ಅವರಿವರ ಕಣ್ಣಲ್ಲಿ ಅವಳ ‘ಪ್ರೇಮ’!
ಲಿಂಕ್ ನಕಲಿಸಲಾಗಿದೆ ✓
ಕವಯಿತ್ರಿ ವಿಜಯಶ್ರೀ ಹಾಲಾಡಿ ಅವರ ಕವನ
ಪ್ರೇಮ ಕವಿತೆಗಳನ್ನು
ಅವಳೀಗ ಬರೆಯುವುದಿಲ್ಲ
ಬರೆದರೂ ಪ್ರಕಟಣೆಗೆ
ಕಳಿಸದೆ, ಫೇಸ್ಬುಕ್ ಲ್ಲೂ
ಕಾಣಿಸದೆ ಬಚ್ಚಿಡುತ್ತಾಳೆ!
ಗಂಡ- ಎದೆಯೆತ್ತರ ಬೆಳೆದ
ಮಕ್ಕಳು, ತುಂಬು ಕುಟುಂಬದ;
ಮೆನೊಪಾಸ್ ಯಾತನೆಯಲ್ಲಿ
ಬಳಲುತ್ತಿರುವ ಅವಳಿಗೆ
ಪ್ರೇಮ ಕವಿತೆಗಳನ್ನು
ಬರೆಯಲು ನಿಷೇಧವಿದೆ!
ಹೌದು,
ಈ ವಯಸ್ಸಿನಲ್ಲಿ
ಯಾಕಾದರೂ ಪ್ರೇಮವನ್ನು
ಬರೆಯಬೇಕು?
ಅಂತಹ ‘ಗಲೀಜು’
ಸಾಲುಗಳನ್ನು ಓದಿದ
ಅವಳ ಮಕ್ಕಳು,
ನೆಂಟರಿಷ್ಟರು, ಅಕ್ಕಪಕ್ಕದವರು
ಮುಜುಗರ ಅನುಭವಿಸಿ
ತಲೆಕೆಟ್ಟಿದೆಯೆಂದು ನಗುವುದಿಲ್ಲವೆ?
ಅಥವಾ
ಅಪನಂಬಿಕೆ ತಾಳಿ
ಹೀನಾಯವಾಗಿ ಕಾಣುವುದಿಲ್ಲವೆ?
ಗಂಡನಿಗೇನಾದರೂ ಗೊತ್ತಾದರೆ
ರಾದ್ಧಾಂತವೇ ಜರುಗುವುದಿಲ್ಲವೇ?
ಅಧ್ಯಾತ್ಮ -ಸಂಪ್ರದಾಯ;
ಅವೆಲ್ಲ ಬೇಡವೆಂದರೆ
ಬಡತನದ ತಲ್ಲಣಗಳು
ದುರಿತಕಾಲದ ನೋವುನುರಿಗಳು
ಭೂಮಿತಾಯಿಯ ಚೆಲುವು..
ಸಾಲುಗಟ್ಟಿ ನಿಂತಿಲ್ಲವೆ
ಸಾವಿರಾರು ಸರಕುಗಳು?
ಮತ್ತೊಂದು ಸಂಶಯ!
ಸುಮ್ಮನೇ ಪ್ರೀತಿಪ್ರೇಮವನ್ನು
ಹುಟ್ಟಿಸಿಕೊಂಡು ಬರೆಯಲಾಗುತ್ತದೆಯೇ?
ನಿರೀಕ್ಷೆ ನಿರಾಸೆ
ತಹತಹ ಉತ್ಕಟತೆ
ವಿರಹ ಕಾಯುವಿಕೆ
ಕಾರಣವಿಲ್ಲದೆ ಸುಖಾಸುಮ್ಮನೆ
ಪದ್ಯವಾಗಿ ಹೊರಹೊಮ್ಮುತ್ತವೆಯೆ?!
ಗುಟ್ಟಾಗಿ ಯಾರನ್ನೋ ಪ್ರೇಮಿಸುತ್ತಿದ್ದಾಳೆ!
ನಿಜ…
ಇದೆಲ್ಲ ಎಲ್ಲಿಯವರೆಗೆ
ಮುಂದುವರಿದಿದೆಯೋ
ಇನ್ನೂ ಏನೇನು
ಸಂಭವಿಸಿದೆಯೋ
ಆ ದೇವರಿಗೇ ಗೊತ್ತು!
Peepal Media Desk
Peepal Media · ಕವಿತೆ ವಿಭಾಗ