ಗೂರ್ಖಾ ರೆಜಿಮೆಂಟ್‌ ಇನ್ನು ಮುಗಿದ ಅಧ್ಯಾಯವೇ?

ಕೆಲವು ದಶಕಗಳ ಹಿಂದೆ ಸಹಿ ಹಾಕಿದ ವಿಶೇಷ ಒಪ್ಪಂದದಡಿಯಲ್ಲಿ, ನೇಪಾಳ ಸರ್ಕಾರವು ನೇಪಾಳದ ಸ್ಥಳೀಯ ನಿವಾಸಿಗಳಾದ ಗೂರ್ಖಾ ಸೈನಿಕರಿಗೆ ಭಾರತೀಯ ಸೇನೆಗೆ ಸೇರಲು ಅವಕಾಶ ನೀಡುತ್ತಿದೆ. ಆದರೆ ಭಾರತ ಸೇನಾ ನೇಮಕಾತಿಗಾಗಿ ಅಗ್ನಿಪಥ ಎನ್ನುವ ಯೋಜನೆಯನ್ನು ಪರಿಚಯಿಸಿದ ನಂತರ ಈ ಒಪ್ಪಂದು ತನ್ನ ಅಸ್ತಿತ್ವನ್ನು ಕಳೆದುಕೊಂಡಿತು.ಅಲ್ಲದೆ ಇದು ಭಾರತ-ನೇಪಾಳದ ನಡುವಿನ ಸಂಬಂಧದ ಮೇಲೂ ಪರಿಣಾಮ ಬೀರಿದೆ.

ನೇಪಾಳಿ ಗೂರ್ಖಾಗಳು ತಮ್ಮ ಶೌರ್ಯ ಮತ್ತು ಭೀಕರ ಶತ್ರು ಯುದ್ಧಗಳಿಗೆ ಹೆಸರುವಾಸಿಯಾಗಿದ್ದಾರೆ, ಭಾರತೀಯ ಮತ್ತು ಬ್ರಿಟಿಷ್ ಸೈನ್ಯಗಳಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ ಮತ್ತು ದಶಕಗಳಿಂದ ಅನೇಕ ಯುದ್ಧಗಳಲ್ಲಿ ಭಾಗವಹಿಸಿದ್ದಾರೆ. 1815ರಲ್ಲಿ, ಬ್ರಿಟಿಷ್ ಈಸ್ಟ್ ಇಂಡಿಯಾ ಕಂಪನಿಯು ನೇಪಾಳದೊಂದಿಗಿನ ಶಾಂತಿ ಒಪ್ಪಂದದ ಪ್ರಕಾರ ಅವರನ್ನು ತಮ್ಮ ಸೈನ್ಯದಲ್ಲಿ ಮೊದಲ ಬಾರಿಗೆ ನೇಮಿಸಿಕೊಂಡಿತು.

1947ರಲ್ಲಿ ಬ್ರಿಟಿಷ್ ಆಳ್ವಿಕೆ ಕೊನೆಗೊಂಡ ನಂತರ ಭಾರತ, ನೇಪಾಳ ಮತ್ತು ಬ್ರಿಟನ್ ನಡುವೆ ಸಹಿ ಹಾಕಲ್ಪಟ್ಟ ತ್ರಿಪಕ್ಷೀಯ ಒಪ್ಪಂದದ ಭಾಗವಾಗಿ, ಭಾರತ ಮತ್ತು ಬ್ರಿಟನ್ ನೇಪಾಳಿ ಗೂರ್ಖಾಗಳನ್ನು ಸೈನ್ಯದಲ್ಲಿ ನೇಮಕ ಮಾಡಿಕೊಳ್ಳುವುದನ್ನು ಮುಂದುವರಿಸಲು ನಿರ್ಧರಿಸಿದವು. ಮಿಲಿಟರಿ ನೇಮಕಾತಿಗಾಗಿ ಭಾರತ ಸರ್ಕಾರ ಅಗ್ನಿಪಥ್ ಎಂಬ ಹೊಸ ಯೋಜನೆಯನ್ನು ಘೋಷಿಸಿದ ನಂತರ ನೇಪಾಳ ಮತ್ತು ಬ್ರಿಟನ್ ಭಾರತದೊಂದಿಗಿನ ಒಪ್ಪಂದವು ಸ್ಥಗಿತಗೊಂಡಿತು.

ಅಗ್ನಿಪಥ್ ಯೋಜನೆಯಡಿ, ಸೈನಿಕರನ್ನು ನೇಮಕ ಮಾಡಿಕೊಳ್ಳುವಾಗ, ಅವರನ್ನು ನಾಲ್ಕು ವರ್ಷಗಳ ನಿಗದಿತ ಅವಧಿಗೆ ಮಾತ್ರ ನೇಮಕ ಮಾಡಿಕೊಳ್ಳಲಾಗುತ್ತದೆ, ಅದರಲ್ಲಿ ಉತ್ತಮವಾಗಿ ಕಾರ್ಯನಿರ್ವಹಿಸಿದ 25 ಪ್ರತಿಶತದಷ್ಟು ಜನರು ನಾಲ್ಕು ವರ್ಷಗಳ ನಂತರವೂ ಭಾರತೀಯ ಕೇಂದ್ರ ಪಡೆಗಳಲ್ಲಿ ಮುಂದುವರಿಯುತ್ತಾರೆ, ಉಳಿದವರಿಗೆ ಯಾವುದೇ ಪಿಂಚಣಿ ಅಥವಾ ಇತರ ಪ್ರಯೋಜನಗಳಿಲ್ಲದೆ 11.71 ಲಕ್ಷ ರೂಪಾಯಿಗಳನ್ನು ಸೇವೆಯಿಂದ ಬಿಡುಗಡೆಯಾಗುವಾಗ ನೀಡಲಾಗುತ್ತದೆ.

ಈ ಎಲ್ಲಾ ನಿಬಂಧನೆಗಳು ಬ್ರಿಟಿಷ್ ಮತ್ತು ಭಾರತೀಯ ಸೇನೆಯಲ್ಲಿ ದೀರ್ಘಕಾಲದಿಂದ ಸೇವೆ ಸಲ್ಲಿಸುತ್ತಿರುವ ಗೂರ್ಖಾ ಸೈನಿಕರಿಗೂ ಅನ್ವಯಿಸುತ್ತವೆ.

ಭಾರತದ ಸೇನೆಯಲ್ಲಿರುವ ಗೂರ್ಖಾಗಳ ಸಂಖ್ಯೆಯೆಷ್ಟು?

ಮಿಲಿಟರಿ ನೇಮಕಾತಿ ಪ್ರಕ್ರಿಯೆಯಲ್ಲಿ ಇಷ್ಟು ದೊಡ್ಡ ನಿರ್ಧಾರ ತೆಗೆದುಕೊಳ್ಳುವಾಗ ತಮ್ಮೊಂದಿಗೆ ಸಮಾಲೋಚಿಸಲಾಗಿಲ್ಲ ಮತ್ತು ಭಾರತ ಸರ್ಕಾರದ ಹಠಾತ್ ನಿರ್ಧಾರದಿಂದ ಆಶ್ಚರ್ಯಚಕಿತರಾಗಿದ್ದೇವೆ ಎಂದು ನೇಪಾಳಿ ಅಧಿಕಾರಿಗಳು ಹೇಳುತ್ತಾರೆ.

“ತ್ರಿಪಕ್ಷೀಯ ಒಪ್ಪಂದದಲ್ಲಿ ಯಾವುದೇ ಬದಲಾವಣೆ ಇದ್ದರೆ, ಅದನ್ನು ರಾಜಕೀಯ ಒಮ್ಮತದ ಮೂಲಕ ಜಾರಿಗೆ ತರಬೇಕು ಎಂಬ ನೀತಿಯನ್ನು ನಾವು ಹೊಂದಿದ್ದೇವೆ” ಎಂದು ನೇಪಾಳದ ವಿದೇಶಾಂಗ ಸಚಿವ ಎನ್ ಪಿ ಸೌದ್ ಬಿಬಿಸಿಗೆ ತಿಳಿಸಿದ್ದಾರೆ.

ನೇಪಾಳದ ರಾಜಕೀಯ ಪಕ್ಷಗಳು ಈ ಬದಲಾವಣೆಯನ್ನು ತೀವ್ರವಾಗಿ ವಿರೋಧಿಸುತ್ತಿರುವುದರಿಂದ, ಪ್ರಸ್ತುತ ಸರ್ಕಾರಕ್ಕೆ ಒಮ್ಮತಕ್ಕೆ ತಲುಪುವುದು ಇನ್ನಷ್ಟು ಕಷ್ಟಕರವಾಗಿದೆ.

“ನಾವು ಹೊಸ ಯೋಜನೆಯನ್ನು ಒಪ್ಪುವುದಿಲ್ಲ. ಹಳೆಯ ಗೂರ್ಖಾ ನೇಮಕಾತಿ ಪ್ರಕ್ರಿಯೆಗೆ ಮರಳಲು ಭಾರತ ಸಿದ್ಧವಾಗಿದ್ದರೆ, ಅದನ್ನು ಪುನರಾರಂಭಿಸಬಹುದು” ಎಂದು ನೇಪಾಳದ ಪ್ರಮುಖ ವಿರೋಧ ಪಕ್ಷದ ಕಮ್ಯುನಿಸ್ಟ್ ಪಕ್ಷದ ಹಿರಿಯ ನಾಯಕ ಪ್ರದೀಪ್ ಕುಮಾರ್ ಗ್ಯಾವಲಿ ಬಿಬಿಸಿ ಮಾಧ್ಯಮ ಸಂಸ್ಥೆಗೆ ತಿಳಿಸಿದ್ದಾರೆ.

ಅಗ್ನಿಪಥ್ ಯೋಜನೆಯನ್ನು ಘೋಷಿಸುವ ಮೊದಲು, ಭಾರತವು ತನ್ನ ಗೂರ್ಖಾ ರೆಜಿಮೆಂಟ್‌ಗಳಲ್ಲಿ ವಾರ್ಷಿಕವಾಗಿ ಸರಾಸರಿ 1,400 ನೇಪಾಳಿ ಪ್ರಜೆಗಳನ್ನು ಸೇರಿಸಿಕೊಳ್ಳುತ್ತಿತ್ತು. ಪ್ರಸ್ತುತ, ಭಾರತೀಯ ಸೇನೆಯಲ್ಲಿ ಸುಮಾರು 35,000 ನೇಪಾಳಿ ಗೂರ್ಖಾಗಳು ಕೆಲಸ ಮಾಡುತ್ತಿದ್ದು, ಇವರೆಲ್ಲರೂ ಕಾಶ್ಮೀರದ ವಿವಿಧ ಭಾಗಗಳಲ್ಲಿ ಮತ್ತು ಈಶಾನ್ಯ ರಾಜ್ಯಗಳಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ.

ಅಗ್ನಿಪಥ್ ಯೋಜನೆಯು ಸೈನಿಕರ ವೇತನ ಮತ್ತು ಪಿಂಚಣಿಗಳ ವೆಚ್ಚವನ್ನು ಕಡಿಮೆ ಮಾಡುತ್ತದೆ ಎಂದು ಭಾರತ ಸರ್ಕಾರ ವಾದಿಸುತ್ತಿದೆ, ಮತ್ತು ಈಗ ರಕ್ಷಣಾ ಬಜೆಟ್ ಹಂಚಿಕೆಯ ಅರ್ಧಕ್ಕಿಂತ ಹೆಚ್ಚು ಹಣವನ್ನು ಸಂಬಳ ಮತ್ತು ಪಿಂಚಣಿಗಾಗಿ ಪಾವತಿಸಲಾಗುತ್ತದೆ.

ನಾಲ್ಕು ವರ್ಷಗಳ ಕಾಲ ಸೇನೆಯಲ್ಲಿ ಸೇವೆಗೆ ನೇಮಕ ಮಾಡುವುದರಿಂದ ಭಾರತೀಯ ಸಶಸ್ತ್ರ ಪಡೆಗಳ ಸರಾಸರಿ ವಯಸ್ಸು ಕಡಿಮೆಯಾಗುತ್ತದೆ ಎಂದು ಭಾರತ ಸರ್ಕಾರ ಹೇಳುತ್ತದೆ.

ನೇಪಾಳದ ಆತಂಕವೇನು?

ಹಾಗೆ ಮಾಡುವುದರಿಂದ ದಂಗೆಕೋರರ ಬೆದರಿಕೆ ಮತ್ತಷ್ಟು ಹೆಚ್ಚಾಗುತ್ತದೆ ಎಂದು ನೇಪಾಳ ಕಳವಳ ವ್ಯಕ್ತಪಡಿಸಿದೆ.

“ನಾಲ್ಕು ವರ್ಷಗಳ ಕಾಲ ಭಾರತೀಯ ಸೇನೆಯಲ್ಲಿ ಸೇವೆ ಸಲ್ಲಿಸಿ ಹೊರಬಂದ ವ್ಯಕ್ತಿಯನ್ನು ದೇಶದ ಅರಾಜಕ ಶಕ್ತಿಗಳು ಅಥವಾ ವಿದೇಶಿಗರು ಸೈನಿಕ ಅಗತ್ಯಗಳಿಗಾಗಿ ನೇಮಿಸಿಕೊಳ್ಳುವ ಅಪಾಯವಿದೆ” ಎಂದು ನಿವೃತ್ತ ನೇಪಾಳಿ ಸೇನಾಧಿಕಾರಿ ಪ್ರೇಮ್ ಸಿಂಗ್ ಬಸ್ನ್ಯಾತ್ ಹೇಳುತ್ತಾರೆ.

ಈಗಾಗಲೇ ಒಂದು ದಶಕಕ್ಕೂ ಹೆಚ್ಚು ಕಾಲದಿಂದ ಮಾವೋವಾದಿಗಳ ಸಶಸ್ತ್ರ ಬಂಡಾಯದಿಂದಾಗಿ ನೇಪಾಳವು ಸಾಕಷ್ಟು ತೊಂದರೆ ಅನುಭವಿಸಿದೆ. ಇದು 2006ರಲ್ಲಿ ಕೊನೆಗೊಂಡಿತು. ಈ ಅಂತರ್ಯುದ್ಧದಲ್ಲಿ ಸಾವಿರಾರು ಜನರು ಕೊಲ್ಲಲ್ಪಟ್ಟರು. ಭಾರತದಿಂದ ಹಿಂದಿರುಗಿದ ಎಲ್ಲರಿಗೂ ಉದ್ಯೋಗ ನೀಡಲು ಸಾಧ್ಯವಿಲ್ಲ ಎಂದು ನೇಪಾಳ ಸರ್ಕಾರ ಹೇಳಿದೆ.

ಈ ನಡುವೆ ಅಗ್ನಿಪಥ್ ಯೋಜನೆಯಿಂದ ನೇಪಾಳಿ ಗೂರ್ಖಾಗಳನ್ನು ಹೊರಗಿಡುವ ಪ್ರಸ್ತಾಪಗಳು ಭಾರತದಿಂದ ಬರುತ್ತಿವೆ. ಅಗ್ನಿಪಥ್ ಯೋಜನೆಯು ನೇಪಾಳದೊಂದಿಗಿನ ಭಾರತದ ಸಂಬಂಧವನ್ನು ಸಂಕೀರ್ಣಗೊಳಿಸುತ್ತದೆ ಎಂದು ಭಾರತೀಯ ಗೂರ್ಖಾ ರೆಜಿಮೆಂಟ್‌ನಲ್ಲಿ ಸೇವೆ ಸಲ್ಲಿಸಿ ನಿವೃತ್ತರಾಗಿರುವ ಮೇಜರ್ ಜನರಲ್ ಅಶೋಕ್ ಮೆಹ್ತಾ ಹೇಳುತ್ತಾರೆ.

“ರಾಜತಾಂತ್ರಿಕ ಶಿಷ್ಟಾಚಾರವನ್ನು ಕಾಪಾಡಿಕೊಳ್ಳುವಲ್ಲಿ ಭಾರತ ಸರ್ಕಾರ ತನ್ನ ಜವಾಬ್ದಾರಿಯನ್ನು ನಿರ್ಲಕ್ಷಿಸಿದೆ. ಭಾರತೀಯ ರಾಜತಾಂತ್ರಿಕತೆಯೊಂದಿಗೆ ವಿಶೇಷ ಸಂಬಂಧವನ್ನು ಹೊಂದಿದೆ ಎಂದು ಹೇಳಿಕೊಳ್ಳುವ ನೇಪಾಳದಂತಹ ದೇಶದ ವಿಷಯದಲ್ಲಿ ಇದನ್ನು ಮಾಡಬಾರದು” ಎಂದು ಅವರು ಹೇಳಿದರು.

ಅಗ್ನಿಪಥ್ ಯೋಜನೆಯಡಿ ನೇಪಾಳಿ ಗೂರ್ಖಾಗಳು ಭಾರತೀಯ ಸೇನೆಗೆ ಸೇರದಿದ್ದರೆ, ಅವರಿಗೆ ನಿಗದಿಪಡಿಸಿದ ಕೋಟಾವನ್ನು ಮುಂದಿನ ದಿನಗಳಲ್ಲಿ ಭಾರತೀಯರಿಗೆ ನೀಡಬಹುದು ಎಂದು ಭಾರತೀಯ ಅಧಿಕಾರಿಗಳು ಸೂಚಿಸುತ್ತಿದ್ದಾರೆ.

ಇದು ಭಾರತ-ನೇಪಾಳ ಸಂಬಂಧದ ಮೇಲೆ ಪರಿಣಾಮ ಬೀರುತ್ತದೆಯೇ?

ಭಾರತದ ನಿರ್ಧಾರಗಳಿಂದ ಈಗಾಗಲೇ ಅಸಮಾಧಾನಗೊಂಡಿರುವ ನೇಪಾಳವನ್ನು ಈ ಕ್ರಮವು ಮತ್ತಷ್ಟು ದೂರವಾಗಿಸುತ್ತದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಚೀನಾ ಗಡಿಗೆ ಹತ್ತಿರವಿರುವ ನೇಪಾಳದ ಪಶ್ಚಿಮ ಭಾಗದ ಕೆಲವು ಪ್ರದೇಶಗಳನ್ನು ತನ್ನದು ಎಂದು ಹೇಳಿಕೊಂಡು 2019ರಲ್ಲಿ ಭಾರತ ಪ್ರಕಟಿಸಿದ ನಕ್ಷೆಯ ಬಗ್ಗೆ ನೇಪಾಳ ಕೋಪಗೊಂಡಿದೆ.

ವಿವಾದಿತ ಪ್ರದೇಶಗಳನ್ನು ತನ್ನದು ಎಂದು ಹೇಳಿಕೊಳ್ಳುವ ನಕ್ಷೆಯನ್ನು ನೇಪಾಳ ಬಿಡುಗಡೆ ಮಾಡಿದ ನಂತರ ರಾಜತಾಂತ್ರಿಕ ವಿವಾದ ತೀವ್ರಗೊಂಡಿತು.

ನಕ್ಷೆ ವಿವಾದಕ್ಕೆ ಕೆಲವು ವರ್ಷಗಳ ಮೊದಲು, ನೇಪಾಳದ ಮಾಥೆಸಿ ಸಮುದಾಯವು ತಮ್ಮ ಹಕ್ಕುಗಳಿಗಾಗಿ ಒತ್ತಾಯಿಸಿ 2015ರಲ್ಲಿ ಪ್ರತಿಭಟನೆಯ ಭಾಗವಾಗಿ ಭಾರತದಿಂದ ಸರಕುಗಳ ಚಲನೆಯನ್ನು ನಿರ್ಬಂಧಿಸಿತು. ಇದರ ಹಿಂದೆ ಭಾರತವಿದೆ ಎಂಬ ಆರೋಪವನ್ನು ಭಾರತ ಸರ್ಕಾರ ತಿರಸ್ಕರಿಸಿದೆ. ನೇಪಾಳದಲ್ಲಿ ಕೆಲವೇ ಜನರು ಭಾರತ ಸರ್ಕಾರದ ಹೇಳಿಕೆಯನ್ನು ನಂಬುತ್ತಾರೆ.

ಕಠ್ಮಂಡುವಿನ ಹೊರಗಿನ ಮೈದಾನದಲ್ಲಿ, ತರಬೇತುದಾರರೊಬ್ಬರು ಬ್ರಿಟಿಷ್ ಸೈನ್ಯದಲ್ಲಿ ಗೂರ್ಖಾಗಳ ನೇಮಕಾತಿ ಕುರಿತ ತರಬೇತಿ ಕಾರ್ಯಕ್ರಮದ ಭಾಗವಾಗಿ ನೂರಾರು ಯುವಕರಿಗೆ ವೇಗವಾಗಿ ಓಡಲು ತರಬೇತಿ ನೀಡುತ್ತಿದ್ದಾರೆ. ಅವರಲ್ಲಿ 19 ವರ್ಷದ ಅನೀಶ್ ಥಾಪಾ ಮಗರ್ ಕೂಡ ಒಬ್ಬರು, ಅವರು ತಮ್ಮ ಸಂಬಂಧಿಕರಂತೆ ಭಾರತೀಯ ಸೇನೆಗೆ ಸೇರುವ ಭರವಸೆ ಹೊಂದಿದ್ದಾರೆ.

“ಅಗ್ನಿಪಥ್ ಯೋಜನೆಯಿಂದ ನಮಗೆ ಯಾವುದೇ ಪ್ರಯೋಜನವಿಲ್ಲ. ನಾಲ್ಕು ವರ್ಷಗಳ ನಂತರ ಮುಂದೆ ಏನು ಮಾಡಬೇಕೆನ್ನುವ ಅರಿವಿಲ್ಲದೆ ಮನೆಗೆ ಮರಳುತ್ತೇವೆ. ಅದಕ್ಕಾಗಿಯೇ ನಾನು ಬ್ರಿಟಿಷ್ ಸೈನ್ಯಕ್ಕೆ ಆಯ್ಕೆಯಾಗಲು ಶ್ರಮಿಸುತ್ತಿದ್ದೇನೆ” ಎಂದು ಮಗರ್ ಥಾಪಾ ಹೇಳುತ್ತಾರೆ.

ಎಲ್ಲರೂ ವಿರೋಧಿಸುತ್ತಿಲ್ಲ

ನೇಪಾಳಿ ಗೂರ್ಖಾಗಳು ಭಾರತೀಯ ಸೇನೆಯೊಂದಿಗೆ ಬಲವಾದ ಸಂಬಂಧವನ್ನು ಹೊಂದಿದ್ದಾರೆ. ನೇಪಾಳದ ಪರ್ವತ ಪ್ರದೇಶಗಳಲ್ಲಿ ವಾಸಿಸುವ ಗೂರ್ಖಾಗಳು ಭಾರತೀಯ ಸೇನೆಯ ಗೂರ್ಖಾ ರೆಜಿಮೆಂಟ್ ಭಾಗವಾಗಿದ್ದಾರೆ. ನೇಪಾಳದಲ್ಲಿ ಸುಮಾರು 1,20,000 ಗೂರ್ಖಾಗಳು ಭಾರತೀಯ ಸೇನೆಯಿಂದ ನಿವೃತ್ತರಾಗಿದ್ದಾರೆ ಮತ್ತು ಅವರ ಪಿಂಚಣಿ ಮತ್ತು ಇತರ ಪ್ರಯೋಜನಗಳು ನೇಪಾಳದ ಪರ್ವತ ಪ್ರದೇಶಗಳಲ್ಲಿನ ಆರ್ಥಿಕತೆಯನ್ನು ಉಳಿಸಿವೆ.

ಅಗ್ನಿಪಥ್ ಯೋಜನೆಗೆ ತೀವ್ರ ವಿರೋಧವಿದ್ದರೂ, ಎಲ್ಲರೂ ಈ ನೇಮಕಾತಿ ಪ್ರಕ್ರಿಯೆಯನ್ನು ವಿರೋಧಿಸುವುದಿಲ್ಲ. ಭಾರತೀಯ ಸೇನೆಯಲ್ಲಿ ಸೇವೆ ಸಲ್ಲಿಸಿದ ಲಕ್ಷ್ಮಿಕಾಂತ್ ಪಾಂಡೆ ಅವರಂತಹ ನೇಪಾಳಿ ಗೂರ್ಖಾಗಳು ಅಗ್ನಿಪಥ್ ಯೋಜನೆಯು ಕೆಲವು ಅನುಕೂಲಗಳನ್ನು ಹೊಂದಿದೆ ಮತ್ತು ಅದನ್ನು ಸಂಪೂರ್ಣವಾಗಿ ತಿರಸ್ಕರಿಸುವುದು ನ್ಯಾಯವಲ್ಲ ಎಂದು ವಾದಿಸುತ್ತಾರೆ.

ಈ ಯೋಜನೆಯಡಿ ಅಧಿಕಾರಾವಧಿ ಮುಗಿದ ನಂತರ ಸ್ವಲ್ಪ ಹಣವನ್ನು ನೀಡಲಾಗುವುದು ಮತ್ತು ಭಾರತೀಯ ಸೇನೆಯಲ್ಲಿ ಸೇವೆ ಸಲ್ಲಿಸಿದ ಅನುಭವವು ನೇಪಾಳ ಮತ್ತು ಇತರ ದೇಶಗಳಲ್ಲಿ ಅವಕಾಶಗಳನ್ನು ಒದಗಿಸುತ್ತದೆ ಎಂದು ಅವರು ಹೇಳಿದರು.

ಮಿಲಿಟರಿ ನೇಮಕಾತಿಗಳಿಗೆ ಸಂಬಂಧಿಸಿದಂತೆ ಅಗ್ನಿಪಥ್ ಯೋಜನೆಯಡಿ ಹೆಚ್ಚಿನ ರಿಯಾಯಿತಿಗಳನ್ನು ಪಡೆಯಲು ಭಾರತ ಸರ್ಕಾರದೊಂದಿಗೆ ಚರ್ಚೆ ನಡೆಸುವುದು ಉತ್ತಮ ಎಂದು ಅವರು ಸಲಹೆ ನೀಡಿದರು.

ಇದೆಲ್ಲದರ ನಡುವೆ, ಅಗ್ನಿಪಥ್ ಯೋಜನೆಯಡಿ ಭಾರತೀಯ ಸೇನೆಯಲ್ಲಿ ಸೇವೆ ಸಲ್ಲಿಸಲು ಆಯ್ಕೆಯಾದ ಭಾರತೀಯ ಸೈನಿಕರ ಮೊದಲ ಬ್ಯಾಚ್ ಆಗಸ್ಟ್ ಮೊದಲ ವಾರದಲ್ಲಿ ತರಬೇತಿಯನ್ನು ಪೂರ್ಣಗೊಳಿಸಿ ಸೈನ್ಯಕ್ಕೆ ಸೇರಿದೆ.