಳಸಿದರೆ, ನೀವು ಅವುಗಳಿಗೂ ಶುಲ್ಕವನ್ನು ಪಾವತಿಸಬೇಕಾಗುತ್ತದೆ.
ಇವು ಸಣ್ಣ ಬ್ಯಾಂಕುಗಳ ಮೇಲೆ ಪರಿಣಾಮ ಬೀರುತ್ತವೆ. ಆ ಬ್ಯಾಂಕುಗಳು ಕಡಿಮೆ ಎಟಿಎಂಗಳನ್ನು ಹೊಂದಿರುವುದರಿಂದ, ಅವುಗಳ ಗ್ರಾಹಕರು ಹೆಚ್ಚಾಗಿ ಇತರ ಬ್ಯಾಂಕುಗಳ ಎಟಿಎಂಗಳನ್ನು ಬಳಸುತ್ತಾರೆ. ಇದರರ್ಥ ಅವರು ಹೆಚ್ಚಿನ ಶುಲ್ಕವನ್ನು ಪಾವತಿಸಬೇಕಾಗುತ್ತದೆ. ಅಲ್ಲದೆ, ಎಟಿಎಂಗಳನ್ನು ಆಗಾಗ್ಗೆ ಬಳಸುವವರು ಹೆಚ್ಚಿನ ಶುಲ್ಕವನ್ನು ಪಾವತಿಸಬೇಕಾಗುತ್ತದೆ. ಡಿಜಿಟಲ್ ವ್ಯವಹಾರದ ಕುರಿತು ಅಷ್ಟು ಅರಿವಿಲ್ಲದ ಜನರ ಪಾಲಿಗೆ ಇದೊಂದು ದೊಡ್ಡ ಹೊಡೆತವಾಗಿ ಪರಿಣಮಿಸಲಿದೆ.
