ವಾಷಿಂಗ್ಟನ್: ಇರಾನ್ ವಿರುದ್ಧದ ಮಿಲಿಟರಿ ಕಾರ್ಯಾಚರಣೆ ಮುಂದುವರಿಯಲಿದೆ ಎಂದು ಘೋಷಿಸಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಆ ದೇಶವನ್ನು ‘ಶಿಲಾಯುಗ’ಕ್ಕೆ ತಳ್ಳುವುದಾಗಿ ಎಚ್ಚರಿಕೆ ನೀಡಿದ್ದಾರೆ. ಬುಧವಾರ ವೈಟ್ ಹೌಸ್ನಿಂದ ಭಾಷಣ ಮಾಡಿದ ಅವರು, ಫೆಬ್ರವರಿ 28 ರಂದು ಆರಂಭವಾದ ಈ ಸಮರವು ಶೀಘ್ರದಲ್ಲೇ ಮುಕ್ತಾಯಗೊಳ್ಳಲಿದೆ. ಆದರೆ ಮುಂಬರುವ ಎರಡು-ಮೂರು ವಾರಗಳು ಇರಾನ್ ಪಾಲಿಗೆ “ಅತ್ಯಂತ ಕಠಿಣ”ವಾಗಿರಲಿವೆ ಎಂದು ಗುಡುಗಿದ್ದಾರೆ.
ಒಪ್ಪಂದಕ್ಕೆ ಬರದಿದ್ದರೆ ಇರಾನ್ನ ವಿದ್ಯುತ್ ಉತ್ಪಾದನಾ ಕೇಂದ್ರಗಳು ಸೇರಿದಂತೆ ಪ್ರಮುಖ ಗುರಿಗಳ ಮೇಲೆ ದಾಳಿ ನಡೆಸಲಾಗುವುದು ಎಂದು ಟ್ರಂಪ್ ತಿಳಿಸಿದ್ದಾರೆ. ಇದೇ ವೇಳೆ ಬ್ರಿಟನ್ ಸೇರಿದಂತೆ ಮಿತ್ರ ರಾಷ್ಟ್ರಗಳ ಕುರಿತೂ ಅವಹೇಳನಕಾರಿಯಾಗಿ ಮಾತನಾಡಿರುವ ಅವರು, “ನಿಮ್ಮ ಬಳಿ ಹಡಗುಗಳಿಲ್ಲ, ನೀವು ಯಾವುದಕ್ಕೂ ಪ್ರಯೋಜನವಿಲ್ಲದವರು” ಎಂದು ಬ್ರಿಟನ್ ಅನ್ನು ಟೀಕಿಸಿರುವುದು ಜಾಗತಿಕ ರಾಜಕೀಯ ವಲಯದಲ್ಲಿ ಆಶ್ಚರ್ಯ ಮೂಡಿಸಿದೆ.
ಅಮೆರಿಕದ ಜನತೆಗೆ ಇರಾನ್ ಅಧ್ಯಕ್ಷರ ಬಹಿರಂಗ ಪತ್ರ
ಇತ್ತ ಇರಾನ್ ಅಧ್ಯಕ್ಷ ಮಸೂದ್ ಪೆಜೆಶ್ಕಿಯಾನ್ ಅಮೆರಿಕದ ಜನತೆಗೆ ಬಹಿರಂಗ ಪತ್ರ ಬರೆದಿದ್ದಾರೆ. “ಇರಾನ್ ಜನರಿಗೆ ಅಮೆರಿಕ, ಯುರೋಪ್ ಅಥವಾ ನೆರೆಯ ದೇಶಗಳ ಜನರ ಬಗ್ಗೆ ಯಾವುದೇ ಶತ್ರುತ್ವವಿಲ್ಲ. ನಾವು ಮಾಡುತ್ತಿರುವುದು ಕಾನೂನುಬದ್ಧ ಆತ್ಮರಕ್ಷಣೆ ಮಾತ್ರವೇ ಹೊರತು ಆಕ್ರಮಣವಲ್ಲ,” ಎಂದು ಪತ್ರದಲ್ಲಿ ಸ್ಪಷ್ಟಪಡಿಸಿದ್ದಾರೆ. ಟ್ರಂಪ್ ಅವರ ಈ ನೀತಿಗಳು ನಿಜವಾಗಿಯೂ “ಅಮೆರಿಕ ಫಸ್ಟ್” ಆಗಿದೆಯೇ ಎಂದು ಯೋಚಿಸಿ ಎಂದು ಅವರು ಅಮೆರಿಕನ್ನರಿಗೆ ಕರೆ ನೀಡಿದ್ದಾರೆ.
ಇರಾನ್ನ ಅತಿ ಎತ್ತರದ ಸೇತುವೆಯ ಮೇಲೆ ದಾಳಿ
ಟ್ರಂಪ್ ಅವರ ಹೇಳಿಕೆಯ ಬೆನ್ನಲ್ಲೇ ಇರಾನ್ ಮೇಲೆ ವೈಮಾನಿಕ ದಾಳಿಗಳು ತೀವ್ರಗೊಂಡಿವೆ. ಇರಾನ್ ರಾಜಧಾನಿ ಟೆಹ್ರಾನ್ ಅನ್ನು ಪಶ್ಚಿಮದ ನಗರ ಕರಾಜ್ಗೆ ಸಂಪರ್ಕಿಸುವ ಬಿ1 (B1) ರಾಷ್ಟ್ರೀಯ ಹೆದ್ದಾರಿಯ ಸೇತುವೆಯ ಮೇಲೆ ಗುರುವಾರ ದಾಳಿ ನಡೆದಿದೆ. ಪಶ್ಚಿಮ ಏಷ್ಯಾದಲ್ಲೇ ಅತಿ ಎತ್ತರದ ಸೇತುವೆ ಎಂದು ಗುರುತಿಸಲ್ಪಟ್ಟಿದ್ದ ಇದನ್ನು ಕಳೆದ ತಿಂಗಳಷ್ಟೇ ಉದ್ಘಾಟಿಸಲಾಗಿತ್ತು. ದಾಳಿಯಿಂದಾಗಿ ಅನೇಕರು ಗಾಯಗೊಂಡಿದ್ದು, ಕರಾಜ್ನ ಹಲವು ಭಾಗಗಳಲ್ಲಿ ವಿದ್ಯುತ್ ಸಂಪರ್ಕ ಕಡಿತಗೊಂಡಿದೆ ಎಂದು ಇರಾನ್ ಮಾಧ್ಯಮಗಳು ವರದಿ ಮಾಡಿವೆ.
