ಕರ್ನಾಟಕದಲ್ಲಿ 25 ಸಾವಿರಕ್ಕೂ ಹೆಚ್ಚು ಪ್ರಿಸ್ಕೂಲ್‌ಗಳು ಮುಚ್ಚುವ ಭೀತಿ: 4 ಲಕ್ಷ ಮಹಿಳೆಯರ ಉದ್ಯೋಗಕ್ಕೆ ಕುತ್ತು

ರಾಜ್ಯ ಸರ್ಕಾರದ ಕಠಿಣ ಮತ್ತು ಅವಾಸ್ತವಿಕ ನಿಯಮಗಳಿಂದ ಕರ್ನಾಟಕದ 25 ಸಾವಿರಕ್ಕೂ ಹೆಚ್ಚು ಸ್ವತಂತ್ರ ಪ್ರಿಸ್ಕೂಲ್‌ಗಳು ಮುಚ್ಚುವ ಪರಿಸ್ಥಿತಿ ಎದುರಾಗಿದೆ. ಇದರಿಂದ ಎರಡು ಲಕ್ಷಕ್ಕೂ ಹೆಚ್ಚು ಮಕ್ಕಳ ಶಿಕ್ಷಣಕ್ಕೆ ತೊಂದರೆಯಾಗುವುದರ ಜೊತೆಗೆ, ಸುಮಾರು ನಾಲ್ಕು ಲಕ್ಷ ಮಹಿಳೆಯರ ಉದ್ಯೋಗ ಮತ್ತು ಬದುಕು ಅಪಾಯಕ್ಕೆ ಸಿಲುಕಲಿದೆ ಎಂದು ಕರ್ನಾಟಕ ಪ್ರಿಸ್ಕೂಲ್‌ಗಳ ಮಂಡಳಿ (KCPS) ಎಚ್ಚರಿಸಿದೆ.

ಬೆಂಗಳೂರು: ಕರ್ನಾಟಕದಲ್ಲಿ ಸ್ವತಂತ್ರವಾಗಿ ಕಾರ್ಯನಿರ್ವಹಿಸುತ್ತಿರುವ ಪ್ರಿಸ್ಕೂಲ್‌ಗಳ ಮೇಲೆ ರಾಜ್ಯ ಸರ್ಕಾರ ಜಾರಿಗೆ ತಂದಿರುವ ಹೊಸ ನಿಯಮಗಳು ದೊಡ್ಡ ಹೊಡೆತ ನೀಡಲಿವೆ ಎಂದು ಕರ್ನಾಟಕ ಪ್ರಿಸ್ಕೂಲ್‌ಗಳ ಮಂಡಳಿ (KCPS) ಆತಂಕ ವ್ಯಕ್ತಪಡಿಸಿದೆ. ಸರ್ಕಾರದ ನಿಯಮಗಳನ್ನು ಪಾಲಿಸುವುದು ಶೇ.90ಕ್ಕೂ ಹೆಚ್ಚು ಪ್ರಿಸ್ಕೂಲ್‌ಗಳಿಗೆ ಸಾಧ್ಯವಾಗುವುದಿಲ್ಲ. ಹೀಗಾಗಿ ಸಾವಿರಾರು ಶಾಲೆಗಳು ಬಾಗಿಲು ಮುಚ್ಚಬೇಕಾದ ಪರಿಸ್ಥಿತಿ ಬರಬಹುದು ಎಂದು ಮಂಡಳಿ ತಿಳಿಸಿದೆ.

ಬೆಂಗಳೂರಿನ ಪ್ರೆಸ್ ಕ್ಲಬ್‌ನಲ್ಲಿ ಮಂಗಳವಾರ ಸುದ್ದಿಗೋಷ್ಠಿ ನಡೆಸಿದ ಮಂಡಳಿಯ ಪದಾಧಿಕಾರಿಗಳು, ಶಿಕ್ಷಣ ಇಲಾಖೆ ಹೊರಡಿಸಿರುವ DPI-CPIOC7-2(NWS)/1/2026-E-2062350 ಸಂಖ್ಯೆಯ ಸುತ್ತೋಲೆ ಹಾಗೂ 2019ರ ವಿವರವಾದ ಮಾರ್ಗಸೂಚಿಗಳನ್ನು ಪ್ರಶ್ನಿಸಿದರು.

ಸಣ್ಣ ಮಕ್ಕಳ ಆಟದ ಮನೆಗಳು ಮತ್ತು ಶಿಶುಪಾಲನಾ ಕೇಂದ್ರಗಳಿಗೂ ದೊಡ್ಡ ಕೆ-12 ಶಾಲೆಗಳಿಗೆ ಅನ್ವಯಿಸುವ ಕಟ್ಟಡ ಮತ್ತು ಮೂಲಸೌಕರ್ಯ ನಿಯಮಗಳನ್ನು ವಿಧಿಸಲಾಗುತ್ತಿದೆ. ಇದರಿಂದ ನೆರೆಹೊರೆಯಲ್ಲಿರುವ ಸಣ್ಣ ಪ್ರಿಸ್ಕೂಲ್‌ಗಳು ಸಂಕಷ್ಟಕ್ಕೆ ಸಿಲುಕಿವೆ ಎಂದು ಆರೋಪಿಸಿದರು.

ಬಾಡಿಗೆ ಕಟ್ಟಡಗಳಲ್ಲಿ ನಡೆಯುವ ಶಾಲೆಗಳು 30 ವರ್ಷಗಳ ನೋಂದಾಯಿತ ಬಾಡಿಗೆ ಕರಾರು ಪತ್ರ ಹೊಂದಿರಬೇಕು ಎಂಬ ನಿಯಮಕ್ಕೆ ಮಂಡಳಿ ಆಕ್ಷೇಪ ವ್ಯಕ್ತಪಡಿಸಿದೆ. ಸಾಮಾನ್ಯವಾಗಿ ಮನೆ ಮಾಲೀಕರು ಇಷ್ಟು ದೀರ್ಘಾವಧಿಯ ಬಾಡಿಗೆ ಕರಾರು ಮಾಡಿಕೊಳ್ಳಲು ಒಪ್ಪುವುದಿಲ್ಲ. ಹೀಗಾಗಿ ಈ ನಿಯಮ ಪಾಲಿಸುವುದು ಬಹುತೇಕ ಶಾಲೆಗಳಿಗೆ ಅಸಾಧ್ಯವಾಗಿದೆ ಎಂದು ತಿಳಿಸಿದೆ.

ಇದರ ಜೊತೆಗೆ ತರಗತಿ ಕೊಠಡಿಗಳು ಕನಿಷ್ಠ 18 ಅಡಿ ಉದ್ದ ಮತ್ತು 20 ಅಡಿ ಅಗಲವಿರಬೇಕು. ಶಾಲೆಯ ಒಟ್ಟು ಜಾಗ ಕನಿಷ್ಠ 2,000 ಚದರ ಅಡಿ ಇರಬೇಕು ಎಂಬ ನಿಯಮಗಳನ್ನೂ ಪ್ರಶ್ನಿಸಿದೆ. ಸಣ್ಣ ಮಕ್ಕಳಿಗೆ ಮನೆಯ ವಾತಾವರಣದಂತೆ ಸುರಕ್ಷಿತವಾಗಿ ಕಲಿಯುವ ಅವಕಾಶ ಕಲ್ಪಿಸಬೇಕು ಎಂಬ ರಾಷ್ಟ್ರೀಯ ಶಿಕ್ಷಣ ನೀತಿಯ ಆಶಯಕ್ಕೆ ಇವು ವಿರುದ್ಧವಾಗಿವೆ ಎಂದು ಮಂಡಳಿ ಅಭಿಪ್ರಾಯಪಟ್ಟಿದೆ.

ಶಾಲೆಗಳಿಗೆ ಭೂ ಬಳಕೆ ಬದಲಾವಣೆ ಅನುಮತಿ (CLU) ಪಡೆಯುವುದೂ ದುಬಾರಿ ಮತ್ತು ಕಷ್ಟದ ಪ್ರಕ್ರಿಯೆಯಾಗಿದೆ. ಅಲ್ಲದೆ, ನೋಂದಣಿ ಜಾಲತಾಣವನ್ನು ಸಾರ್ವಜನಿಕರು ನೇರವಾಗಿ ಬಳಸಲು ಸಾಧ್ಯವಾಗುತ್ತಿಲ್ಲ. ಬ್ಲಾಕ್ ಶಿಕ್ಷಣಾಧಿಕಾರಿಗಳ ಕಚೇರಿ ಮೂಲಕವೇ ಪ್ರವೇಶ ಪಡೆಯಬೇಕಾದ ಸ್ಥಿತಿ ಇದೆ ಎಂದು ಆರೋಪಿಸಿದೆ.

ಈ ಶಾಲೆಗಳು ಮುಚ್ಚಿದರೆ ಶಿಕ್ಷಕಿಯರು, ಆಯಾಗಳು ಮತ್ತು ಇತರ ಮಹಿಳಾ ಸಿಬ್ಬಂದಿ ಉದ್ಯೋಗ ಕಳೆದುಕೊಳ್ಳಲಿದ್ದಾರೆ. ಕಡಿಮೆ ವೆಚ್ಚದಲ್ಲಿ ಮಕ್ಕಳನ್ನು ನೋಡಿಕೊಳ್ಳಲು ಪ್ರಿಸ್ಕೂಲ್‌ಗಳನ್ನು ಅವಲಂಬಿಸಿರುವ ದುಡಿಯುವ ತಾಯಂದಿರಿಗೂ ತೊಂದರೆಯಾಗಲಿದೆ. ದೊಡ್ಡ ಶಾಲೆಗಳ ಪೈಪೋಟಿ ಕಡಿಮೆಯಾದರೆ ಪ್ರಿಸ್ಕೂಲ್ ಶುಲ್ಕ ಶೇ.500ರವರೆಗೂ ಹೆಚ್ಚಾಗಬಹುದು ಎಂಬ ಆತಂಕವನ್ನೂ ಮಂಡಳಿ ವ್ಯಕ್ತಪಡಿಸಿದೆ.

ಸರ್ಕಾರ ತಕ್ಷಣವೇ ನಿಯಮಗಳ ಜಾರಿಯನ್ನು ತಡೆಹಿಡಿಯಬೇಕು. ಸಣ್ಣ ಪ್ರಿಸ್ಕೂಲ್‌ಗಳಿಗಾಗಿ ಪ್ರತ್ಯೇಕ ನಿಯಮ ರೂಪಿಸಲು ಉನ್ನತ ಮಟ್ಟದ ಸಮಿತಿ ರಚಿಸಬೇಕು. ಕಟ್ಟಡ, ಬಾಡಿಗೆ ಕರಾರು ಮತ್ತು ಭೂ ಬಳಕೆ ಬದಲಾವಣೆಯ ಷರತ್ತುಗಳನ್ನು ಮರುಪರಿಶೀಲಿಸಬೇಕು ಎಂದು ಒತ್ತಾಯಿಸಿದೆ.

ಶಿಕ್ಷಣ ಸಚಿವರು ಮತ್ತು ಸರ್ಕಾರ ಪ್ರಿಸ್ಕೂಲ್‌ಗಳ ಪ್ರತಿನಿಧಿಗಳೊಂದಿಗೆ ಮಾತುಕತೆ ನಡೆಸಿ, ಸಾವಿರಾರು ಶಾಲೆಗಳು ಮುಚ್ಚುವ ಮುನ್ನ ಸಮಸ್ಯೆ ಬಗೆಹರಿಸಬೇಕು ಎಂದು KCPS ಮನವಿ ಮಾಡಿದೆ.