ಮೈಕ್ರೋಸಾಫ್ಟ್‌ ಸೇವೆಗಳಲ್ಲಿ ಭಾರೀ ವ್ಯತ್ಯಯ: ಸರಿಪಡಿಸುವ ಪ್ರಯತ್ನಗಳು ನಿರೀಕ್ಷಿತ ಫಲಿತಾಂಶ ನೀಡುತ್ತಿಲ್ಲ ಎಂದು ಕೈ ಚೆಲ್ಲಿದ ಕಂಪನಿ

ಮೈಕ್ರೋಸಾಫ್ಟ್‌ನ ಹಲವು ಪ್ರಮುಖ ಸೇವೆಗಳಲ್ಲಿ ಉಂಟಾದ ಜಾಗತಿಕ ತಾಂತ್ರಿಕ ವ್ಯತ್ಯಯದಿಂದ ಕೋಟ್ಯಂತರ ಬಳಕೆದಾರರು ತೊಂದರೆ ಅನುಭವಿಸಿದ್ದಾರೆ. ಔಟ್‌ಲುಕ್‌, ಮೈಕ್ರೋಸಾಫ್ಟ್‌ ಟೀಮ್ಸ್‌ ಮತ್ತು ಕೃತಕ ಬುದ್ಧಿಮತ್ತೆ ಆಧಾರಿತ ಕೊಪೈಲಟ್‌ ಸೇವೆಗಳು ಸಂಪರ್ಕ ಸಮಸ್ಯೆ ಎದುರಿಸಿದ್ದು, ಸಮಸ್ಯೆ ಸರಿಪಡಿಸುವ ಪ್ರಯತ್ನಗಳು ನಿರೀಕ್ಷಿತ ಫಲಿತಾಂಶ ನೀಡುತ್ತಿಲ್ಲ ಎಂದು ಕಂಪನಿ ತಿಳಿಸಿದೆ.

ಮೈಕ್ರೋಸಾಫ್ಟ್‌ನ ಜಾಗತಿಕ ಸೇವೆಗಳಲ್ಲಿನ ವ್ಯತ್ಯಯದಿಂದ ಭಾರತ ಸೇರಿದಂತೆ ವಿಶ್ವದ ಹಲವು ದೇಶಗಳಲ್ಲಿ ಕಚೇರಿ ಕೆಲಸಗಳು ಮತ್ತು ಸಾರ್ವಜನಿಕ ಸೇವೆಗಳ ಮೇಲೆ ಪರಿಣಾಮ ಬೀರಿದೆ. ನವೆಂಬರ್‌ 12ರ ಗುರುವಾರದಿಂದ ಕಾಣಿಸಿಕೊಂಡಿರುವ ಈ ಸಮಸ್ಯೆ ಎಂಟು ಗಂಟೆಗಳಿಗೂ ಹೆಚ್ಚು ಕಾಲ ಮುಂದುವರಿದಿದ್ದು, ಡೌನ್‌ಡೆಟೆಕ್ಟರ್‌ ವೆಬ್‌ಸೈಟ್‌ ಪ್ರಕಾರ ಸುಮಾರು 74 ದೇಶಗಳಲ್ಲಿ ಬಳಕೆದಾರರು ತೊಂದರೆ ಎದುರಿಸಿದ್ದಾರೆ. ಗುರುವಾರ ಸಂಜೆ 6 ಗಂಟೆ ಜಿಎಂಟಿ ವೇಳೆಗೆ ಔಟ್‌ಲುಕ್‌ ಸಮಸ್ಯೆಗಳ ಕುರಿತು ಸುಮಾರು 1.40 ಲಕ್ಷ ದೂರುಗಳು ದಾಖಲಾಗಿದ್ದವು. ಇದು ಸಾಮಾನ್ಯ ಮಟ್ಟಕ್ಕಿಂತ 2,000 ಪಟ್ಟು ಹೆಚ್ಚಾಗಿದೆ ಎಂದು ವರದಿ ತಿಳಿಸಿದೆ.

ಸಮಸ್ಯೆಗೆ ಕಾರಣವೇನು?

ಮೈಕ್ರೋಸಾಫ್ಟ್‌ ತನ್ನ ಹಲವು ಪ್ರದೇಶಗಳ ಮೂಲಸೌಕರ್ಯಗಳಲ್ಲಿ ಉಂಟಾದ ಹೆಚ್ಚಿನ ಕಾರ್ಯಭಾರದ (Elevated Load) ಕಾರಣದಿಂದ ಸೇವೆಗಳಲ್ಲಿ ವ್ಯತ್ಯಯ ಉಂಟಾಗಿದೆ ಎಂದು ತಿಳಿಸಿದೆ. ಕೆಲವು ಸರ್ವರ್‌ಗಳು ಅನಿರೀಕ್ಷಿತವಾಗಿ ಲಭ್ಯವಿಲ್ಲದಿರುವುದರಿಂದ ಉಳಿದ ಸರ್ವರ್‌ಗಳ ಮೇಲಿನ ಒತ್ತಡ ಹೆಚ್ಚಾಗಿದೆ. ಇದರಿಂದ ಕೆಲವು ಸರ್ವರ್‌ಗಳು ಹೆಚ್ಚಿನ ಭಾರವನ್ನು ನಿಭಾಯಿಸಲು ಸಾಧ್ಯವಾಗದೆ ಸಮಸ್ಯೆ ಉಂಟಾಗಿದೆ ಎಂದು ಕಂಪನಿ ವಿವರಿಸಿದೆ.

ಸೇವೆಗಳ ಪುನರಾರಂಭ ಮತ್ತು ಸಮಸ್ಯೆ ಪರಿಹಾರಕ್ಕಾಗಿ ಕೈಗೊಂಡ ಕ್ರಮಗಳು ಆರಂಭದಲ್ಲಿ ಸಕಾರಾತ್ಮಕ ಫಲಿತಾಂಶ ನೀಡುತ್ತಿವೆ ಎಂದು ಮೈಕ್ರೋಸಾಫ್ಟ್‌ ಹೇಳಿತ್ತು. ಆದರೆ, ನಂತರದ ಪ್ರಕಟಣೆಯಲ್ಲಿ ಸಮಸ್ಯೆ ಸರಿಪಡಿಸುವ ಪ್ರಯತ್ನಗಳು ನಿರೀಕ್ಷೆಯಂತೆ ನಡೆಯುತ್ತಿಲ್ಲ ಎಂದು ಒಪ್ಪಿಕೊಂಡಿದೆ. ಹೆಚ್ಚು ಬಳಕೆದಾರರು ಸೇವೆಗಳಿಗೆ ಸಂಪರ್ಕಿಸಿದಾಗ ಪುನರಾರಂಭಗೊಂಡ ಕೆಲವು ಸೇವೆಗಳು ಮತ್ತೆ ಸ್ಥಗಿತಗೊಳ್ಳುವ ಸಾಧ್ಯತೆಯೂ ಇದೆ ಎಂದು ಕಂಪನಿ ಎಚ್ಚರಿಸಿದೆ.

ಔಟ್‌ಲುಕ್‌, ಟೀಮ್ಸ್‌ ಮತ್ತು ಕೊಪೈಲಟ್‌ ಮೇಲೆ ಪರಿಣಾಮ

ಮೈಕ್ರೋಸಾಫ್ಟ್‌ 365ರ ಭಾಗವಾಗಿರುವ ಔಟ್‌ಲುಕ್‌ ಇಮೇಲ್‌ ಸೇವೆ, ಎಕ್ಸ್‌ಚೇಂಜ್‌ ಆನ್‌ಲೈನ್‌, ಕ್ಯಾಲೆಂಡರ್‌ ಮತ್ತು ಕೆಲವು ಫೈಲ್‌ಗಳನ್ನು ವೀಕ್ಷಿಸುವ ಸೇವೆಗಳು ವ್ಯತ್ಯಯಕ್ಕೆ ಒಳಗಾಗಿವೆ. ಕಂಪನಿಯ ಕೃತಕ ಬುದ್ಧಿಮತ್ತೆ ವೇದಿಕೆಯಾದ ಕೊಪೈಲಟ್‌ ಕೂಡ ಸಮಸ್ಯೆ ಎದುರಿಸಿದೆ. ಮೈಕ್ರೋಸಾಫ್ಟ್‌ ಟೀಮ್ಸ್‌ ಸೇರಿದಂತೆ ಹಲವು ಸೇವೆಗಳಲ್ಲಿ ಸಂಪರ್ಕ ಸಮಸ್ಯೆಗಳು ವರದಿಯಾಗಿದ್ದರೂ, ಸಂದೇಶ ವಿನಿಮಯ ಮತ್ತು ಆನ್‌ಲೈನ್‌ ಸಭೆಗಳ ಸೇವೆಗಳು ಬಹುತೇಕ ಕಾರ್ಯನಿರ್ವಹಿಸುತ್ತಿದ್ದವು ಎಂದು ಕಂಪನಿ ತಿಳಿಸಿದೆ.

ವಿಶ್ವದಾದ್ಯಂತ 43 ಕೋಟಿಗೂ ಹೆಚ್ಚು ಜನರು ಮೈಕ್ರೋಸಾಫ್ಟ್‌ 365 ಅಪ್ಲಿಕೇಶನ್‌ಗಳನ್ನು ಬಳಸುತ್ತಿದ್ದಾರೆ. ಫಾರ್ಚೂನ್‌ 500 ಪಟ್ಟಿಯಲ್ಲಿರುವ ಶೇ 90ಕ್ಕೂ ಹೆಚ್ಚು ಕಂಪನಿಗಳು ಕೊಪೈಲಟ್‌ ಬಳಸುತ್ತಿವೆ ಎಂದು ಮೈಕ್ರೋಸಾಫ್ಟ್‌ ಹೇಳಿಕೊಂಡಿದೆ. ಹೀಗಾಗಿ ಈ ವ್ಯತ್ಯಯದ ಪರಿಣಾಮ ದೊಡ್ಡ ಪ್ರಮಾಣದಲ್ಲಿದೆ.

ಭಾರತ ಸೇರಿದಂತೆ ಹಲವು ದೇಶಗಳಲ್ಲಿ ವ್ಯತ್ಯಯ

ದೀಪಾವಳಿ ರಜೆಯ ಬಳಿಕ ಶುಕ್ರವಾರ ಬೆಳಿಗ್ಗೆ ಕೆಲಸಕ್ಕೆ ಮರಳಿದ ಭಾರತದ ಲಕ್ಷಾಂತರ ಉದ್ಯೋಗಿಗಳಿಗೆ ಮೈಕ್ರೋಸಾಫ್ಟ್‌ ಸೇವೆಗಳ ಸ್ಥಗಿತ ಅನಿರೀಕ್ಷಿತ ತೊಂದರೆ ಉಂಟುಮಾಡಿದೆ. ವಿಶೇಷವಾಗಿ ವೃತ್ತಿಪರ ಸಂವಹನಕ್ಕೆ ಪ್ರಮುಖವಾಗಿರುವ ಔಟ್‌ಲುಕ್‌ ಕಾರ್ಯನಿರ್ವಹಿಸದ ಕಾರಣ ಉದ್ಯೋಗಿಗಳು ಸಮಸ್ಯೆ ಎದುರಿಸಿದ್ದಾರೆ. ಈ ನಡುವೆ, ರಜೆ ಇನ್ನೂ ಮುಂದುವರಿಸಬಹುದೇ ಎಂಬ ಹಾಸ್ಯಮಯ ಪ್ರತಿಕ್ರಿಯೆಗಳು ಸಾಮಾಜಿಕ ಜಾಲತಾಣಗಳು ಮತ್ತು ಕಚೇರಿ ಗುಂಪುಗಳಲ್ಲಿ ಹರಿದಾಡಿವೆ ಎಂದು ಬಿಬಿಸಿ ವರದಿ ಮಾಡಿದೆ.

ಸಿಂಗಾಪುರದಲ್ಲಿ ಕೆಲವು ಸರ್ಕಾರಿ ವ್ಯವಸ್ಥೆಗಳ ಮೇಲೂ ವ್ಯತ್ಯಯದ ಪರಿಣಾಮ ಬೀರಿದೆ. ಆದರೆ ತುರ್ತು ಸೇವೆಗಳು ಎಂದಿನಂತೆ ಕಾರ್ಯನಿರ್ವಹಿಸುತ್ತಿವೆ ಎಂದು ಅಲ್ಲಿನ ಅಧಿಕಾರಿಗಳು ತಿಳಿಸಿದ್ದಾರೆ. ಆಸ್ಟ್ರೇಲಿಯಾದ ನ್ಯೂ ಸೌತ್‌ ವೇಲ್ಸ್‌ ಮತ್ತು ನಾರ್ದರ್ನ್‌ ಟೆರಿಟರಿಯಲ್ಲಿಯೂ ಕೆಲವು ಸಾರ್ವಜನಿಕ ಸೇವೆಗಳು ಅಸ್ತವ್ಯಸ್ತಗೊಂಡಿವೆ. ಕೆಲವು ಆಸ್ಪತ್ರೆಗಳಲ್ಲಿ ಆಡಳಿತಾತ್ಮಕ ಕೆಲಸಗಳಿಗೆ ತೊಂದರೆಯಾಗಿದ್ದರೂ, ರೋಗಿಗಳ ಚಿಕಿತ್ಸೆಗೆ ಯಾವುದೇ ಅಡ್ಡಿಯಾಗಿಲ್ಲ ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.

ಸೈಬರ್‌ ದಾಳಿಯಲ್ಲ ಎಂದ ಮೈಕ್ರೋಸಾಫ್ಟ್‌

ಈ ವ್ಯತ್ಯಯಕ್ಕೆ ಸೈಬರ್‌ ದಾಳಿ ಅಥವಾ ಹ್ಯಾಕಿಂಗ್‌ ಕಾರಣವಲ್ಲ ಎಂದು ಮೈಕ್ರೋಸಾಫ್ಟ್‌ ಕಾರ್ಯನಿರ್ವಾಹಕ ಚಾರ್ಲ್ಸ್‌ ಲಮಾನ್ನಾ ಸ್ಪಷ್ಟಪಡಿಸಿದ್ದಾರೆ. ಗ್ರಾಹಕರಿಗೆ ಉಂಟಾದ ತೊಂದರೆಗೆ ವಿಷಾದ ವ್ಯಕ್ತಪಡಿಸಿರುವ ಅವರು, ಸಮಸ್ಯೆ ಪರಿಹರಿಸಲು ಕಂಪನಿ ಕಾರ್ಯನಿರ್ವಹಿಸುತ್ತಿದೆ ಎಂದಿದ್ದಾರೆ.

ಆದರೆ, ಸೈಬರ್‌ ದಾಳಿ ಇಲ್ಲದಿದ್ದರೆ ಇದು ತೀವ್ರ ನಿರ್ವಹಣಾ ವೈಫಲ್ಯವಾಗಿರಬಹುದು ಎಂದು ನ್ಯೂಜಿಲೆಂಡ್‌ನ ತಂತ್ರಜ್ಞಾನ ವಿಶ್ಲೇಷಕ ಪಾಲ್‌ ಸ್ಪೇನ್‌ ಅಭಿಪ್ರಾಯಪಟ್ಟಿದ್ದಾರೆ. ವ್ಯತ್ಯಯ 24 ಗಂಟೆಗಳವರೆಗೆ ಮುಂದುವರಿದರೆ ಜಾಗತಿಕವಾಗಿ ಕೋಟ್ಯಂತರ ಡಾಲರ್‌ ಮೌಲ್ಯದ ವ್ಯವಹಾರಗಳಿಗೆ ಹೊಡೆತ ಬೀಳಬಹುದು ಎಂದು ಅವರು ಎಚ್ಚರಿಸಿದ್ದಾರೆ.

ಮೈಕ್ರೋಸಾಫ್ಟ್‌ ಸೇವೆಗಳ ಮೇಲಿನ ಅವಲಂಬನೆ ಎಷ್ಟಿದೆ ಎಂಬುದನ್ನು ಈ ಘಟನೆ ಮತ್ತೊಮ್ಮೆ ತೋರಿಸಿದೆ. ಸೇವೆಗಳು ಸ್ಥಗಿತಗೊಂಡಾಗ ಪರ್ಯಾಯ ಸಂವಹನ ವ್ಯವಸ್ಥೆ ಮತ್ತು ತುರ್ತು ಕಾರ್ಯಯೋಜನೆಗಳನ್ನು ಹೊಂದಿರುವುದು ಸಂಸ್ಥೆಗಳಿಗೆ ಅಗತ್ಯ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಈ ಸುದ್ದಿಯನ್ನೂ ಓದಿ: