ಪಶ್ಚಿಮ ಬಂಗಾಳ: ಮತದಾರರ ಪಟ್ಟಿಯಿಂದ ಲಕ್ಷಾಂತರ ಜನರ ಹೆಸರು ನಾಪತ್ತೆ; ಪಡಿತರ, ಪೌರತ್ವ ಮತ್ತು ಭವಿಷ್ಯದ ಆತಂಕದಲ್ಲಿ ಜನಸಾಮಾನ್ಯರು

ಕೋಲ್ಕತ್ತಾ: ಪಶ್ಚಿಮ ಬಂಗಾಳದಲ್ಲಿ ನಡೆದ ಮತದಾರರ ಪಟ್ಟಿಯ ವಿಶೇಷ ತೀವ್ರ ಪರಿಷ್ಕರಣೆ (SIR) ಪ್ರಕ್ರಿಯೆಯು ಲಕ್ಷಾಂತರ ಜನರ ಬದುಕಿನಲ್ಲಿ ತೀವ್ರ ಆತಂಕ ಹಾಗೂ ಅನಿಶ್ಚಿತತೆಯನ್ನು ಸೃಷ್ಟಿಸಿದೆ ಎಂದು ‘ದಿ ಇಂಡಿಯನ್ ಎಕ್ಸ್‌ಪ್ರೆಸ್’ ವರದಿ ಮಾಡಿದೆ. ಜೂನ್ ಅಂತ್ಯದ ವೇಳೆಗೆ ಸುಮಾರು 36.6 ಲಕ್ಷ ಪ್ರಕರಣಗಳು 19 ನ್ಯಾಯಮಂಡಳಿಗಳ (ಟ್ರಿಬ್ಯೂನಲ್) ಮುಂದೆ ಬಾಕಿ ಉಳಿದಿದ್ದು, ವಿಚಾರಣೆ ಪೂರ್ಣಗೊಂಡ ನಂತರವೂ ಹಲವು ಅರ್ಹ ನಾಗರಿಕರ ಹೆಸರುಗಳು ಅಂತಿಮ ಪಟ್ಟಿಯಿಂದ ನಿಗೂಢವಾಗಿ ಕೈಬಿಡಲ್ಪಟ್ಟಿವೆ.

ಚುನಾವಣಾ ಆಯೋಗವು (ECI) ಈ ಅಭಿಯಾನದ ಸಮಗ್ರ ವಿವರಗಳನ್ನು ಸಾರ್ವಜನಿಕವಾಗಿ ಬಿಡುಗಡೆ ಮಾಡಿಲ್ಲವಾದರೂ, ಹಲವು ವರ್ಷಗಳಿಂದ ರಾಜ್ಯದಲ್ಲಿ ಮತ ಚಲಾಯಿಸುತ್ತಿದ್ದವರ ಹೆಸರಿನ ಮುಂದೆ ಈಗ ‘Excluded’ (ಹೊರಗಿಡಲಾಗಿದೆ) ಎಂದು ನಮೂದಿಸಲಾಗಿದೆ. ಪಟ್ಟಿಯಿಂದ ಹೊರಗುಳಿದಿರುವ ಜನರು ಈಗ ಪಡಿತರ, ವೃದ್ಧಾಪ್ಯ/ವಿಧವಾ ವೇತನ, ಎಲ್‌ಪಿಜಿ ಸಂಪರ್ಕದಂತಹ ಕಲ್ಯಾಣ ಯೋಜನೆಗಳಿಂದ ವಂಚಿತರಾಗುವ ಮತ್ತು ಗಡೀಪಾರು ಭೀತಿಯ ಎದುರು ನಿಲ್ಲುವಂತಾಗಿದೆ ಎಂದು ಪತ್ರಿಕೆಯ ತನಿಖಾ ವರದಿ ತಿಳಿಸಿದೆ. ಮುಖ್ಯಮಂತ್ರಿ ಸುವೇಂದು ಅಧಿಕಾರಿ ಅವರು ತಮ್ಮ ಮೊದಲ ಸಂಪುಟ ಸಭೆಯಲ್ಲೇ, ಮತದಾರರ ಪಟ್ಟಿಯಿಂದ ಹೆಸರು ಕೈಬಿಡಲಾದವರು ರಾಜ್ಯ ಸರ್ಕಾರದ ಯೋಜನೆಗಳ ಲಾಭ ಪಡೆಯಲು ಸಾಧ್ಯವಿಲ್ಲ ಎಂದು ಎಚ್ಚರಿಸಿದ್ದು ಈ ಭೀತಿಯನ್ನು ಮತ್ತಷ್ಟು ಹೆಚ್ಚಿಸಿದೆ.

ಒಂದೇ ಕುಟುಂಬದ ಕೆಲವರ ಹೆಸರು ಉಳಿದು, ಇತರರ ಹೆಸರುಗಳನ್ನು ಯಾವುದೇ ಸ್ಪಷ್ಟ ಕಾರಣವಿಲ್ಲದೆ ಕೈಬಿಡಲಾಗಿರುವ ನೂರಾರು ಪ್ರಕರಣಗಳು ಬೆಳಕಿಗೆ ಬಂದಿವೆ. ಬೀರ್‌ಭೂಮ್‌ನ ಸಬಿಯಾ ಖಾತೂನ್ ಮತ್ತು ಅವರ 72 ವರ್ಷದ ತಂದೆ ಶಮ್ಸುಲ್ ಆಲಂ ಅವರ ಹೆಸರನ್ನು ಪಟ್ಟಿಯಿಂದ ತೆಗೆದುಹಾಕಲಾಗಿದ್ದು, ಅವರ ಪ್ರಕರಣ ಈಗ ಕಲ್ಕತ್ತಾ ಹೈಕೋರ್ಟ್‌ನಲ್ಲಿದೆ. ಹೂಗ್ಲಿಯ ಮಂಜೂರಾ ಬೇಗಂ ಹಾಗೂ ಜಾವೇದ್ ಖಾನ್ ಅವರ ಕುಟುಂಬಸ್ಥರ ಹೆಸರುಗಳಿದ್ದರೂ ಇವರ ಹೆಸರುಗಳನ್ನು ಮಾತ್ರ ಕೈಬಿಡಲಾಗಿದೆ. ಕೋಲ್ಕತ್ತಾದ ಕೊಳಚೆ ಪ್ರದೇಶಗಳಲ್ಲಿ ಹೂವಿನ ಹಾರ ಮಾರಿ ಜೀವನ ಸಾಗಿಸುವ ಅಮೀನಾ ಪಾಸ್ವಾನ್, ಮನೆಗೆಲಸ ಮಾಡುವ ಪಿಂಕಿ ದಾಸ್, ರಿಕ್ಷಾ ಚಾಲಕರಾದ ಶೇಖ್ ಛೋಟು ಮತ್ತು ಅಸ್ಮಾ ಖಾತೂನ್ ಅವರಂತಹ ಅತ್ಯಂತ ದುರ್ಬಲ ವರ್ಗದ ಜನರ ಹೆಸರುಗಳೂ ರದ್ದಾಗಿವೆ.

ಸ್ಥಳೀಯ ಬಿಎಲ್‌ಒಗಳು (ಬೂತ್ ಮಟ್ಟದ ಅಧಿಕಾರಿಗಳು) ನ್ಯಾಯಮಂಡಳಿಯ ಈ ಕ್ರಮಕ್ಕೆ ಯಾವುದೇ ಸ್ಪಷ್ಟ ವಿವರಣೆ ನೀಡಲು ಅಸಹಾಯಕರಾಗಿದ್ದಾರೆ. ಇತ್ತ ಕೊಳಚೆ ಪ್ರದೇಶದ ಜನರಿಗೆ ನೆರವಾಗುತ್ತಿರುವ ‘ಮುಕ್ತ ಕಂಠ ಮಹಿಳಾ ಸಮಿತಿ’ ಸಂಸ್ಥೆಯ ಪ್ರಕಾರ, ಆಫ್‌ಲೈನ್ ಮೂಲಕ ಸಲ್ಲಿಸಲಾದ ಮೇಲ್ಮನವಿಗಳಲ್ಲಿ ಹಲವರಿಗೆ ಸ್ವೀಕೃತಿ ರಸೀದಿ ಕೂಡ ಸಿಕ್ಕಿಲ್ಲ. ಬಡತನದಿಂದಾಗಿ ಪ್ರತಿಯೊಬ್ಬರೂ ಪ್ರತ್ಯೇಕವಾಗಿ ಹೈಕೋರ್ಟ್ ಮೆಟ್ಟಿಲೇರಲು ಸಾಧ್ಯವಾಗದೆ, ನ್ಯಾಯಕ್ಕಾಗಿ ಕಾಯುತ್ತಾ ಜನರು ಕಂಗಾಲಾಗಿದ್ದಾರೆ ಎಂದು ದಿ ಇಂಡಿಯನ್ ಎಕ್ಸ್‌ಪ್ರೆಸ್ ವರದಿಯಲ್ಲಿ ವಿವರಿಸಲಾಗಿದೆ.