ನುಡಿ ನಮನ | ʼಸಿರಿʼ ಸಂಧಿಯ ಮಹಾನ್‌ ಕಲಾವಿದ ಮಾಚಾರು ಗೋಪಾಲ ನಾಯ್ಕ

ಜನಪದ ಕಲಾವಿದ, ತುಳು ಸಿರಿ ಕಾವ್ಯದ ಕಣಜ ಎಂದೇ  ಖ್ಯಾತರಾಗಿದ್ದ ಉಜಿರೆ ಗ್ರಾಮದ ಬೆಳಾಲಿನ ಮಾಚಾರು ಗೋಪಾಲ ನಾಯ್ಕರವರು  ಇಂದು ನಿಧನ ಹೊಂದಿದ್ದಾರೆ. ಅಗಲಿದ ಚೇತನಕ್ಕೆ ಪೀಪಲ್‌ ಮೀಡಿಯಾವು ಗೌರವದ ಅಂತಿಮ ನಮನಗಳನ್ನು ಸಲ್ಲಿಸುತ್ತದೆ.

ತುಳು ಜಾನಪದ ಕಾವ್ಯಗಳಲ್ಲಿ ಕಿರೀಟಪ್ರಾಯವಾದ ಕಾವ್ಯ – ಸಿರಿ ಮಹಾಕಾವ್ಯ. ಈ ಕಂಠಸ್ಥ ಕಾವ್ಯವನ್ನು ಹಾಡುವ ಕೋಗಿಲೆಯೊಂದು ಇಂದು ವಿಧಿವಶವಾಗಿದೆ. ಅವರು ಬೆಳ್ತಂಗಡಿ ತಾಲೂಕಿನ ಉಜಿರೆ ಗ್ರಾಮದ ಬೆಳಾಲಿನ ಮಾಚಾರು ಗೋಪಾಲ ನಾಯ್ಕ. ಅಕ್ಕೆರಸು ಸಿರಿಯ ಕಾವ್ಯವನ್ನು ಬರೋಬ್ಬರಿ 15,683 ಸಾಲುಗಳಲ್ಲಿ ಹಾಡಿದ ಇವರ ಪ್ರತಿಭೆಯನ್ನು ತುಳುನಾಡು ಎಂದಿಗೂ ಮರೆಯಲು ಸಾಧ್ಯವಿಲ್ಲ. 

ಮಹಿಳೆಯೊಬ್ಬಳು ಮಾತೃ ಪ್ರಧಾನ ಕುಟುಂಬ ವ್ಯವಸ್ಥೆಯ ಒಳಗೆ ಪರುಷನ ದಬ್ಬಾಳಿಕೆಯನ್ನು ದಿಟ್ಟವಾಗಿ ಪ್ರತಿಭಟಿಸಿ ತನಗೆ ಮೋಸ ಮಾಡಿದ ಪತಿಗೆ ವಿಚ್ಛೇದನ ನೀಡಿ ಮತ್ತೊಂದು ಮದುವೆಯಾಗುವ ಸಿರಿ ನ್ಯಾಯಕ್ಕಾಗಿ ವ್ಯವಸ್ಥೆಯ ವಿರುದ್ಧ ಪ್ರತಿರೋಧ ಒಡ್ಡುವ ದೊಡ್ಡ ಶಕ್ತಿಯಾಗಿ ಈ ಕಾವ್ಯದಲ್ಲಿ ಕಾಣಿಸಿ ಕೊಳ್ಳುತ್ತಾಳೆ.

ಸಾಮಾನ್ಯವಾಗಿ ಸಿರಿ ಜಾತ್ರೆಗಳಲ್ಲಿ, ಮನೆ ಮತ್ತು ಆಲಡೆಗಳಲ್ಲಿ ನಡೆಯುವ ದಲ್ಯ, ಮದುವೆ, ಮದ್ದು ನೀಡುವಾಗ ಹಾಡುವ ಈ ಕಾವ್ಯವನ್ನು ಕರ್ಗಿ ಶೆಡ್ತಿ, ರಾಮಕ್ಕ ಮುಗ್ಗೇರ್ತಿ, ಲೀಲಾ ಶೆಡ್ತಿ ಮೊದಲಾದವರು ಹಾಡಿದ್ದಾರೆ. ಇದನ್ನು ಸಿರಿ ಸಂಧಿಯ ಸಂಪುಟದಲ್ಲಿ ದಾಖಲಿಸಲಾಗಿದೆ. ತುಳುನಾಡಿನಲ್ಲಿ ನೂರಾರು ಜಾನಪದ ಹಾಡುಗಾರರು ಈ ಸಂಧಿಯನ್ನು ಹಾಡುತ್ತಾರೆ. ಆದರೆ ಬಹಳ ದೀರ್ಘವಾಗಿ ಈ ಹಾಡನ್ನು ಕಟ್ಟಿ ಹಾಡಿದ್ದು ಮಚಾರು ಗೋಪಾಲ ನಾಯ್ಕರವರು.

ಫಿನ್‌ ಲ್ಯಾಂಡಿನ ಜಾನಪದ ವಿದ್ವಾಂಸ ಲೌರಿ ಹೋಂಕೋ ಉಡುಪಿಯಲ್ಲಿ ನಡೆದ ಫಿನ್‌ ಲ್ಯಾಂಡಿನ ಕಾಲೇವಾಲ ಕಾವ್ಯದ 150 ನೇ ವರ್ಷಾಚರಣೆಗೆ ಬಂದಿದ್ದಾಗ ಅವರು ಫಿನ್ನಿಷ್‌ ಇಂಡಿಯಾ ಜಾನಪದ ದಾಖಲಾತಿಯಲ್ಲಿ ಕೈಗೆತ್ತಿಕೊಂಡ ಯೋಜನೆಗಳಲ್ಲಿ ಸಿರಿ ಮಹಾಕಾವ್ಯದ ಪಠ್ಯೀಕರಣ ಒಂದು. ಬಿ ವಿವೇಕ್‌ ರೈ, ಚಿನ್ನಪ್ಪ ಗೌಡ, ಅನ್ನೇಲಿ ಹೋಂಕೋ ಅವರು ಲೌರಿ ಹೋಂಕೋ ಜೊತೆಗೆ ಸೇರಿಕೊಂಡು ಏಳು ವರ್ಷಗಳ ಈ ಕಾವ್ಯದ ದಾಖಲಾತಿ, ಸಂಪಾದನೆ, ಪ್ರಕಟಣೆಯನ್ನು ಮಾಡಿದರು. 

ಈ ಸಂದರ್ಭದಲ್ಲಿ ಮಾಚಾರು ಗೋಪಾಲ ನಾಯ್ಕರ ಜಗತ್ತಿನಲ್ಲಿ ಅತ್ಯಂತ ದೀರ್ಘವಾದ ಪಠ್ಯಗಳಲ್ಲಿ ಒಂದಾದ ಸಿರಿ ಸಂಧಿ ಬೆಳಕಿಗೆ ಬಂತು. 1990 ಡಿಸೆಂಬರ್‌ 20 ರಂದು ಈ ಸಂಧಿಯನ್ನು ದಾಖಲಿಸಲು ಆರಂಭ ಮಾಡಲಾಯಿತು. ಈ ಕಾವ್ಯವನ್ನು ಗೋಪಾಲ ನಾಯ್ಕರು ಬರೊಬ್ಬರಿ ಒಂಬತ್ತು ದಿನಗಳ ಕಾಲ ಹಾಡಿದರು. ಸರಿ ಸುಮಾರು 25 ಗಂಟೆ!

ಇದಲ್ಲದೆ ಇವರು ಹಾಡಿದ 7,000 ಸಾಲುಗಳ ಕೋಟಿ ಚೆನ್ನಯ ಬೈದ್ಯರ ಸಂಧಿ, 1,800 ಸಾಲುಗಳ ಏಕಸಾಲ್ಯೆರೆ ಸಂಧಿ, 1,150 ಸಾಲುಗಳ ಮೈಸಂದಾಯ ಸಂಧಿ, 2,080 ಸಾಲುಗಳ ಈಶ್ವರ ಸಂಧಿ, 3,000 ಸಾಲುಗಳು ಕೋಡ್ದಬ್ಬು ಸಂಧಿ ದಾಖಲಾಗಿವೆ. ಸಿರಿ ಜಾತ್ರೆ ಹಾಗೂ ದಲ್ಯದಲ್ಲಿ ಕುಮಾರನಾಗಿ ಸಿರಿ ಬಳಗವನ್ನು ಸಂತೈಸುವ ಇವರು ಕಬಿತೆ, ಅಜ್ಜಿಕತೆ ಮೊದಲಾದ ಜಾನಪದ ಸಂಪತ್ತಿನ ಗಣಿಯಾಗಿದ್ದರು.

ಸಿರಿ ಯೋಜನೆಯ ಈ ಸಮಗ್ರ ಮಾಹಿತಿಗಳನ್ನು ಫಿನ್ನೆಂಡ್‌ನ ನಾರ್ಡಿಕ್ ಇನ್‌ಸ್ಟಿಟ್ಯೂಟ್ ಆಫ್ ಫೋಕ್‌ಲೋರ್ ನ ಸಿರಿ ಆರ್ಕೈವ್ ನಲ್ಲಿ ಇಡಲಾಗಿದೆ. ಉಡುಪಿಯ ಪ್ರಾದೇಶಿಕ ರಂಗಕಲೆಗಳ ಅಧ್ಯಯನ ಕೇಂದ್ರದಲ್ಲಿ ಇದೆ. ಈ ಸಂಗ್ರಹದಲ್ಲಿ 350 ಗಂಟೆಗಳ ಅಡಿಯೊ, 250 ಗಂಟೆಗಳ ವಿಡಿಯೊ, ಸುಮಾರು 5,000 ಫೋಟೊಗಳು ಇವೆ. 

ಗೋಪಾಲ ನಾಯ್ಕರು ಹಾಡಿದ ಈ ಸಂಧಿಯನ್ನು  THE SIRI EPIC as performed by Gopala Naika ಎಂದು ಸಂಪುಟವಾಗಿ ಪ್ರಕಟಿಸಲಾಗಿದೆ.

ಇಂದು ನಮ್ಮನ್ನಗಲಿದ ಮಾಚಾರು ಗೋಪಾಲ ನಾಯ್ಕರಿಗೆ ಗೌರವದ ಅಂತಿಮ ನಮನಗಳು

ಚರಣ್‌ ಐವರ್ನಾಡು