ಗಾಜಾ: ಅಮೆರಿಕದ ಬೆಂಬಲದೊಂದಿಗೆ ಇಸ್ರೇಲ್ ನಡೆಸುತ್ತಿರುವ ದೌರ್ಜನ್ಯಗಳಿಗೆ ಯಾವುದೇ ಮಿತಿಯಿಲ್ಲದಂತಾಗಿದೆ. ಗಾಜಾದಲ್ಲಿ ಇಸ್ರೇಲ್ ನಡೆಸಿದ ಅಮಾನವೀಯ ದಾಳಿಗಳಲ್ಲಿ, ಮಂಗಳವಾರ ಬೆಳಗ್ಗೆ 10 ಗಂಟೆಯವರೆಗಿನ 24 ಗಂಟೆಗಳಲ್ಲಿ 89 ಪ್ಯಾಲೆಸ್ತೀನಿಯನ್ನರು ಮೃತಪಟ್ಟಿದ್ದಾರೆ.
ಇವರಲ್ಲಿ 31 ಜನರು ಆಹಾರಕ್ಕಾಗಿ ಹೋಗಿ ಜೀವ ಕಳೆದುಕೊಂಡಿದ್ದಾರೆ ಎಂದು ಗಾಜಾದ ಆರೋಗ್ಯ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ. ಇದೇ ವೇಳೆ, ಐವರು ಪ್ಯಾಲೆಸ್ತೀನಿಯನ್ನರು, ಇಬ್ಬರು ಮಕ್ಕಳು ಸೇರಿದಂತೆ, ತೀವ್ರ ಆಹಾರದ ಕೊರತೆಯಿಂದಾಗಿ ಸಾವನ್ನಪ್ಪಿದ್ದಾರೆ ಎಂದು ವರದಿಯಾಗಿದೆ.
ಇದು ಹಸಿವಿನಿಂದ ಮೃತಪಟ್ಟವರ ಸಂಖ್ಯೆಯನ್ನು 227ಕ್ಕೆ ಏರಿಸಿದೆ, ಇದರಲ್ಲಿ 103 ಮಕ್ಕಳು ಸೇರಿರುವುದು ದುರದೃಷ್ಟಕರ ಸಂಗತಿ.
ಮೇ 27 ರಿಂದ ಇಲ್ಲಿಯವರೆಗೆ ಆಹಾರ ಕೇಂದ್ರಗಳ ಮೇಲೆ ನಡೆದ ದಾಳಿಗಳಲ್ಲಿ ಮೃತಪಟ್ಟವರ ಸಂಖ್ಯೆ 1,655 ತಲುಪಿದ್ದು, 11,800ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದಾರೆ.
ಆಹಾರ ವಿತರಣಾ ಕೇಂದ್ರಗಳಿಂದ ಗಾಯಗೊಂಡು ಬರುತ್ತಿರುವ ಜನರಿಂದ ಆಸ್ಪತ್ರೆಗಳು ತುಂಬಿ ತುಳುಕುತ್ತಿದ್ದು, ರಕ್ತ ಮತ್ತು ಪ್ಲಾಸ್ಮಾ ಕೊರತೆ ತೀವ್ರವಾಗಿದೆ ಎಂದು ವಿಶ್ವಸಂಸ್ಥೆ ಕಳವಳ ವ್ಯಕ್ತಪಡಿಸಿದೆ.
ಕಳೆದ ಜುಲೈನಲ್ಲಿ ಐದು ವರ್ಷದೊಳಗಿನ ಸುಮಾರು 12,000 ಮಕ್ಕಳು ತೀವ್ರ ಪೌಷ್ಟಿಕಾಂಶ ಕೊರತೆಯಿಂದ ಬಳಲುತ್ತಿರುವುದು ಪತ್ತೆಯಾಗಿದೆ. ಇಸ್ರೇಲ್ ಪಡೆಗಳು ಗಾಜಾದಲ್ಲಿ ನಾಲ್ಕು ಜನ ಪತ್ರಕರ್ತರನ್ನು ಹತ್ಯೆ ಮಾಡಿದ ಹಿನ್ನೆಲೆಯಲ್ಲಿ ಪ್ಯಾಲೆಸ್ತೀನಿಯನ್ನರು ಅವರಿಗೆ ಅಂತಿಮ ಸಂಸ್ಕಾರ ನೆರವೇರಿಸಿದರು. ಈ ಹತ್ಯೆಗಳನ್ನು ಖಂಡಿಸಿ ಲಂಡನ್, ಬರ್ಲಿನ್, ಟ್ಯೂನಿಸ್, ರಮಲ್ಲಾ ಸೇರಿದಂತೆ ವಿಶ್ವದಾದ್ಯಂತ ಹಲವಾರು ಕಡೆ ರ್ಯಾಲಿಗಳು ಮತ್ತು ಪ್ರತಿಭಟನೆಗಳು ನಡೆದಿವೆ.
ಈ ದಾಳಿಯನ್ನು ಯುರೋಪಿಯನ್ ಯೂನಿಯನ್ (EU), ಚೀನಾ ಮತ್ತು ಜರ್ಮನಿ ತೀವ್ರವಾಗಿ ಖಂಡಿಸಿವೆ. ಇದು ಅಂತರರಾಷ್ಟ್ರೀಯ ಮಾನವೀಯ ಕಾನೂನಿನ ಉಲ್ಲಂಘನೆ ಎಂದು ವಿಶ್ವಸಂಸ್ಥೆ ಹೇಳಿದೆ. ಗಾಜಾದಲ್ಲಿನ ಮಾನವೀಯ ಬಿಕ್ಕಟ್ಟು ನಿರೀಕ್ಷೆಗೂ ಮೀರಿದ ಮಟ್ಟಕ್ಕೆ ತಲುಪಿದೆ ಎಂದು ಬ್ರಿಟನ್, ಕೆನಡಾ, ಆಸ್ಟ್ರೇಲಿಯಾ, ಜಪಾನ್ ಮತ್ತು ಇತರ 23 ಯುರೋಪಿಯನ್ ರಾಷ್ಟ್ರಗಳು ತಿಳಿಸಿವೆ. ಗಾಜಾಕ್ಕೆ ಹೆಚ್ಚಿನ ನೆರವು ನೀಡಲು ಇಸ್ರೇಲ್‌ಗೆ ಮನವಿ ಮಾಡಿವೆ.
