ತೆಲುಗು ವಿದ್ಯಾರ್ಥಿ ಸಾವಿನ ಕುರಿತು ಅಮೇರಿಕಾ ಪೊಲೀಸ್‌ ಲೇವಡಿ. ತನಿಖೆಗೆ ಆಗ್ರಹಿಸಿದ ಭಾರತ

ಹೊಸದಿಲ್ಲಿ: ಅಮೆರಿಕದಲ್ಲಿ ಆಂಧ್ರದ ಬಾಲಕಿಯ ಸಾವನ್ನು ಪೊಲೀಸರು ಅಣಕಿಸಿದ ಘಟನೆಯ ಕುರಿತು ಆಳವಾದ ತನಿಖೆ ನಡೆಸುವಂತೆ ಭಾರತ ಇತ್ತೀಚೆಗೆ ಅಮೆರಿಕ ಸರಕಾರವನ್ನು ಕೋರಿದೆ.

ಯುವತಿಯ ಸಾವಿನ ಕುರಿತು ಇಬ್ಬರು ಅಧಿಕಾರಿಗಳು ಕೇವಲವಾಗಿ ಮಾತನಾಡಿರುವ ಆಡಿಯೋ ರೆಕಾರ್ಡ್‌ ಒಂದು ವಿವಾದಕ್ಕೆ ಕಾರಣವಾಗಿದ್ದು, ಈ ಕುರಿತು ಕೇಂದ್ರ ಸರ್ಕಾರ ಪ್ರತಿಕ್ರಿಯಿಸಿ ಹೇಳಿಕೆ ಬಿಡುಗಡೆ ಮಾಡಿದೆ.

ಅಮೆರಿಕದ ಈಶಾನ್ಯ ವಿಶ್ವವಿದ್ಯಾಲಯದ ಸಿಯಾಟಲ್ ಕ್ಯಾಂಪಸ್‌ನಲ್ಲಿ ಸ್ನಾತಕೋತ್ತರ ವ್ಯಾಸಂಗ ಮಾಡುತ್ತಿರುವ ಕಂದುಲ ಜಾಹ್ನವಿ (23) ಈ ವರ್ಷದ ಜನವರಿಯಲ್ಲಿ ರಸ್ತೆ ಅಪಘಾತದಲ್ಲಿ ಮೃತಪಟ್ಟಿದ್ದರು.

ರಸ್ತೆ ದಾಟುತ್ತಿದ್ದ ಆಕೆಯು, ಪ್ರಕರಣವೊಂದರಲ್ಲಿ ಸಹಾಯಕ್ಕಾಗಿ ಅತಿ ವೇಗದಿಂದ ಸಾಗುತ್ತಿದ್ದ ಪೊಲೀಸ್‌ ಜೀಪ್‌ ಒಂದಕ್ಕೆ ಸಿಲುಕಿ ಸತ್ತಿದ್ದರು. ಅಂದು ಆ ಪೊಲೀಸ್‌ ಜೀಪ್‌ ಗಂಟೆ 120 ಕಿಮೀ ವೇಗದಲ್ಲಿತ್ತು ಎನ್ನಲಾಗಿದೆ. ಘಟನೆಯ ವೇಳೆ ಕೆವಿನ್ ಡೇವ್ ಎಂಬ ಪೊಲೀಸ್ ಅಧಿಕಾರಿ ಕಾರು ಚಲಾಯಿಸುತ್ತಿದ್ದರು. ಡ್ರಗ್ ಓವರ್ ಡೋಸ್ ಪ್ರಕರಣದ ಸ್ಥಳಕ್ಕೆ ವೇಗವಾಗಿ ವಾಹನ ಚಲಾಯಿಸುತ್ತಿದ್ದಾಗ ಅಪಘಾತ ಸಂಭವಿಸಿದೆ.

ಇದೇ ವೇಳೆ ಸಂತ್ರಸ್ತ ಕುಟುಂಬಕ್ಕೆ 11 ಸಾವಿರ ಡಾಲರ್ ಪರಿಹಾರ ನೀಡಲು ಪೊಲೀಸ್ ಯೂನಿಯನ್ ಸಿದ್ಧತೆ ನಡೆಸಿತ್ತು. ಈ ವಿಚಾರವಾಗಿ ಇನ್ನಿಬ್ಬರು ಪೊಲೀಸರ ನಡುವೆ ಈ ಕುರಿತು ಚರ್ಚೆ ನಡೆದಿದೆ. ಈ ಸಂದರ್ಭದಲ್ಲಿ ಅಧಿಕಾರಿಯೊಬ್ಬರು ಜಾಹ್ನವಿ ಸಾವಿನ ಬಗ್ಗೆ ವ್ಯಂಗ್ಯವಾಡಿದರು. “ಆಕೆಗೆ ಕೇವಲ 26 ವರ್ಷ, ಅವಳೊಬ್ಬ ಸಾಮಾನ್ಯ ವ್ಯಕ್ತಿ. ಅವಳ ಜೀವಕ್ಕೆ ಬೆಲೆಯಿಲ್ಲ. ಪರಿಹಾರ ಕೊಡಿ,” ಎಂದು ಸಿಯಾಟಲ್ ಪೊಲೀಸ್ ಯೂನಿಯನ್ ಉಪಾಧ್ಯಕ್ಷ ಡೇನಿಯಲ್ ಅಡೆರೆರ್ ಆಡಿದ್ದ ವ್ಯಂಗ್ಯದ ಮಾತುಗಳು ಸಮವಸ್ತ್ರಕ್ಕೆ ಅಳವಡಿಸಿದ್ದ ಮೈಕ್ ನಲ್ಲಿ ದಾಖಲಾಗಿವೆ. ಇಲಾಖೆಯ ನಿತ್ಯದ ತಪಾಸಣೆ ವೇಳೆ ಈ ಆಡಿಯೋ ಹೊರಬಂದು ವಿವಾದಕ್ಕೆ ಕಾರಣವಾಗಿತ್ತು.

ಘಟನೆಗೆ ಸ್ಯಾನ್ ಫ್ರಾನ್ಸಿಸ್ಕೋದಲ್ಲಿರುವ ಭಾರತೀಯ ದೂತಾವಾಸ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದೆ. ವ್ಯಕ್ತಿಯ ಸಾವಿನ ಕುರಿತು ಇಂತಹ ಲಘುವಾದ ಹೇಳಿಕೆ ನೀಡುತ್ತಿರುವುದು ಆತಂಕಕಾರಿಯಾಗಿದ್ದು, ಇದಕ್ಕೆ ಕಾರಣರಾದವರ ವಿರುದ್ಧ ಕ್ರಮ ಕೈಗೊಳ್ಳಬೇಕು ಎಂದು ಅದು ಆಗ್ರಹಿಸಿದೆ.

ಈ ವಿಷಯವನ್ನು ಸಿಯಾಟಲ್ ಮತ್ತು ವಾಷಿಂಗ್ಟನ್‌ನ ಪೊಲೀಸ್ ಅಧಿಕಾರಿಗಳ ಗಮನಕ್ಕೆ ತರಲಾಗಿದೆ ಮತ್ತು ಘಟನೆಯ ಬಗ್ಗೆ ಆಳವಾದ ತನಿಖೆಗೆ ಮನವಿ ಮಾಡಿರುವುದಾಗಿ ಕಾನ್ಸುಲೇಟ್ ಕಚೇರಿ ‘ಎಕ್ಸ್’ ಸಾಮಾಜಿಕ ಮಾಧ್ಯಮದಲ್ಲಿ ಪೋಸ್ಟ್ ಮಾಡಿದೆ. ಘಟನೆ ಕುರಿತು ಸ್ಥಳೀಯ ಪೊಲೀಸರು ಈಗಾಗಲೇ ತನಿಖೆ ಆರಂಭಿಸಿದ್ದಾರೆ.