ಬೆಂಗಳೂರು: ನೂರಾರು ಅಕ್ರಮ (ಮ್ಯೂಲ್) ಬ್ಯಾಂಕ್ ಖಾತೆಗಳು ಹಾಗೂ ದುರುದ್ದೇಶಪೂರಿತ ಆಂಡ್ರಾಯ್ಡ್ ಅಪ್ಲಿಕೇಶನ್ (ಎಪಿಕೆ) ಫೈಲ್ಗಳ ಮೂಲಕ ಹಣ ವರ್ಗಾವಣೆ ಮಾಡುತ್ತಿದ್ದ ಬೃಹತ್ ಅಂತಾರಾಜ್ಯ ಸೈಬರ್ ವಂಚನೆ ಜಾಲವನ್ನು ಕರ್ನಾಟಕ ಸೈಬರ್ ಕಮಾಂಡ್ ಭೇದಿಸಿದೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಮೂವರು ಪ್ರಮುಖ ಆರೋಪಿಗಳನ್ನು ಬಂಧಿಸಲಾಗಿದ್ದು, ಆನ್ಲೈನ್ ಹೂಡಿಕೆ ಹಗರಣಗಳ ವ್ಯಾಪಕ ಜಾಲ ಬೆಳಕಿಗೆ ಬಂದಿದೆ.
ಬಂಧಿತ ಆರೋಪಿಗಳನ್ನು ಜಾರ್ಖಂಡ್ನ ಪೂರ್ವ ಸಿಂಗ್ಭೂಮ್ ನಿವಾಸಿ ಅಮಿತ್ ಮಿಶ್ರಾ, ಬೆಂಗಳೂರಿನ ಜೆ.ಸಿ. ನಗರದ ತೌಸಿಫ್ ಅಹ್ಮದ್ ಮತ್ತು ಜೀವನ್ ಭೀಮಾನಗರ ನಿವಾಸಿ ಪರಶುರಾಮ್ ಸದಾನಂದ ಕಣ್ಣನ್ನವರ್ ಎಂದು ಗುರುತಿಸಲಾಗಿದೆ.
ಬೆಂಗಳೂರು ನಿವಾಸಿ ಹರೀಶ್ ಕುಮಾರ್ ಕೆ.ಎನ್. ಎಂಬುವರು ನೀಡಿದ ₹93.58 ಲಕ್ಷ ಆನ್ಲೈನ್ ಟ್ರೇಡಿಂಗ್ ವಂಚನೆ ದೂರಿನ ಮೇರೆಗೆ ತನಿಖೆ ಆರಂಭಿಸಿದ ಪೊಲೀಸರು ಆರೋಪಿಗಳನ್ನು ಸೆರೆಹಿಡಿದಿದ್ದಾರೆ. ಪೊಲೀಸರ ಪ್ರಕಾರ, ಸಂತ್ರಸ್ತರನ್ನು “ಎಲ್ ಇನ್ವೆಸ್ಟ್ಮೆಂಟ್ ಸ್ಟ್ರಾಟಜೀಸ್ ಡಿಸ್ಕಷನ್” ಎಂಬ ವಾಟ್ಸಾಪ್ ಗ್ರೂಪ್ಗೆ ಸೇರಿಸಿ ನಿಯಮಿತವಾಗಿ ಹೂಡಿಕೆ ಸಲಹೆಗಳನ್ನು ನೀಡಲಾಗಿತ್ತು. ಬಳಿಕ “ಫ್ಯಾರಲಾನ್ ಸಿಎಂ” ಎಂಬ ಟ್ರೇಡಿಂಗ್ ಪ್ಲಾಟ್ಫಾರ್ಮ್ನಲ್ಲಿ ಖಾತೆ ತೆರೆಯುವಂತೆ ಮಾಡಿ, ಆರಂಭದಲ್ಲಿ ₹50,000 ಹೂಡಿಕೆ ಮಾಡಿಸಲಾಯಿತು. ನಂತರ ಹೆಚ್ಚಿನ ಲಾಭದ ಆಮಿಷವೊಡ್ಡಿ ಹಂತ ಹಂತವಾಗಿ ವಿವಿಧ ಬ್ಯಾಂಕ್ ಖಾತೆಗಳಿಗೆ ಒಟ್ಟು ₹93,58,555 ವರ್ಗಾಯಿಸಿಕೊಳ್ಳಲಾಗಿತ್ತು. ಆದರೆ, ವಾಗ್ದಾನ ಮಾಡಿದ ಲಾಭ ಸಂತ್ರಸ್ತರಿಗೆ ಸಿಗಲೇ ಇಲ್ಲ.
ದೂರಿನ ಆಧಾರದ ಮೇಲೆ ಪ್ರಕರಣ ದಾಖಲಿಸಿಕೊಂಡ ಸೈಬರ್ ಕ್ರೈಂ ಪೊಲೀಸರು, ತಾಂತ್ರಿಕ ಮಾಹಿತಿ ಮತ್ತು ನಿಗಾ ವ್ಯವಸ್ಥೆಯ ನೆರವಿನಿಂದ ಆರೋಪಿಗಳನ್ನು ಕಚೋಹಳ್ಳಿಯ ಹೋಟೆಲ್ವೊಂದರಲ್ಲಿ ಪತ್ತೆಹಚ್ಚಿದರು. ಅಲ್ಲಿ ಅವರು ಅತ್ಯಾಧುನಿಕ ಹಣ ವರ್ಗಾವಣೆ ಜಾಲವನ್ನು ನಿರ್ವಹಿಸುತ್ತಿರುವುದು ತಿಳಿದುಬಂದಿದೆ. ಸೈಬರ್ ಅಪರಾಧಗಳಿಗಾಗಿ ಪಡೆದ ಬ್ಯಾಂಕ್ ಖಾತೆಗಳ ಮೂಲಕ ಅಕ್ರಮ ಹಣವನ್ನು ವರ್ಗಾಯಿಸಲು ಆರೋಪಿಗಳು “ZNPAY” ಎಂಬ ಅಪ್ಲಿಕೇಶನ್ ಬಳಸುತ್ತಿದ್ದರೆಂದು ತನಿಖಾಧಿಕಾರಿಗಳು ತಿಳಿಸಿದ್ದಾರೆ.
ತನಿಖೆಯ ವೇಳೆ, ಧರ್ಮಾರ್ಥ ದೇಣಿಗೆ ನೀಡುವುದಾಗಿ ನಂಬಿಸಿ ಶಿಕ್ಷಣ ಟ್ರಸ್ಟ್ವೊಂದರ ಪ್ರತಿನಿಧಿಗಳಿಂದ ಬ್ಯಾಂಕ್ ಖಾತೆ ವಿವರಗಳನ್ನು ಪಡೆದುಕೊಂಡಿದ್ದ ಈ ಜಾಲ, ವಂಚಿಸಿದ ಮೊತ್ತದಲ್ಲಿ ₹5 ಲಕ್ಷವನ್ನು ಆ ಟ್ರಸ್ಟ್ನ ಖಾತೆಗೆ ವರ್ಗಾಯಿಸಿರುವುದು ಪತ್ತೆಯಾಗಿದೆ.
ದೇಶಾದ್ಯಂತ ಕಾರ್ಯಾಚರಿಸುವ ಸೈಬರ್ ಅಪರಾಧ ಜಾಲಗಳಿಗೆ ಕರೆಂಟ್, ಕಾರ್ಪೊರೇಟ್ ಮತ್ತು ಟ್ರಸ್ಟ್ ಬ್ಯಾಂಕ್ ಖಾತೆಗಳು, ಇಂಟರ್ನೆಟ್ ಬ್ಯಾಂಕಿಂಗ್ ವಿವರಗಳು ಹಾಗೂ ನೋಂದಾಯಿತ ಸಿಮ್ ಕಾರ್ಡ್ಗಳನ್ನು ಪೂರೈಸುವುದರಲ್ಲಿ ಈ ಗ್ಯಾಂಗ್ ಪರಿಣತಿ ಹೊಂದಿತ್ತು. ಖಾತೆಗಳನ್ನು ಒದಗಿಸಿದ ವ್ಯಕ್ತಿಗಳನ್ನು ಹೋಟೆಲ್ಗಳಲ್ಲಿ ಇರಿಸಿಕೊಂಡು, ಅವರ ಮೊಬೈಲ್ಗಳಲ್ಲಿ ವಿಶೇಷ ಎಪಿಕೆ ಫೈಲ್ಗಳು ಮತ್ತು ಎಸ್ಎಂಎಸ್-ಫಾರ್ವರ್ಡ್ ಮಾಡುವ ಆ್ಯಪ್ಗಳನ್ನು ಇನ್ಸ್ಟಾಲ್ ಮಾಡಲಾಗುತ್ತಿತ್ತು. ಇದರಿಂದ ಖಾತೆದಾರರಿಗೆ ತಿಳಿಯದಂತೆ ದೂರದಲ್ಲೇ ಕುಳಿತ ವಂಚಕರು ನೈಜ ಸಮಯದಲ್ಲಿ ಬ್ಯಾಂಕಿಂಗ್ ಒಟಿಪಿಗಳನ್ನು (OTP) ಪಡೆದು ಆರ್ಥಿಕ ವಹಿವಾಟುಗಳನ್ನು ನಿಯಂತ್ರಿಸುತ್ತಿದ್ದರು.
ಆರೋಪಿಗಳಿಂದ ವಶಪಡಿಸಿಕೊಂಡ ಆರು ಮೊಬೈಲ್ ಫೋನ್ಗಳ ವಿಧಿವಿಜ್ಞಾನ ಪರೀಕ್ಷೆಯ ವೇಳೆ ಕರ್ನಾಟಕ, ದೆಹಲಿ, ಮಹಾರಾಷ್ಟ್ರ ಸೇರಿದಂತೆ ಹಲವು ರಾಜ್ಯಗಳ ಸೈಬರ್ ಅಪರಾಧ ದೂರುಗಳಿಗೆ ಸಂಬಂಧಿಸಿದ 507 ಮ್ಯೂಲ್ ಬ್ಯಾಂಕ್ ಖಾತೆಗಳ ವಿವರಗಳು ಪತ್ತೆಯಾಗಿವೆ. ಕೇವಲ ಒಂದು ಇಂಡಸ್ಇಂಡ್ ಬ್ಯಾಂಕ್ ಖಾತೆಯ ಮೂಲಕ ₹38 ಲಕ್ಷಕ್ಕೂ ಹೆಚ್ಚು ಹಾಗೂ ಬ್ಯಾಂಕ್ ಆಫ್ ಇಂಡಿಯಾ ಖಾತೆಯ ಮೂಲಕ ₹13 ಲಕ್ಷಕ್ಕೂ ಅಧಿಕ ಅಕ್ರಮ ಹಣದ ವಹಿವಾಟು ನಡೆದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಅಕ್ರಮ ಹಣ ವರ್ಗಾವಣೆಯನ್ನು ಸ್ವಯಂಚಾಲಿತಗೊಳಿಸಲು ಮತ್ತು ಮರೆಮಾಚಲು ಬಳಸಲಾಗಿದ್ದ ZNPAY ಸೇರಿದಂತೆ 51 ಸಂಶಯಾಸ್ಪದ ಎಪಿಕೆ ಫೈಲ್ಗಳನ್ನೂ ವಶಪಡಿಸಿಕೊಳ್ಳಲಾಗಿದೆ.
ಖಾತೆಗಳನ್ನು ಪಡೆಯಲು ಮತ್ತು ಹಣ ವರ್ಗಾವಣೆ ಸಮನ್ವಯಕ್ಕೆ ಆರೋಪಿಗಳು ವಾಟ್ಸಾಪ್ ಹಾಗೂ ಟೆಲಿಗ್ರಾಂ ಬಳಸುತ್ತಿದ್ದರೆ, ಆಂತರಿಕ ಸಂವಹನಕ್ಕೆ ಯುಎಇ ಮೂಲದ ‘ಬೋಟಿಮ್’ (Botim) ಮೆಸೇಜಿಂಗ್ ಆ್ಯಪ್ ಬಳಸುತ್ತಿದ್ದರು. ಅಕ್ರಮವಾಗಿ ಗಳಿಸಿದ ಹಣವನ್ನು ಕ್ರಿಪ್ಟೋಕರೆನ್ಸಿಯಾಗಿ ಪರಿವರ್ತಿಸಿ ಬೈನಾನ್ಸ್ ವಾಲೆಟ್ಗಳಿಗೆ ವರ್ಗಾಯಿಸಲಾಗುತ್ತಿತ್ತು.
ಟೆಲಿಗ್ರಾಂ ಮತ್ತು ವಾಟ್ಸಾಪ್ ಖಾತೆಗಳ ಐಪಿ ಜಿಯೋಲೊಕೇಶನ್ ಡೇಟಾವು ಕೋಲ್ಕತ್ತಾ, ಹಾಂಗ್ ಕಾಂಗ್ ಮತ್ತು ಅಮೆರಿಕದ ಕ್ಯಾಲಿಫೋರ್ನಿಯಾ ಮೂಲಕ ಹಾದುಹೋಗಿರುವುದನ್ನು ಡಿಜಿಟಲ್ ವಿಶ್ಲೇಷಣೆ ದೃಢಪಡಿಸಿದೆ. ಇದು ಈ ವಂಚನೆ ಕಾರ್ಯಾಚರಣೆಯು ಅಂತಾರಾಷ್ಟ್ರೀಯ ಸರ್ವರ್ಗಳು ಮತ್ತು ಪ್ರಾಕ್ಸಿ ಮೂಲಸೌಕರ್ಯಗಳನ್ನು ಅವಲಂಬಿಸಿದೆ ಎಂಬುದನ್ನು ಸೂಚಿಸುತ್ತದೆ.
ಅನೂಪ್ ಅಲಿಯಾಸ್ ಜುಲ್ಪಿ ಎಂಬಾತ ಸೇರಿದಂತೆ ತಲೆಮರೆಸಿಕೊಂಡಿರುವ ಇತರ ಆರೋಪಿಗಳ ಪತ್ತೆಗೆ ಹಾಗೂ ಈ ಜಾಲವನ್ನು ನಿಯಂತ್ರಿಸುತ್ತಿರುವ ದೊಡ್ಡ ಅಂತಾರಾಜ್ಯ ಮತ್ತು ವಿದೇಶಿ ಜಾಲವನ್ನು ಬೇಧಿಸಲು ಪೊಲೀಸರು ಶೋಧ ತೀವ್ರಗೊಳಿಸಿದ್ದಾರೆ.
