ಫ್ಲೋರಿಡಾದಲ್ಲಿ ಬಹಾಮಾಸ್‌ಗೆ ತೆರಳುತ್ತಿದ್ದ ಖಾಸಗಿ ವಿಮಾನ ಪತನ: ಒಂಬತ್ತು ಮಂದಿ ಸಾವು

ಅಮೆರಿಕದ ಫ್ಲೋರಿಡಾ ರಾಜ್ಯದ ಪಾಮ್ ಬೀಚ್ ಕೌಂಟಿಯಲ್ಲಿ ಖಾಸಗಿ ಜೆಟ್ ವಿಮಾನವೊಂದು ಪತನಗೊಂಡು ಅದರಲ್ಲಿದ್ದ ಒಂಬತ್ತು ಮಂದಿ ಮೃತಪಟ್ಟಿದ್ದಾರೆ. ಹವಾಮಾನ ವೈಪರೀತ್ಯ ಮತ್ತು ವಿಮಾನದಲ್ಲಿ ಮಂಜುಗಡ್ಡೆ ಶೇಖರಣೆಯಾಗಿರುವ ಬಗ್ಗೆ ಪೈಲಟ್ ಮೊದಲೇ ಮಾಹಿತಿ ನೀಡಿದ್ದರು. ಅಪಘಾತದ ಬಗ್ಗೆ ತನಿಖೆ ನಡೆಯುತ್ತಿದೆ.

ಅಮೆರಿಕದ ಫ್ಲೋರಿಡಾ ರಾಜ್ಯದ ಪಾಮ್ ಬೀಚ್ ಕೌಂಟಿಯ ಜನವಸತಿ ಪ್ರದೇಶದಲ್ಲಿ ಭಾನುವಾರ (ನವೆಂಬರ್ 1) ಖಾಸಗಿ ಜೆಟ್ ವಿಮಾನವೊಂದು ಪತನಗೊಂಡಿದೆ. ಘಟನೆಯಲ್ಲಿ ವಿಮಾನದಲ್ಲಿದ್ದ ಒಂಬತ್ತು ಮಂದಿ ಮೃತಪಟ್ಟಿದ್ದಾರೆ ಎಂದು ಅಮೆರಿಕದ ಸಾರಿಗೆ ಕಾರ್ಯದರ್ಶಿ ಸೀನ್ ಡಫಿ ತಿಳಿಸಿದ್ದಾರೆ.

2004ರಲ್ಲಿ ತಯಾರಾಗಿದ್ದ ಲಿಯರ್‌ಜೆಟ್ 60 (Learjet 60) ವಿಮಾನವು ಟೆಕ್ಸಾಸ್‌ನ ಆಸ್ಟಿನ್-ಬರ್ಗ್‌ಸ್ಟ್ರೋಮ್ ವಿಮಾನ ನಿಲ್ದಾಣದಿಂದ ಬಹಾಮಾಸ್‌ನ ನಾರ್ತ್ ಎಲುಥೆರಾ ವಿಮಾನ ನಿಲ್ದಾಣಕ್ಕೆ ತೆರಳುತ್ತಿತ್ತು. ಮಧ್ಯಾಹ್ನ ಸುಮಾರು 12.50ರ ವೇಳೆಗೆ ಕ್ರೆಸ್ಟ್‌ಹೇವನ್ ಸಮೀಪದ ಜನವಸತಿ ಪ್ರದೇಶದಲ್ಲಿ ವಿಮಾನ ಪತನಗೊಂಡಿದೆ ಎಂದು ಅಮೆರಿಕದ ಫೆಡರಲ್ ಏವಿಯೇಷನ್ ಅಡ್ಮಿನಿಸ್ಟ್ರೇಷನ್ (ಎಫ್‌ಎಎ) ತಿಳಿಸಿದೆ.

ಅಪಘಾತಕ್ಕೂ ಕೆಲವೇ ನಿಮಿಷಗಳ ಮೊದಲು ಪೈಲಟ್ ವಿಮಾನದಲ್ಲಿನ ತಾಂತ್ರಿಕ ಹಾಗೂ ಹವಾಮಾನ ಸಂಬಂಧಿ ತೊಂದರೆಗಳ ಬಗ್ಗೆ ವಾಯು ಸಂಚಾರ ನಿಯಂತ್ರಣ ಕೇಂದ್ರಕ್ಕೆ ಮಾಹಿತಿ ನೀಡಿದ್ದರು. ವಿಮಾನದ ಮೇಲೆ ಮಂಜುಗಡ್ಡೆ ಶೇಖರಣೆಯಾಗುತ್ತಿದೆ ಮತ್ತು ಗಾಳಿಯಲ್ಲೂ ಏರುಪೇರಿದೆ ಎಂದು ತಿಳಿಸಿದ್ದರು.

“ಸ್ವಲ್ಪ ಪ್ರಮಾಣದ ತಿಳಿ ಮಂಜುಗಡ್ಡೆ ಇದೆ. ಅದನ್ನು ನಿಭಾಯಿಸಬಹುದು. ಗಾಳಿಯಲ್ಲೂ ಮಧ್ಯಮ ಮಟ್ಟದ ಏರುಪೇರಿದೆ” ಎಂದು ಪೈಲಟ್ ನಿಯಂತ್ರಣ ಕೇಂದ್ರಕ್ಕೆ ತಿಳಿಸಿದ್ದರು.

ಬಳಿಕ ವಿಮಾನ ವೇಗವಾಗಿ ಕೆಳಮುಖವಾಗಿ ಇಳಿಯತೊಡಗಿದೆ. ಈ ವೇಳೆ ಪೈಲಟ್ ತುರ್ತು ಸಂದೇಶ ಕಳುಹಿಸಿದ್ದಾರೆ. “ನಾವು ವೇಗವಾಗಿ ಕೆಳಕ್ಕೆ ಇಳಿಯುತ್ತಿದ್ದೇವೆ. ಮೇಡೇ, ಮೇಡೇ” ಎಂದು ಎಚ್ಚರಿಸಿದ್ದಾರೆ. ಕೊನೆಗೆ “ನಾವು ನೆಲಕ್ಕೆ ಅಪ್ಪಳಿಸಲಿದ್ದೇವೆ” ಎಂದು ಹೇಳಿದ್ದಾರೆ.

ವಿಮಾನವು ರಸ್ತೆ ಸಮೀಪ ಪತನಗೊಂಡು ಬೆಂಕಿ ಹೊತ್ತಿಕೊಂಡಿದೆ. ಘಟನೆಯ ವೇಳೆ ನೆಲದಲ್ಲಿದ್ದ ಯಾರೂ ಮೃತಪಟ್ಟ ಅಥವಾ ಗಾಯಗೊಂಡ ಬಗ್ಗೆ ತಕ್ಷಣಕ್ಕೆ ವರದಿಯಾಗಿಲ್ಲ ಎಂದು ಫ್ಲೋರಿಡಾ ರಾಜ್ಯದ ಗವರ್ನರ್ ರಾನ್ ಡಿಸ್ಯಾಂಟಿಸ್ ತಿಳಿಸಿದ್ದಾರೆ.

ಅಪಘಾತದ ಸ್ಥಳದ ಸಮೀಪವಿದ್ದ ಮೊಬೈಲ್ ಮನೆಗಳ ವಸತಿ ಪ್ರದೇಶದಿಂದ ಸುಮಾರು 600 ಜನರನ್ನು ಸುರಕ್ಷಿತ ಸ್ಥಳಗಳಿಗೆ ಕಳುಹಿಸಲಾಗಿದೆ. ರಸ್ತೆಯ ಸಂಚಾರವನ್ನೂ ತಾತ್ಕಾಲಿಕವಾಗಿ ಬಂದ್ ಮಾಡಲಾಗಿದೆ.

ವಿಮಾನ ಪತನಕ್ಕೆ ನಿಖರ ಕಾರಣ ಇನ್ನೂ ತಿಳಿದುಬಂದಿಲ್ಲ. ವಿಮಾನದಲ್ಲಿನ ಮಂಜುಗಡ್ಡೆ, ಗಾಳಿಯ ಏರುಪೇರು ಸೇರಿದಂತೆ ಹಲವು ಸಾಧ್ಯತೆಗಳನ್ನು ತನಿಖೆ ಮಾಡಲಾಗುತ್ತಿದೆ. ಎಫ್‌ಎಎ ಮತ್ತು ರಾಷ್ಟ್ರೀಯ ಸಾರಿಗೆ ಸುರಕ್ಷತಾ ಮಂಡಳಿ (ಎನ್‌ಟಿಎಸ್‌ಬಿ) ತನಿಖೆ ನಡೆಸುತ್ತಿವೆ. ತನಿಖೆಯ ನೇತೃತ್ವವನ್ನು ಎನ್‌ಟಿಎಸ್‌ಬಿ ವಹಿಸಿಕೊಳ್ಳಲಿದೆ.