ದೆಹಲಿ: ದೇಶಾದ್ಯಂತ ಟ್ರಕ್ ನಿರ್ವಾಹಕರು ಇಂಧನ ರೇಷನಿಂಗ್ ಮತ್ತು ಕಳೆದ ನಾಲ್ಕು ವರ್ಷಗಳಲ್ಲಿ ಮೊದಲ ಬಾರಿಗೆ ಡೀಸೆಲ್ ಬೆಲೆಯಲ್ಲಿ ಭಾರಿ ಏರಿಕೆಯನ್ನು ಎದುರಿಸಲು ಸಿದ್ಧರಾಗುತ್ತಿದ್ದಾರೆ. ಕಳೆದ ಎಂಟು ವಾರಗಳಿಂದ ಪಶ್ಚಿಮ ಏಷ್ಯಾದಲ್ಲಿ ಯುದ್ಧ ನಡೆಯುತ್ತಿದ್ದರೂ ಇಲ್ಲಿಯವರೆಗೆ ಬೆಲೆಗಳಲ್ಲಿ ಯಾವುದೇ ಬದಲಾವಣೆಯಾಗಿರಲಿಲ್ಲ, ಆದರೆ ಇದೀಗ ಆ ಸ್ಥಿತಿ ಬದಲಾಗುವ ಲಕ್ಷಣಗಳು ಗೋಚರಿಸುತ್ತಿವೆ.
ವಿಶ್ವದ ಮೂರನೇ ಅತಿದೊಡ್ಡ ತೈಲ ಆಮದುದಾರ ರಾಷ್ಟ್ರವಾಗಿರುವ ಭಾರತವು, ಯುದ್ಧದಿಂದ ಉಂಟಾದ ಆರ್ಥಿಕ ಏರಿಳಿತಗಳನ್ನು ಸಮರ್ಥವಾಗಿ ನಿರ್ವಹಿಸಿತ್ತು. ಪ್ರಮುಖ ರಾಜ್ಯಗಳ ವಿಧಾನಸಭೆ ಚುನಾವಣೆಗಳನ್ನು ಗಮನದಲ್ಲಿಟ್ಟುಕೊಂಡು ಸರ್ಕಾರವು ಗ್ರಾಹಕರು ಮತ್ತು ತೈಲ ಸಂಸ್ಕರಣಾಗಾರಗಳ ಮೇಲೆ ಹೊರೆ ಬೀಳದಂತೆ ರಕ್ಷಣೆ ನೀಡಿತ್ತು. ಆದರೆ, ಈಗ ಚುನಾವಣೆಗಳು ಮುಗಿಯುತ್ತಿರುವುದರಿಂದ ಮತ್ತು ಜಾಗತಿಕ ಮಾರುಕಟ್ಟೆಯಲ್ಲಿನ ಒತ್ತಡದಿಂದ ಬೆಲೆ ಏರಿಕೆ ಅನಿವಾರ್ಯವಾಗಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
ಅಖಿಲ ಭಾರತ ಮೋಟಾರ್ ಟ್ರಾನ್ಸ್ಪೋರ್ಟ್ ಕಾಂಗ್ರೆಸ್ನ ಕಾರ್ಯಕಾರಿ ಸದಸ್ಯ ಶೈಲೇಂದ್ರ ಗುಪ್ತಾ ಅವರ ಪ್ರಕಾರ, ಚುನಾವಣೆಗಳ ನಂತರ ಡೀಸೆಲ್ ಬೆಲೆ ಏರಿಕೆ ಖಚಿತ. “ಈಗಾಗಲೇ ಸುಮಾರು ಹತ್ತು ಶೇಕಡಾ ಟ್ರಕ್ಗಳು ರಸ್ತೆಗಿಳಿಯುತ್ತಿಲ್ಲ. ಇಂಧನ ಬೆಲೆ ಮತ್ತಷ್ಟು ಏರಿಕೆಯಾದರೆ ಈ ಸಂಖ್ಯೆ 30 ಶೇಕಡಾಕ್ಕೆ ತಲುಪಬಹುದು” ಎಂದು ಅವರು ಆತಂಕ ವ್ಯಕ್ತಪಡಿಸಿದ್ದಾರೆ. ಚಾಲಕರು ಈಗಾಗಲೇ ಅನಧಿಕೃತ ಇಂಧನ ರೇಷನಿಂಗ್ ಎದುರಿಸುತ್ತಿದ್ದು, ಇದರಿಂದ ಸರುಕು ಸಾಗಾಣಿಕೆ ವಿಳಂಬವಾಗುತ್ತಿದೆ.
ದೇಶದ ಸರಕು ಸಾಗಾಣಿಕೆಯ ಸುಮಾರು 70 ಶೇಕಡಾ ಭಾಗವು ರಸ್ತೆ ಮಾರ್ಗಗಳ ಮೂಲಕವೇ ನಡೆಯುವುದರಿಂದ, ಡೀಸೆಲ್ ನಮ್ಮ ಆರ್ಥಿಕತೆಯ ಜೀವನಾಡಿಯಾಗಿದೆ. ನಯಾರಾ ಎನರ್ಜಿ, ರಿಲಯನ್ಸ್ ಇಂಡಸ್ಟ್ರೀಸ್ ಮತ್ತು ಬಿಪಿ ಪಿಎಲ್ಸಿ ಸಂಸ್ಥೆಗಳು ಈಗಾಗಲೇ ಸರಬರಾಜಿನಲ್ಲಿ ರೇಷನಿಂಗ್ ಅಥವಾ ದರ ಏರಿಕೆಯನ್ನು ಜಾರಿಗೆ ತಂದಿವೆ. ಇದರಿಂದಾಗಿ ಸರ್ಕಾರಿ ಇಂಧನ ಕೇಂದ್ರಗಳ ಮೇಲೆ ಬೇಡಿಕೆಯ ಒತ್ತಡ ಹೆಚ್ಚಾಗಿದ್ದು, ಹಲವೆಡೆ ಸ್ಟಾಕ್ ಖಾಲಿಯಾಗುವ ಸ್ಥಿತಿ ನಿರ್ಮಾಣವಾಗಿದೆ.
ಸ್ಟ್ಯಾಂಡರ್ಡ್ ಚಾರ್ಟರ್ಡ್ ಪಿಎಲ್ಸಿಯ ವರದಿಯ ಪ್ರಕಾರ, ಈ ಆರ್ಥಿಕ ವರ್ಷದಲ್ಲಿ ಬ್ರೆಂಟ್ ಕಚ್ಚಾ ತೈಲದ ಬೆಲೆ ಸರಾಸರಿ 95 ಡಾಲರ್ (ಪ್ರತಿ ಬ್ಯಾರೆಲ್) ಇದ್ದರೆ, ಸರ್ಕಾರವು ಲೀಟರ್ಗೆ 8 ರಿಂದ 15 ರೂಪಾಯಿಗಳವರೆಗೆ ಬೆಲೆ ಹೆಚ್ಚಿಸಬೇಕಾಗಬಹುದು. ಅಡುಗೆ ಅನಿಲದ ಬೆಲೆಯೂ ಏರಿಕೆಯಾಗುವ ಸಾಧ್ಯತೆಯಿದೆ. ಒಂದು ವೇಳೆ ಬ್ಯಾರೆಲ್ಗೆ 85 ರಿಂದ 90 ಡಾಲರ್ ಬೆಲೆ ಇದ್ದರೆ, ಲೀಟರ್ಗೆ 3 ರಿಂದ 7 ರೂಪಾಯಿ ಹೆಚ್ಚಳವಾಗಬಹುದು. ಸದ್ಯ ಬ್ರೆಂಟ್ ಕಚ್ಚಾ ತೈಲದ ಬೆಲೆ ಪ್ರತಿ ಬ್ಯಾರೆಲ್ಗೆ 96 ಡಾಲರ್ ಇದೆ.
