ಜಗತ್ತಿನುದ್ದಗಲಕ್ಕೂ ಇಂದು ಕಾರ್ಮಿಕರ ದಿನಾಚರಣೆಯನ್ನು ಆಚರಿಸಲಾಗುತ್ತಿದೆ. ಎಲ್ಲ ಶ್ರಮಜೀವಿಗಳಿಗೆ ಕಾರ್ಮಿಕ ದಿನಾಚರಣೆಯ ಶುಭಾಶಯಗಳು. ಈ ಸಂದರ್ಭದಲ್ಲಿ ಮಹಿಳೆ, ದುಡಿಮೆ, ಶೋಷಣೆ ಬದಲಾಗುತ್ತಿರುವ ಚಹರೆಗಳು ಮತ್ತು ಈ ಎಲ್ಲದರ ಮೂಲದಲ್ಲಿ ನಿಂತಿರುವ ಲಿಂಗತಾರತಮ್ಯದ ಬುನಾದಿಯ ಮೇಲೆ ಪಕ್ಷಿನೋಟ ಬೀರಿದ್ದಾರೆ ಹೋರಾಟಗಾರ್ತಿ ಮಲ್ಲಿಗೆ ಸಿರಿಮನೆ.
ಇಂದು ಇಡೀ ಜಗತ್ತು ಉತ್ಪಾದನೆಯ ‘ಸ್ತ್ರೀಕರಣ’ದ (ಫೆಮಿನೈಸೇಶನ್) ಹತ್ತು ಹಲವು ಆಯಾಮಗಳನ್ನು ಕಾಣುತ್ತಿದೆ. ಈ ಬಗ್ಗೆ ಅನೇಕ ಅಧ್ಯಯನಗಳು ನಡೆದಿವೆ, ಗ್ರಾಮೀಣ ಕೃಷಿ ಮತ್ತು ಕೃಷಿ ಆಧಾರಿತ ಉದ್ದಿಮೆಗಳ ಕ್ಷೇತ್ರದೊಳಗೆ ಈ ಸ್ತ್ರೀಕರಣ ಹೇಗೆ ನಡೆಯುತ್ತಿದೆ ಎಂಬುದರ ಬಗ್ಗೆಯೂ ಸಾಕಷ್ಟು ಅಧ್ಯಯನಗಳು ನಡೆದಿವೆ. ಇನ್ನು ಇನ್ನಿತರ ಕೈಗಾರಿಕಾ ಉತ್ಪಾದನೆಯ ಕ್ಷೇತ್ರದಲ್ಲೂ ದಿನೇ ದಿನೇ ಮಹಿಳೆಯರ ಸಂಖ್ಯೆ ವೇಗವಾಗಿ ಹೆಚ್ಚುತ್ತಿದೆ. ಗಾರ್ಮೆಂಟ್ಸ್ ಉದ್ದಿಮೆ, ಶಿಕ್ಷಣ ಮತ್ತು ಆರೋಗ್ಯ ಕ್ಷೇತ್ರ, ಪ್ರವಾಸೋದ್ಯಮ ಮತ್ತು ಮನರಂಜನಾ ಉದ್ದಿಮೆ, ಹಲವು ಬಗೆಯ ಸೇವಾ ಕ್ಷೇತ್ರಗಳಲ್ಲಿ ಉತ್ಪಾದನೆಯು ಅತಿದೊಡ್ಡ ಪ್ರಮಾಣದಲ್ಲಿ ಮಹಿಳೆಯರ ಶ್ರಮಶಕ್ತಿಯನ್ನೇ ಆಧರಿಸಿವೆ. ಹೀಗೆ ಮಹಿಳೆಯರ ದುಡಿಮೆ ಕೀಲಕ ಪಾತ್ರ ವಹಿಸುವ ದಿಕ್ಕಿಗೆ ಸಾಗುತ್ತಿರುವ ಅದೇ ಸಂದರ್ಭದಲ್ಲಿ ಮಹಿಳೆಯರ ಆದಾಯ ಮತ್ತು ಬದುಕಿನ ಮಟ್ಟ ಅದೇ ಮಟ್ಟದಲ್ಲಿ ಏರಿಕೆಯ ಗತಿಯಲ್ಲಿದೆಯೇ ಎಂದರೆ ಅದಕ್ಕೆ ತದ್ವಿರುದ್ಧವಾದ ಚಿತ್ರಣ ಕಾಣಬರುತ್ತದೆ.
ಮಹಿಳೆಯರ ಕೆಲಸಕ್ಕೆ ದೊರೆಯುವ ವೇತನದಲ್ಲಿರುವ ಘೋರವಾದ ತಾರತಮ್ಯವು ಕಣ್ಣಿಗೆ ರಾಚುವಷ್ಟು ನಿಚ್ಚಳವಾಗಿದ್ದರೂ ಅದು ಮುಖ್ಯವಾಹಿನಿಯಲ್ಲಿ ದೊಡ್ಡ ಸುದ್ದಿಯಾಗುವುದೇ ಇಲ್ಲ. ಈ ವಿಷಯ ಜಾಗತಿಕವಾಗಿ ದೊಡ್ಡ ಸುದ್ದಿಯಾಗುವಂತಹ ಒಂದು ಸಂದರ್ಭ ಬಂದಿತ್ತು.. ಬಿಬಿಸಿಯ ಕೆಲವು ಹೈ ಪ್ರೊಫೈಲ್ ಮಹಿಳೆಯರು ಅನುಭವಿಸಿದ ಲಿಂಗ ವೇತನದ ಅಂತರವನ್ನು ತೋರಿಸುವ ವೇತನ ಅಂಕಿಅಂಶಗಳು ಪುರುಷ ಮತ್ತು ಮಹಿಳಾ ನಿರೂಪಕರ ನಡುವೇ ಜಗತ್ತಿನ ಖ್ಯಾತ ಸಂಸ್ಥೆಯೊಂದರೊಳಗಿರುವ ಪುರುಷಪರತೆಯ ಮತ್ತು ಮಹಿಳಾ ತಾರತಮ್ಯದ ಬೇರುಗಳನ್ನು ಬಹಿರಂಗಪಡಿಸಿವೆ. ಎಲ್ಲಾ ಕಾರ್ಮಿಕ ವಲಯಗಳಲ್ಲಿ ಕಂಡುಬರುವ ಈ ವೇತನದ ಅಂತರವನ್ನು ಹೆಚ್ಚಿಸುವ ಆಳವಾದ ತಾರತಮ್ಯವು ಮಹಿಳಾ ಕಾರ್ಮಿಕರ ಶೋಷಣೆಗೆ ಕಾರಣವಾಗುತ್ತದೆ.
ಬ್ರಿಟನ್‍ನ ಕಾರ್ಮಿಕ ಸಂಘಟನೆ TUC ಯ ಇತ್ತೀಚಿನ ಸಂಶೋಧನೆಯು ಜಗತ್ತಿನ ಬೇರೆ ಬೇರೆ ಭಾಗಗಳಲ್ಲಿ ಸಮೀಕ್ಷೆಗೆ ಒಳಗಾದ ಅರ್ಧಕ್ಕಿಂತ ಹೆಚ್ಚು ಮಹಿಳಾ ಕೆಲಸಗಾರರು ಕೆಲವು ರೀತಿಯ ಲೈಂಗಿಕ ಕಿರುಕುಳವನ್ನು ಅನುಭವಿಸಿದ್ದಾರೆ ಮತ್ತು ಹತ್ತರಲ್ಲಿ ಒಬ್ಬರಿಗಿಂತ ಹೆಚ್ಚು ಅನಗತ್ಯ ಲೈಂಗಿಕ ಸಂಪರ್ಕವನ್ನು ಅನುಭವಿಸಿದ್ದಾರೆ ಎಂದು ಕಂಡುಹಿಡಿದಿದೆ. ಆತಿಥ್ಯ ವಲಯದ ಮಹಿಳೆಯರು ಲೈಂಗಿಕ ಕಿರುಕುಳವನ್ನು ಅನುಭವಿಸುವ ಸಾಧ್ಯತೆ ಹೆಚ್ಚು, 67% ಮಹಿಳೆಯರು ಸಹೋದ್ಯೋಗಿಗಳು, ವ್ಯವಸ್ಥಾಪಕರುಗಳು ಗ್ರಾಹಕರು ಮತ್ತು ಹೋಟೆಲ್ ಅತಿಥಿಗಳಿಂದ ಕೆಲವು ರೀತಿಯ ಲೈಂಗಿಕ ಕಿರುಕುಳವನ್ನು ವರದಿ ಮಾಡಿದ್ದಾರೆ. ಈ ವಲಯದ ಮಹಿಳೆಯರು ಸ್ನೇಹಪರರು, ಅನುಸರಣೆ ಮತ್ತು ಅಧೀನತೆ ಹೊಂದಿರುತ್ತಾರೆ ಎಂಬ ಸಾಮಾನ್ಯ ನಿರೀಕ್ಷೆಗಳು ಲೈಂಗಿಕ ಕಿರುಕುಳವನ್ನು ವಿಶೇಷವಾಗಿ ಸಮಸ್ಯಾತ್ಮಕವಾಗಿಸುತ್ತದೆ ಮತ್ತು ಮಹಿಳಾ ಕಾರ್ಮಿಕರಿಗೆ ಕಷ್ಟವಾಗುತ್ತದೆ.
ಒಬ್ಬ ಮಹಿಳಾ ಕೆಲಸಗಾರ್ತಿಯು ಮಕ್ಕಳನ್ನು ಅಥವಾ ಅನಾರೋಗ್ಯ ಅಥವಾ ವಯಸ್ಸಾದ ಸಂಬಂಧಿಕರನ್ನು ನೋಡಿಕೊಳ್ಳಲು ಅಗತ್ಯವಿರುವ ಸಮಯದ ಹೊಂದಾಣಿಕೆಗಾಗಿ ಕಳಪೆ ಕೆಲಸದ ಪರಿಸ್ಥಿತಿಗಳು ಅಥವಾ ಅರ್ಹತೆಗಳನ್ನು ಸ್ವೀಕರಿಸಲು ಒತ್ತಾಯಕ್ಕೊಳಪಡುತ್ತಾಳೆ. ಉದಾಹರಣೆಗೆ ಒಬ್ಬ ಮಹಿಳಾ ಕೆಲಸಗಾರ್ತಿಯು ತನ್ನ ಕೌಟುಂಬಿಕ ಆರೈಕೆಯ ಬೇಡಿಕೆಗಳಿಗೆ ಸರಿಹೊಂದುವಂತೆ ಕೆಲಸ ಮಾಡುವ ಸಲುವಾಗಿ ಕಡಿಮೆ ಸಂಬಳದ ಅಥವಾ ಅವಳ ಕೌಶಲ್ಯ ಮಟ್ಟಕ್ಕಿಂತ ಕಡಿಮೆ ಇರುವ ಅರೆಕಾಲಿಕ ಕೆಲಸವನ್ನು ತೆಗೆದುಕೊಳ್ಳಬೇಕಾಗಬಹುದು. ಅದೇ ಸಮಯದಲ್ಲಿ, ಅನಿರೀಕ್ಷಿತ ಮತ್ತು ಅಸುರಕ್ಷಿತವಾದ ಕೆಲಸವು ಚಿಕ್ಕ ಮಕ್ಕಳಿರುವ ಮಹಿಳೆಯರಿಗೆ ಸಮಸ್ಯಾತ್ಮಕವಾಗಬಹುದು. ಸರಿಸುಮಾರು 66% ಒಂಟಿ ಪೋಷಕರು ಕೆಲಸದಲ್ಲಿದ್ದಾರೆ ಮತ್ತು ಆ ಒಂಟಿ ಪೋಷಕರಲ್ಲಿ ಬಹುಪಾಲು ಮಹಿಳೆಯರು. ಅವರ ಕುಟುಂಬವನ್ನು ಬೆಂಬಲಿಸಲು ಸ್ಥಿರವಾದ ಆದಾಯದ ಅಗತ್ಯವಿರುತ್ತದೆ. ಒಂದು ಕುಟುಂಬವು ಉಳಿವಿಗಾಗಿ ಮಹಿಳಾ ಕಾರ್ಮಿಕರ ಉದ್ಯೋಗವನ್ನು ಅವಲಂಬಿಸಿರುವ ಸಂದರ್ಭದಲ್ಲಿ, ಮಹಿಳೆಯರು ದುರುಪಯೋಗದ ಕೆಲಸದ ಪರಿಸ್ಥಿತಿಗಳನ್ನು ತೊರೆಯುವ ಅಥವಾ ಸವಾಲು ಮಾಡುವ ಸಾಧ್ಯತೆ ಕಡಿಮೆ.
ಕೃಷಿ ಕ್ಷೇತ್ರದ ಸ್ತ್ರೀಕರಣ- ‘ನಾವು ಕೃಷಿಕರಲ್ಲದಿದ್ದರೆ ಮತ್ತೇನು?’
ಈಚೆಗೆ ಜಗತ್ತಿನ ಗಮನ ಸೆಳೆದ, ದೆಹಲಿಯಲ್ಲಿ ಒಂದು ವರ್ಷ ನಿರಂತರವಾಗಿ ನಡೆದ ಚಾರಿತ್ರಿಕ ರೈತಾಂದೋಲನವು ಪುರುಷ ‘ರೈತ’ರನ್ನು ಮಾತ್ರವಲ್ಲ ‘ಮಹಿಳಾ ರೈತ’ರನ್ನೂ ಹೋರಾಟದ ಅಂಗಳಕ್ಕೆ ಕರೆತಂದಿತು. ಈ ಆಂದೋಲನದ ಸಂದರ್ಭದಲ್ಲಿ ಅನೇಕ ವಿದೇಶೀ ಪತ್ರಿಕೆಗಳೂ ಕೂಡಾ ಅದರ ಬಗ್ಗೆ ಮುಖಪುಟ ಲೇಖನಗಳನ್ನು ಪ್ರಕಟಿಸಿದವು. ‘ಟೈಮ್ಸ್’ ಪತ್ರಿಕೆಯ ಬರಹದಲ್ಲಿ ಮಹಿಳಾ ಕೃಷಿಕರು ಈ ಆಂದೋಲನದಲ್ಲಿ ಸಕ್ರಿಯವಾಗಿ ಪಾಲ್ಗೊಂಡ ಸಂದರ್ಭವನ್ನು ವಿವರಿಸುತ್ತಾ ರೈತ ಮಹಿಳೆಯರು ಎತ್ತಿದ ಪ್ರಶ್ನೆಯನ್ನು ಮುದ್ರಿಸಲಾಗಿತ್ತು- ‘ನಾವು ಕೃಷಿಕರಲ್ಲದಿದ್ದರೆ ಮತ್ತೇನು?’ ಇಂದಿನ ಭಾರತ ದೇಶದ ಕೃಷಿ ಕ್ಷೇತ್ರದ ವಾಸ್ತವಗಳನ್ನು ಗಮನಿಸಿದಾಗ ಮತ್ತೂ ಒಂದು ಪ್ರಶ್ನೆಯನ್ನು ನಾವು ಇದಕ್ಕೆ ಬೆನ್ನುಡಿಯಾಗಿ ಮುಂದಿಡಬಹುದು- ‘ಮಹಿಳೆಯರು ಕೃಷಿಕರಲ್ಲದಿದ್ದರೆ ಮತ್ಯಾರು?’! ‘ದ ಪ್ರಿಂಟ್’ ಪತ್ರಿಕೆ ಹೊರತಂದಿರುವ ಮಹಿಳಾ ದಿನಾಚರಣೆ ಸಂದರ್ಭದ ವಿಶೇಷ ಅಧ್ಯಯನಾತ್ಮಕ ಲೇಖನ ಸರಣಿಯು ಗುರುತಿಸುವಂತೆ 2018-19 ರಲ್ಲಿ, ಶೇ.71 ಮಹಿಳಾ ಕಾರ್ಮಿಕರು ಕೃಷಿಯಲ್ಲಿ ಕೆಲಸ ಮಾಡುತ್ತಿದ್ದಾರೆ, ಉತ್ಪಾದನೆ ಶೇ. 9, ನಿರ್ಮಾಣ ಶೇ. 6 ಮತ್ತು ಹಾಸ್ಪಿಟಾಲಿಟಿ (ಆತಿಥ್ಯ) ಶೇ. 4. (‘ಆತಿಥ್ಯ’ವು ವ್ಯಾಪಾರ, ಹೋಟೆಲ್ ಮತ್ತು ರೆಸ್ಟೋರೆಂಟ್‍ಗಳನ್ನು ಒಳಗೊಂಡಿದೆ.) ‘
ಕೃಷಿ ಕಾರ್ಮಿಕ ಮಹಿಳೆಯರು
2011 ರ ಜನಗಣತಿಯ ಪ್ರಕಾರ, ಭಾರತದಲ್ಲಿ ಸುಮಾರು 263 ಮಿಲಿಯನ್ ಕೃಷಿ ಕಾರ್ಮಿಕರಿದ್ದಾರೆ ಮತ್ತು ಅವರಲ್ಲಿ 37 ಪ್ರತಿಶತ (ಅಥವಾ 98 ಮಿಲಿಯನ್) ಮಹಿಳೆಯರು. 1991 ಮತ್ತು 2011 ರ ನಡುವೆ, 85 ದಶಲಕ್ಷಕ್ಕೂ ಹೆಚ್ಚು ಕೃಷಿ ಕಾರ್ಮಿಕರು ಕೃಷಿ-ಕಾರ್ಮಿಕಪಡೆಗೆ ಪ್ರವೇಶಿಸಿದರು ಮತ್ತು ಇವರಲ್ಲಿ 49 ಮಿಲಿಯನ್ (58 ಪ್ರತಿಶತ) ಮಹಿಳೆಯರು. 1991 ರಿಂದ ಎರಡು ದಶಕಗಳಲ್ಲಿ, ಪುರುಷ ಕೃಷಿಕರ ಸಂಖ್ಯೆ 3 ಮಿಲಿಯನ್ ಕಡಿಮೆಯಾಗಿದೆ, ಆದರೆ ಮಹಿಳಾ ಕೃಷಿಕರ ಸಂಖ್ಯೆ 14.2 ಮಿಲಿಯನ್ ಹೆಚ್ಚಾಗಿದೆ. ಈ ಎರಡು ದಶಕಗಳಲ್ಲಿ 74 ಮಿಲಿಯನ್ ಕೃಷಿ ಕಾರ್ಮಿಕರ ಹೆಚ್ಚಳ ಕಂಡುಬಂದಿದೆ ಮತ್ತು ಇವರಲ್ಲಿ ಸುಮಾರು 47 ಪ್ರತಿಶತ ಮಹಿಳೆಯರು. ಕೃಷಿ ಕಾರ್ಮಿಕರಲ್ಲಿ ಹೆಚ್ಚುತ್ತಿರುವ ಮಹಿಳೆಯರ ಪಾಲಿನ ಹೊರತಾಗಿಯೂ, ಈ ಮಹಿಳೆಯರಲ್ಲಿ ಕೇವಲ 37 ಪ್ರತಿಶತದಷ್ಟು ಮಹಿಳೆಯರು ಮಾತ್ರ ಸಾಗುವಳಿದಾರರಾಗಿದ್ದಾರೆ (ತಮ್ಮ ಹೆಸರಿನಲ್ಲಿ ಭೂಮಿಯನ್ನು ಹೊಂದಿರುವವರು). ವಿಶೇಷವಾಗಿ ಕೃಷಿ-ಕಾರ್ಮಿಕರಾಗಿ ಕೆಲಸ ಮಾಡುವ ಮಹಿಳೆಯರ ಹೆಚ್ಚಿದ ಭಾಗವಹಿಸುವಿಕೆಯ ಈ ವಿದ್ಯಮಾನವನ್ನು ಭಾರತೀಯ ಕೃಷಿ-ಕಾರ್ಮಿಕರ ಸ್ತ್ರೀಕರಣದ ಪ್ರಕ್ರಿಯೆ ಎಂದು ಉಲ್ಲೇಖಿಸಲಾಗುತ್ತದೆ.
ಮಹಿಳಾ ಮಾಲೀಕತ್ವದ ಭೂಹಿಡುವಳಿಗಳು
2015-16ರ ಕೃಷಿ ಜನಗಣತಿಯ ಪ್ರಕಾರ, ಸುಮಾರು 90 ಪ್ರತಿಶತದಷ್ಟು ಮಹಿಳಾ ಮಾಲೀಕತ್ವದ ಭೂಹಿಡುವಳಿಗಳು ಸಣ್ಣ ಮತ್ತು ಕನಿಷ್ಠ ಭೂಹಿಡುವಳಿಗಳ ವರ್ಗಕ್ಕೆ ಸೇರುತ್ತವೆ. ಸಣ್ಣ ಭೂ ಹಿಡುವಳಿ ಗಾತ್ರದ ಕಾರಣ, ಈ ಮಹಿಳಾ ರೈತರಿಗೆ ಸಾಕಷ್ಟು ಪ್ರಮಾಣದ ಆರ್ಥಿಕ ಪ್ರಯೋಜನಗಳನ್ನು ಬಳಸಿಕೊಳ್ಳಲು ಸಾಧ್ಯವಾಗುವುದಿಲ್ಲ. ಅವರು ಒಂದು ಸಣ್ಣ ಭಾಗವನ್ನು ಉತ್ಪಾದಿಸುತ್ತಾರೆ, ಮಾರಾಟ ಮಾಡಬಹುದಾದ ಹೆಚ್ಚುವರಿಯ ಮತ್ತೂ ಒಂದು ಸಣ್ಣ ಭಾಗವನ್ನು ತರುತ್ತಾರೆ ಮತ್ತು ಮಾರುಕಟ್ಟೆ ಅವಕಾಶಗಳಿಗೆ ಪ್ರವೇಶದ ಕೊರತೆಯಿಂದಾಗಿ, ಆ ಉತ್ಪನ್ನಗಳಿಗೆ ಹೋಲಿಕೆಯಲ್ಲಿ ಕಡಿಮೆ ಪ್ರತಿಫಲವನ್ನು ಪಡೆಯುತ್ತಾರೆ.
ಕೃಷಿ ಕೂಲಿಕಾರ್ಮಿಕರು
ಮಹಿಳಾ ಕೃಷಿಕರ ಪರಿಸ್ಥಿತಿ ಹೀಗಾದರೆ ಕೃಷಿ ಕೂಲಿಕಾರ್ಮಿಕರ ಪರಿಸ್ಥಿತಿ ಇನ್ನೂ ಕಷ್ಟ. ಹೈನುಗಾರಿಕೆ, ಜಾನುವಾರು ಸಾಕಣೆ ಮುಂತಾದವನ್ನೂ ಸೇರಿದಂತೆ ಆರು ಬಗೆಯ ಕೃಷಿ ಸಂಬಂಧಿ ಕೂಲಿಕೆಲಸವನ್ನು ಮಾಡುವ ಕೃಷಿ ಕೂಲಿಕಾರ್ಮಿಕರ ಪರಿಸ್ಥಿತಿ ಇನ್ನೂ ಭಯಂಕರವಾಗಿದೆ. ಈ ಎಲ್ಲ ಕೆಲಸಗಳನ್ನು ಮಾಡಿದ್ದಕ್ಕೆ ಈ ಮಹಿಳಾ ಕೃಷಿಕೂಲಿಕಾರ್ಮಿಕರು ಗಳಿಸುವ ಹಣ ದಿನವೊಂದಕ್ಕೆ ಸರಾಸರಿ ಕೇವಲ 35ರೂ. ಪುರುಷ ಕೂಲಿಕಾರ್ಮಿಕರು ಇದಕ್ಕಿಂತ ಸಾಕಷ್ಟು ಹೆಚ್ಚಿನ ಪ್ರಮಾಣದ ಕೂಲಿ ಗಳಿಸುತ್ತಾರಾದರೂ, ಒಟ್ಟಾರೆ ಕೃಷಿ ಕ್ಷೇತ್ರದಲ್ಲೇ ಇರುವ ಕಡಿಮೆ ಆದಾಯದ ಸಮಸ್ಯೆಯ ಕಾರಣದಿಂದ ಈ ಸಮಸ್ಯೆಗೆ ಪ್ರತಿ ಕೃಷಿಕುಟುಂಬದ ಮಟ್ಟದಲ್ಲಿ ಪರಿಹಾರ ದೊರೆಯಲು ಸಾಧ್ಯವೇ ಇಲ್ಲ.
ಇನ್ನಿತರ ದುಡಿಮೆ – ಉತ್ಪಾದನೆಯ ಕ್ಷೇತ್ರ ಮತ್ತು ಸ್ತ್ರೀಕರಣ:
ಉತ್ಪಾದನಾ ಕ್ಷೇತ್ರದ ಹಲವು ಕೈಗಾರಿಕೆಗಳಿಂದು ಮಹಿಳೆಯರಿಂದಲೇ ತುಂಬಿತುಳುಕುತ್ತಿವೆ. ಅದರಲ್ಲೂ ವಿಶೇಷವಾಗಿ ದುಡಿಮೆಯ ಹಂತಗಳಲ್ಲಿ ಮಹಿಳೆಯರು ತುಂಬಿದ್ದರೆ ಆಡಳಿತಾತ್ಮಕ ಅಥವಾ ಮೇಲ್ವಿಚಾರಣೆಯ ಹಂತಗಳಲ್ಲಿ ಪುರುಷರು ಹೆಚ್ಚಿನ ಸಂಖ್ಯೆಯಲ್ಲಿದ್ದು ದುಡಿಮೆಯಲ್ಲಿ ತೊಡಗಿರುವ ಮಹಿಳಾ ಕಾರ್ಮಿಕರನ್ನು ಹಲವು ರೀತಿಗಳಲ್ಲಿ ದಮನ ದಬ್ಬಾಳಿಕೆಗಳಿಗೆ ಒಳಪಡಿಸುತ್ತಿರುವ ವಿದ್ಯಮಾನ ಇಂದು ವಿಸ್ತಾರವಾಗಿ ಹರಡಿದೆ.
ಹೀಗೆ, ಮಹಿಳೆಯರು ಹೆಚ್ಚಿನ ಸಂಖ್ಯೆಯಲ್ಲಿ ಕೆಲಸ ಮಾಡುವ ಸಿದ್ಧ ಉಡುಪು ಉದ್ದಿಮೆ, ಆಹಾರೋದ್ಯಮ ಇತ್ಯಾದಿ ಕ್ಷೇತ್ರಗಳಲ್ಲಿ ಅಥವಾ ‘ಮಹಿಳೆಯರ ಕೆಲಸಗಳು’ ಎಂದು ಗುರುತಿಸಲ್ಪಡುವ ಆರೈಕೆ, ಆರೋಗ್ಯ, ಕಲಿಕೆ, ಮನೆಗೆಲಸ, ಬೀದಿಸ್ವಚ್ಛಗೊಳಿಸುವ ಕೆಲಸ ಇತ್ಯಾದಿಗಳೆಲ್ಲವೂ ಸಮಾಜದಲ್ಲಿರುವ ಮಹಿಳೆಯರ ‘ಅಬಲತೆ’ಯ ಅಂಶಗಳನ್ನು ಇನ್ನಷ್ಟು ಹೆಚ್ಚುಹೆಚ್ಚಾಗಿ ದುರ್ಬಳಕೆ ಮಾಡಿಕೊಳ್ಳುತ್ತಾ ಅವರ ಮೇಲಿನ ಶೋಷಣೆ ಕೆಲಸದ ಸ್ಥಳದಲ್ಲೂ ಮುಂದುವರೆಯುವಂತೆ ರೂಪುಗೊಳಿಸಲ್ಪಟ್ಟಿರುತ್ತವೆ. ಅಷ್ಟಲ್ಲದೆ ದೀರ್ಘಕಾಲದಲ್ಲಿ ಈ ವ್ಯವಸ್ಥೆ ಹಾಗೇ ಮುಂದುವರೆಯುವಂತೆ, ಅವರ ಶ್ರಮದ ಲೂಟಿ ಇನ್ನಷ್ಟು ಹೆಚ್ಚುಹೆಚ್ಚಿನ ಲಾಭವನ್ನು ಮಾಲೀಕತ್ವಕ್ಕೆ ತಂದುಕೊಡುವಂತೆ ಅದರ ಒಟ್ಟಾರೆ ರಚನೆ ಏರ್ಪಟ್ಟಿರುತ್ತದೆ.
ಇದನ್ನೂ ಓದಿ-https://peepalmedia.com/a-woman-who-needs-to-cultivate-self-love/ http://ಸ್ವಪ್ರೀತಿಯನ್ನು ಕಂಡುಕೊಳ್ಳಬೇಕಾದ ಮಹಿಳೆ
ಕೆಲಸದ ಸ್ಥಳಗಳ ಸ್ತ್ರೀಕರಣಕ್ಕೆ ಆರ್ಥಿಕ ಮತ್ತು ಸಾಮಾಜಿಕ ಕಾರಣಗಳಿವೆ
ಜಾಗತೀಕರಣದ ನಂತರ ಹೊಸ ಮಟ್ಟಗಳನ್ನೂ, ಜಾಗತಿಕ ಆಯಾಮಗಳನ್ನೂ ತಲುಪಿದ ನಂತರ ಇಂತಹ ದೊಡ್ಡ ಕಾರ್ಪೊರೇಶನ್‍ಗಳು ಆರ್ಥಿಕವಾಗಿ ಕಡಿಮೆ ಬೆಲೆಯ ಶ್ರಮಶಕ್ತಿಯ ಹುಡುಕಾಟದಲ್ಲಿ ದೇಶದೇಶಗಳ ಕಾಯ್ದೆಗಳನ್ನೂ ತಿದ್ದುಪಡಿ ಮಾಡಿಸಿಕೊಳ್ಳುತ್ತಾ ಅಗ್ಗದ ದರದಲ್ಲಿ ದೊರೆಯುವ ಮತ್ತು ನಿಭಾಯಿಸಲು ಸುಲಭ ಎಂದು ಕಾಣುವ ಮಹಿಳಾ ಶ್ರಮಶಕ್ತಿಯನ್ನು ಬಾಚಿಕೊಳ್ಳುತ್ತಿವೆ. ಅದೇ ಸಮಯದಲ್ಲಿ ಸಾಮಾಜಿಕವಾಗಿ ಅಸ್ತಿತ್ವದಲ್ಲಿ ಇರುವ ಮಹಿಳಾ ದಮನದ ಸಾಂಸ್ಥಿಕ ರಚನೆಗಳನ್ನು ಬಳಸಿಕೊಳ್ಳುತ್ತಾ ‘ಮಹಿಳೆಯರ ಕೆಲಸ’ ಎಂಬ ಹಣೆಪಟ್ಟಿಯನ್ನು ಬಳಸಿ ಅಥವಾ ‘ಮಹಿಳೆಯರು ಕುಟುಂಬದ ಪ್ರಧಾನ ಆದಾಯ ಪೂರೈಕೆದಾರರಲ್ಲ, ಅವರದ್ದೇನಿದ್ದರೂ ಪೂರಕ ಆದಾಯ’ ಎಂಬ ವಾಸ್ತವಕ್ಕೆ ದೂರವಾದ ಅಸಮಾನ ಕಲ್ಪನೆಯನ್ನು ಮುಂದಿಟ್ಟು, ಮಹಿಳೆಯರ ದುಡಿಮೆಗೆ ನ್ಯಾಯಬದ್ಧವಾಗಿ ದೊರೆಯಬೇಕಾದ ಪ್ರತಿಫಲ ಅಥವಾ ಸವಲತ್ತುಗಳಿಂದ ಮಹಿಳಾ ಕಾರ್ಮಿಕರನ್ನು ವಂಚಿಸುತ್ತಾ ಸಾಗುವ ಪ್ರಕ್ರಿಯೆ ನಿರಂತರವಾಗಿ ನಡೆಯುತ್ತಿದೆ. ‘ಏಷಿಯನ್ ಸೋಷಿಯಲ್ ವರ್ಕ್ ಅಂಡ್ ಪಾಲಿಸಿ ರಿವ್ಯೂ’ ನಡೆಸಿದ ಬಾಂಗ್ಲಾದೇಶದ ಸಿದ್ಧ ಉಡುಪು ಉದ್ದಿಮೆ ಕುರಿತು 2021ರಲ್ಲಿ ವಿಸ್ತಾರವಾದ ಅಧ್ಯಯನ ನಡೆಸಿ ಈ ವಿಚಾರಗಳನ್ನೇ ಸ್ಪಷ್ಟವಾಗಿ ಬೆಳಕಿಗೆ ತಂದಿದೆ.
ಶ್ರಮಶಕ್ತಿಯ ಸ್ತ್ರೀಕರಣವೆಂದರೆ ‘ಬಡತನದ ಸ್ತ್ರೀಕರಣ’ವೂ ಹೌದು
ಕೇವಲ ದುಡಿಮೆ ಮತ್ತು ಶೋಷಣೆಯಲ್ಲಿ ಸ್ತ್ರೀಕರಣ ಆಗುತ್ತಿರುವಷ್ಟೇ ಅಲ್ಲದೆ ಜಾಗತಿಕವಾಗಿ ಬಡತನವೂ ಪ್ರಧಾನವಾಗಿ ಮಹಿಳೆಯರನ್ನು ಅಥವಾ ಮಹಿಳೆಯರಿಂದ ಮುನ್ನಡೆಸಲ್ಪಡುತ್ತಿರುವ ಕುಟುಂಬಗಳನ್ನು ಕಾಡುತ್ತಿದೆ ಎಂಬುದನ್ನೂ ಅಧ್ಯಯನಗಳು ತೋರಿಸಿವೆ.
ಸ್ವಲ್ಪ ಸಮಯದ ಹಿಂದೆ ಬಿಬಿಸಿಯ ಪ್ರಖ್ಯಾತ ಮಹಿಳಾ ನಿರೂಪಕಿಯರಿಗೆ ತಾರತಮ್ಯದ ವೇತನ ನೀಡುತ್ತಿದ್ದ ವಿಚಾರ ಬಿಬಿಸಿಗೆ ನಾಚಿಕೆ ತರಿಸಬೇಕಾದಂಥದ್ದು. ಹಾಗೇ ಶೋಷಣೆ ಮತ್ತು ಬಡತನ ಹೆಚ್ಚಾಗುವಂತಹ ರೀತಿಯಲ್ಲಿ ನಡೆಯುತ್ತಿರುವ ಶ್ರಮಶಕ್ತಿಯ ಸ್ತ್ರೀಕರಣವು ಒಂದು ನಾಗರೀಕ ಸಮಾಜವಾಗಿ ಮತ್ತು ಪ್ರಜಾತಂತ್ರ ವ್ಯವಸ್ಥೆಯಾಗಿ ನಮ್ಮೆಲ್ಲರಿಗೂ ನಾಚಿಕೆ ತರಿಸಬೇಕಾದ ವಿಷಯ.
ಮಲ್ಲಿಗೆ ಸಿರಿಮನೆ
ಸಾಮಾಜಿಕ ಹೋರಾಟಗಾರ್ತಿ
(ಮಾಹಿತಿ: ‘ಲಿವಿಂಗ್ ವೇಜ್ ಫೌಂಡೇಶನ್’ನ ಬ್ಲಾಗ್, ಬ್ರಿಟನ್‍ನ ಕಾರ್ಮಿಕ ಯೂನಿಯನ್ ಬಿಟಿಐನ ಅಧ್ಯಯನ ವರದಿ, ‘ದ ಪ್ರಿಂಟ್’ ಪತ್ರಿಕೆಯ ಲೇಖನ ಸರಣಿ).
ಇದನ್ನೂ ಓದಿ – https://peepalmedia.com/women-who-are-not-scared-of-attack/ http://ದಾಳಿಗೆ ಅಂಜದ ದಿಟ್ಟೆಯರು
