ಗಣರಾಜ್ಯೋತ್ಸವದ ಸಂದರ್ಭದಲ್ಲಿ ತಮಿಳುನಾಡು ಉಪಮುಖ್ಯಮಂತ್ರಿ ಉದಯನಿಧಿ ಸ್ಟಾಲಿನ್ ಅವರು ಹಿಂದಿ ಹೇರಿಕೆಯ ವಿರುದ್ಧ ಮತ್ತೆ ಧ್ವನಿ ಎತ್ತಿದ್ದು, “ಹಿಂದಿಯು ಅನೇಕ ಮಾತೃಭಾಷೆಗಳನ್ನು ನುಂಗಿಹಾಕುವ ಭಾಷೆಯಾಗಿ ಮಾರ್ಪಟ್ಟಿದೆ” ಎಂದು ಹೇಳಿದ್ದಾರೆ. ಈ ಹೇಳಿಕೆಯು ಡಿಎಂಕೆ ಮತ್ತು ಬಿಜೆಪಿ ನಡುವೆ ತೀವ್ರ ವಾಕ್ಸಮರಕ್ಕೆ ಕಾರಣವಾಗಿದೆ.
ಚೆನ್ನೈ ಈಶಾನ್ಯ ಜಿಲ್ಲಾ ಡಿಎಂಕೆ ಸಭೆಯಲ್ಲಿ ಮಾತನಾಡಿದ ಉದಯನಿಧಿ, ಮಾತೃಭಾಷೆಯ ರಕ್ಷಣೆಗಾಗಿ ಪ್ರಾಣವನ್ನೇ ತ್ಯಾಗ ಮಾಡಿದ ಇತಿಹಾಸ ತಮಿಳರಿಗಿದೆ ಎಂದರು. “ಹರಿಯಾಣ, ಬಿಹಾರ ಮತ್ತು ಉತ್ತರ ಪ್ರದೇಶದಂತಹ ರಾಜ್ಯಗಳಲ್ಲಿ ಮಾತನಾಡುತ್ತಿದ್ದ ಹಲವು ಮಾತೃಭಾಷೆಗಳು ಹಿಂದಿಯ ಪ್ರವೇಶದ ನಂತರ ಕ್ರಮೇಣ ಅವನತಿ ಹೊಂದಿದವು. ಹಿಂದಿಯು ಅನೇಕ ಮಾತೃಭಾಷೆಗಳನ್ನು ನುಂಗಿಹಾಕುವ ಭಾಷೆಯಾಗಿದೆ” ಎಂದು ಅವರು ಅಭಿಪ್ರಾಯಪಟ್ಟರು.
ಇದೇ ಕಾರಣಕ್ಕಾಗಿ ತಮಿಳುನಾಡು ಹಿಂದಿ ಹೇರಿಕೆಯನ್ನು ಸತತವಾಗಿ ವಿರೋಧಿಸುತ್ತಿದೆ ಮತ್ತು ಈಗ ಇತರ ರಾಜ್ಯಗಳು ಕೂಡ ತಮಿಳುನಾಡಿನ ನಿಲುವನ್ನು ಅನುಸರಿಸಲು ಆರಂಭಿಸಿವೆ ಎಂದರು. ಹಿಂದಿ ಹೇರಿಕೆ, ರಾಷ್ಟ್ರೀಯ ಶಿಕ್ಷಣ ನೀತಿ (NEP) ಮತ್ತು ಕೇಂದ್ರದ ಯಾವುದೇ ಬಲವಂತದ ಕ್ರಮಗಳನ್ನು ತಮಿಳುನಾಡು ಬಲವಾಗಿ ವಿರೋಧಿಸುತ್ತದೆ ಎಂದು ಅವರು ಹೇಳಿದರು.
ಡಿಎಂಕೆ ಸಮರ್ಥನೆ:
ಉದಯನಿಧಿ ಹೇಳಿಕೆಯನ್ನು ಬೆಂಬಲಿಸಿದ ಡಿಎಂಕೆ ವಕ್ತಾರ ಸರವಣನ್ ಅಣ್ಣಾದೊರೈ, “ಒಡಿಯಾ, ಬಿಹಾರಿ, ರಾಜಸ್ಥಾನಿ, ಗುಜರಾತಿ ಭಾಷೆಗಳು ಶ್ರೀಮಂತ ಸಾಹಿತ್ಯವನ್ನು ಹೊಂದಿದ್ದವು. ಆದರೆ ಹಿಂದಿಯನ್ನು ಅಳವಡಿಸಿಕೊಂಡ ನಂತರ ಅವು ತಮ್ಮ ಪ್ರಭಾವ ಕಳೆದುಕೊಂಡಿವೆ. ಹಿಂದಿ ಹೇರಿಕೆಯು ಪ್ರಾದೇಶಿಕ ಭಾಷಿಕರನ್ನು ಎರಡನೇ ದರ್ಜೆಯ ಪ್ರಜೆಗಳನ್ನಾಗಿ ಮಾಡುತ್ತಿದೆ ಮತ್ತು ಸಾಂಸ್ಕೃತಿಕ ಅಸ್ಮಿತೆಯನ್ನು ಕಸಿದುಕೊಳ್ಳುತ್ತಿದೆ,” ಎಂದು ಆರೋಪಿಸಿದರು. ಕೇಂದ್ರ ಸರ್ಕಾರದ ಹುದ್ದೆಗಳಿಗೆ ಕೇವಲ ಇಂಗ್ಲಿಷ್ ಮತ್ತು ಹಿಂದಿಗೆ ಆದ್ಯತೆ ನೀಡುವ ಮೂಲಕ ಕನ್ನಡ, ತೆಲುಗು, ತಮಿಳು, ಮಲಯಾಳಂ ಭಾಷಿಕರಿಗೆ ಅನ್ಯಾಯ ಮಾಡಲಾಗುತ್ತಿದೆ ಎಂದು ಅವರು ಹೇಳಿದರು.
ಬಿಜೆಪಿ ಆಕ್ರೋಶ:
ಈ ಹೇಳಿಕೆಯನ್ನು ತೀವ್ರವಾಗಿ ಖಂಡಿಸಿರುವ ಕೇಂದ್ರ ಸಚಿವ ಎಲ್. ಮುರುಗನ್, ಉದಯನಿಧಿ ಮತ್ತು ಅವರ ಕುಟುಂಬದವರು ಯಾವಾಗಲೂ ಪ್ರತ್ಯೇಕ ದೇಶ ಮತ್ತು ಪ್ರತ್ಯೇಕ ಭಾಷೆಯ ಬಗ್ಗೆ ಮಾತನಾಡುತ್ತಾರೆ ಎಂದು ಆರೋಪಿಸಿದರು. ಪ್ರಧಾನಿ ಮೋದಿ ಅವರು ‘ಕಾಶಿ ತಮಿಳು ಸಂಗಮ’ದಂತಹ ಕಾರ್ಯಕ್ರಮಗಳ ಮೂಲಕ ತಮಿಳು ಭಾಷೆಯನ್ನು ಎಲ್ಲೆಡೆ ಉತ್ತೇಜಿಸುತ್ತಿದ್ದಾರೆ. ಆದರೆ ತಮಿಳು ಭಾಷೆಯ ರಕ್ಷಕರು ಎಂದು ಹೇಳಿಕೊಳ್ಳುವ ಡಿಎಂಕೆ ಸರ್ಕಾರ ತಮಿಳು ಜನರಿಗಾಗಿ ಏನನ್ನೂ ಮಾಡುತ್ತಿಲ್ಲ ಎಂದು ಟೀಕಿಸಿದರು. ಇದು ಡಿಎಂಕೆಯ ಸುಳ್ಳು ಪ್ರಚಾರವಾಗಿದ್ದು, ಉದಯನಿಧಿ ತಮ್ಮ ಹೇಳಿಕೆಗೆ ಕ್ಷಮೆಯಾಚಿಸಬೇಕು ಎಂದು ಅವರು ಆಗ್ರಹಿಸಿದರು.
