ಒಂದಿವ್ಸ ಅಲ್ವ…ಅಡ್ಜಸ್ಟ್ ಮಾಡ್ಕೊಳ್ಳಿ

ಪುರುಷರಿಗೆ ಮತ್ತು ಮಹಿಳಾ ಸಿಬ್ಬಂದಿಗಳಿಗೆ ಪ್ರತ್ಯೇಕ ಕೋಣೆಗಳು ಲಭ್ಯವಾಗದಿದ್ದಾಗಲೂ, ಶೌಚಾಲಯದಲ್ಲಿ ಸ್ನಾನ ಮಾಡಲು, ಬಟ್ಟೆ ಇಟ್ಟುಕೊಳ್ಳಲು ಯಾವ ವ್ಯವಸ್ಥೆ ಇಲ್ಲದಿದ್ದರೂ, ನೀರು ತುಂಬಿಕೊಳ್ಳಲು ಬಕೇಟೇ ಇಲ್ಲದಿದ್ದರೂ, ಮೂರು ಮತಗಟ್ಟೆಗಳಿಗೆ ಒಂದೇ ಬಕೆಟ್‌ ಮಗ್‌ ಇದ್ದಾಗಲೂ  ಹೇಗೋ ಅಡ್ಜೆಸ್ಟ್ ಆಗ್ಬೇಕಿರುವುದು ಅನಿವಾರ್ಯ – ವಿದ್ಯಾ ಕಾರ್ಕಳ

 ಚುನಾವಣೆಯು ಪ್ರಜಾಪ್ರಭುತ್ವ ವ್ಯವಸ್ಥೆಯ ಜೀವಾಳ. ಚುನಾವಣೆಯು ಯಶಸ್ವಿಯಾಗಿ, ವಿಶ್ವಾಸಪೂರ್ಣವಾಗಿ ನಡೆಯುವುದರಲ್ಲೇ ಪ್ರಜಾಪ್ರಭುತ್ಟದ ಅರ್ಧ ಯಶಸ್ಸು ಅಡಗಿದೆ ಎನ್ನಬಹುದು. ನಾಮಪತ್ರ ಸಲ್ಲಿಕೆಯಿಂದ ಆರಂಭಿಸಿ ಮತ ಎಣಿಕೆಯ ತನಕದ ಪ್ರತಿ ಹಂತವೂ ಬಹಳ ಮುಖ್ಯವಾದುದು. ಪ್ರತಿ ಹಂತವನ್ನೂ ಬಹಳಷ್ಟು ಸುರಕ್ಷಾ ಕ್ರಮಗಳೊಂದಿಗೆ ಕಟ್ಟೆಚ್ಚರದಲ್ಲಿ ಚುನಾವಣಾ ಆಯೋಗ ನಿರ್ವಹಿಸುತ್ತದೆ. ಒಂದು ಚುನಾವಣೆಯು ಯಶಸ್ವಿಯಾಗುವಲ್ಲಿ ವಿವಿಧ ಇಲಾಖೆಗಳ ಸಾವಿರಾರು ಅಧಿಕಾರಿಗಳ ಮತ್ತು ಸಿಬ್ಬಂದಿಗಳ ಶ್ರಮವಿರುತ್ತದೆ.

ಚುನಾವಣೆ –  ಮತದಾರಸ್ನೇಹಿ  ಸುಧಾರಣೆಗಳು

ಮತದಾನವು ಮತದಾರ ಸ್ನೇಹಿಯಾಗುವಂತೆ ವರ್ಷದಿಂದ ವರ್ಷಕ್ಕೆ ವಿನೂತನ ಕ್ರಮಗಳನ್ನು  ಚುನಾವಣಾ ಆಯೋಗವು  ಜಾರಿಗೊಳಿಸುತ್ತಿದೆ.  ಮತಗಟ್ಟೆಗೆ ಆಗಮಿಸುವ ವೃದ್ಧರಿಗೂ ವಿಶೇಷಚೇತನರಿಗೂ ಅನುಕೂಲವಾಗಲು  ರಾಂಪ್, ಕುಡಿಯುವ ನೀರಿನ ವ್ಯವಸ್ಥೆ  ಪ್ರತಿ ಮತಗಟ್ಟೆಗೂ ಇದೆ ಎಂಬುದನ್ನು ಖಚಿತ ಪಡಿಸಿಕೊಳ್ಳುತ್ತದೆ. ಅಗತ್ಯವಿದ್ದಲ್ಲಿ ಮತದಾರರಿಗೆ ನೆರಳಿಗೆ ಶಾಮಿಯಾನದ ವ್ಯವಸ್ಥೆಯನ್ನೂ ಮಾಡಲಾಗುತ್ತದೆ. ಈ ಬಾರಿಯಂತೂ ಹಲವು ಮಾದರಿ ಮತಗಟ್ಟೆಗಳನ್ನು ವಿವಿಧ ಥೀಮ್ ಆಧಾರಿತವಾಗಿ ರಚಿಸಿದ್ದು ಮತಗಟ್ಟೆಗಳನ್ನು ಆಕರ್ಷಕವಾಗಿ ಮಾಡುವ ಪರಿಕಲ್ಪನೆಯನ್ನೂ ಚುನಾವಣಾ ಆಯೋಗ ಹೊಂದಿದೆ ಎಂಬುದು ನಮಗೆ ತಿಳಿದು ಬರುತ್ತದೆ.

ಮತಗಟ್ಟೆಗಳು ಸಿಬ್ಬಂದಿ ಸ್ನೇಹಿಗಳಾಗುವ ಅಗತ್ಯ

ವಿವಿಧ ಇಲಾಖೆಯ ನಿಯೋಜಿತ  ಅಧಿಕಾರಿಗಳು, ಸಿಬ್ಬಂದಿಗಳು ಮತ್ತು   ಅರೆಸೇನೆಯ ಸಶಸ್ತ್ರಪಡೆಯ ಸಿಬ್ಬಂದಿಗಳು ಆಯಾ ಮತಗಟ್ಟೆಯ ಯಶಸ್ವಿ ಮತದಾನದ  ಜವಾಬ್ದಾರಿಯೊಂದಿಗೆ ಎರಡು ದಿನಗಳ ಕಾಲ ಮತಗಟ್ಟೆಯಲ್ಲೇ ವಾಸ್ತವ್ಯ ಹೂಡುತ್ತಾರೆ. ಅವರು ಮತದಾನ ದಿನದಂದು ಯಾವುದೇ ಚ್ಯುತಿ ಬರದಂತೆ ಸೂಕ್ತ ಸಿದ್ಧತೆಗಳನ್ನು ಮಾಡಿ ಕಾರ್ಯ ನಿರ್ವಹಿಸುತ್ತಾರೆ. ಈ ಸಂದರ್ಭ ನಿಷ್ಪಕ್ಷಪಾತವಾದ ಮತದಾನ ನೆರವೇರಬೇಕೆಂಬ ಉದ್ದೇಶದಿಂದ ಅಧಿಕಾರಿಗಳನ್ನೂ,  ಸಿಬ್ಬಂದಿಗಳನ್ನೂ ಸಾಮಾನ್ಯವಾಗಿ ಅವರ ವಾಸ್ತವ್ಯದ ನೆಲೆಯಿಂದ ಹೊರತಾದ ತಾಲೂಕಿಗೇ ಚುನಾವಣಾ ಕರ್ತವ್ಯಕ್ಕೆ ನಿಯೋಜಿಸಿರುತ್ತಾರೆ. ಇತ್ತೀಚಿನ ವರ್ಷಗಳಲ್ಲಿ ಮಹಿಳಾ ಸಿಬ್ಬಂದಿಗಳನ್ನು ಅವರವರ ತಾಲೂಕಿನಲ್ಲೇ ಕರ್ತವ್ಯ ನಿರ್ವಹಿಸಲು ಅವಕಾಶ ಮಾಡಿ ಕೊಟ್ಟಿದ್ದಾರೆ. ಆದರೂ, ಅದು ಅವರ ವೃತ್ತಿನಿರತ ತಾಲೂಕಿಗೆ ಸಂಬಂಧ ಪಟ್ಟದ್ದಾಗಿರುತ್ತದೆಯೇ ಹೊರತು ಮೂಲ ವಾಸ್ತವ್ಯದ ಪ್ರದೇಶಕ್ಕಲ್ಲ. ಹೀಗಾಗಿ ಸಾಮಾನ್ಯವಾಗಿ ದೂರದೂರಿನಿಂದ ವೃತ್ತಿನಿರತ ಸ್ಥಳಗಳಿಗೆ ಓಡಾಡುವ ಹಲವಾರು ಮಹಿಳೆಯರು  ಮನೆಯಿಂದ  ದೂರದ ಸ್ಥಳಗಳಲ್ಲಿಯೇ ಚುನಾವಣಾ ಕರ್ತವ್ಯವನ್ನೂ ನಿರ್ವಹಿಸಬೇಕಾಗುತ್ತದೆ. ಆಕಸ್ಮಿಕವಾಗಿ ಕೆಲವೊಮ್ಮೆ ಸಿಬ್ಬಂದಿಗಳಿಗೆ ಮನೆಯ ಹತ್ತಿರದ ಮತಗಟ್ಟೆ ಲಭ್ಯವಾದರೂ ಮತದಾನ ಯಂತ್ರಗಳ ಸುರಕ್ಷತಾ ದೃಷ್ಟಿಯಿಂದ ಕರ್ತವ್ಯಕ್ಕೆ ನಿಯೋಜಿಸಲ್ಪಟ್ಟವರು ಆಯಾಯ ಮತಗಟ್ಟೆಯಲ್ಲಿಯೇ ಉಳಿದುಕೊಳ್ಳುವುದು ಕಡ್ಡಾಯವಾಗಿರುತ್ತದೆ. ಹೀಗೆ ಮನೆಯಿಂದ ದೂರದ ಸ್ಥಳಗಳಲ್ಲಿ ಕರ್ತವ್ಯ ನಿರ್ವಹಿಸುವಾಗ ಮತಗಟ್ಟೆ ಅಧಿಕಾರಿಗಳಿಗೆ ಮತ್ತು ಸಿಬ್ಬಂದಿಗಳಿಗೆ ಮೂಲಭೂತ ಅವಶ್ಯಕತೆಗಳನ್ನು ಒದಗಿಸುವುದು ಅಗತ್ಯವಾಗಿದೆ. 

ಮತಗಟ್ಟೆ ಸಿಬ್ಬಂದಿಗಳಿಗೆ ಮೂಲಭೂತ ಸೌಕರ್ಯದ ಕೊರತೆ

ಮತಗಟ್ಟೆಯ ವಾಸ್ತವ್ಯ ಪರಿಸರದಲ್ಲಿ ಸಿಬ್ಬಂದಿಗಳಿಗೆ ಮೂಲಭೂತ ವ್ಯವಸ್ಥೆಯನ್ನು ಒದಗಿಸಿ ಕೊಡಲು ಮತಗಟ್ಟೆಯ ಸೌಲಭ್ಯಗಳನ್ನು ಚುನಾವಣಾ ಪೂರ್ವದಲ್ಲಿ ಎರಡೆರಡು ಬಾರಿ ಪರಿಶೀಲಿಸಲಾಗುತ್ತದೆ. ಪ್ರತಿ ಮತಗಟ್ಟೆಗೆ ವಿದ್ಯುತ್ ವ್ಯವಸ್ಥೆ ಮತ್ತು ಶೌಚಾಲಯ ಸೌಲಭ್ಯ ಇರುವುದನ್ನು ಖಾತ್ರಿ ಪಡಿಸಿಕೊಳ್ಳಲಾಗುತ್ತದೆ. ಹೀಗಿದ್ದಾಗಲೂ ಮತಗಟ್ಟೆ ಸಿಬ್ಬಂದಿಗಳು ಮೂಲಭೂತ ಸೌಲಭ್ಯಗಳು ಸಮರ್ಪಕವಾಗಿರದೆ  ತೊಂದರೆಗೊಳಗಾಗುತ್ತಿದ್ದಾರೆ. ಮತಗಟ್ಟೆಗಳಲ್ಲಿ ಶೌಚಾಲಯಗಳಿದ್ದರೂ ಬಹುತೇಕ ಸಂದರ್ಭ ಬಳಕೆಗೆ ಯೋಗ್ಯವಾಗಿ ಸ್ವಚ್ಛವಾಗಿರುವುದಿಲ್ಲ ಮಾತ್ರವಲ್ಲದೆ ಅಗತ್ಯವಾದ ಬಕೇಟ್ – ಮಗ್ ಗಳ ವ್ಯವಸ್ಥೆಯೂ ಇರುವುದಿಲ್ಲ. ಕೆಲವೊಂದು ಸಂದರ್ಭ ಮೂರು ಮತಗಟ್ಟೆಗಳು ಒಂದೇ ಕಡೆ ಇದ್ದಾಗ ಸಿಬ್ಬಂದಿಗಳ ಸಂಖ್ಯೆಯೂ ಹೆಚ್ಚಿರುತ್ತದೆ. ಶೌಚಾಲಯಗಳು ಹಳತು-ಹೊಸತು ಸೇರಿ ಮೂರು – ನಾಲ್ಕು ಇದ್ದರೂ ಬಕೇಟ್ -ಮಗ್ ಒಂದೇ ಇದ್ದಾಗ, ಅಷ್ಟು ಸಂಖ್ಯೆಯ ಶೌಚಾಲಯಗಳಿರುವುದೂ ಪ್ರಯೋಜನಕ್ಕೆ ಬಂದಿರುವುದಿಲ್ಲ. ಹಲವಾರು ಶೌಚಾಲಯಗಳಿಗೆ ಇದ್ದ ಒಂದೇ ಒಂದು ಬಕೇಟ್ – ಮಗ್  ಪೇಂಟ್ ನ ಡಬ್ಬಗಳಾಗಿದ್ದು ತಳ ಕಪ್ಪಾಗಿ ಬಳಕೆಗೆ ಅಸಹ್ಯವಾಗಿರುತ್ತದೆ. ಅಂತಹ ಸಂದರ್ಭ ಸಿಬ್ಬಂದಿಗಳು ಬದಲಿ ವ್ಯವಸ್ಥೆಯನ್ನು  ಮಾಡಿಕೊಳ್ಳಲು ಹತ್ತಿರದಲ್ಲಿ ಖರೀದಿಯ ಅವಕಾಶವೂ ಇರುವುದಿಲ್ಲ, ಕಡ ತರಲು ಪರಿಚಿತ ಮನೆಗಳೂ ಇರುವುದಿಲ್ಲ. 

ಮತಗಟ್ಟೆಗಳ ಮೂಲಭೂತ ವ್ಯವಸ್ಥೆಗಳ ತೊಡಕುಗಳು

ಎಲ್ಲಾ ಮತಗಟ್ಟೆಗಳಲ್ಲೂ ಈಗ ರಾತ್ರಿ ತಂಗಲು ವಿದ್ಯುತ್ ವ್ಯವಸ್ಥೆಯ ಕೊರತೆಯಾಗುವುದಿಲ್ಲ. ಫ್ಯಾನ್ ಗಳು ಸಾಕಷ್ಟು ಇಲ್ಲದಿದ್ದರೂ,  ಎಲ್.ಇ.ಡಿ. ಬಲ್ಬ್ ಗಳ ವ್ಯವಸ್ಥೆಗಳನ್ನಂತೂ ಮಾಡಿರುತ್ತಾರೆ. ಆದರೆ ರಾತ್ರಿ ತಂಗಲು ಸಿಬ್ಬಂದಿಗಳಿಗೆ  ಹೆಚ್ಚಾಗಿ ಆಗುವ ಸಮಸ್ಯೆಯೆಂದರೆ ಪುರುಷರಿಗೆ ಮತ್ತು ಮಹಿಳಾ ಸಿಬ್ಬಂದಿಗಳಿಗೆ ಪ್ರತ್ಯೇಕ ಕೋಣೆಗಳು ಲಭ್ಯವಾಗದಿರುವುದು. ಹಾಗೊಮ್ಮೆ ಕೋಣೆಗಳು ಲಭ್ಯವಾದರೂ ಬಾಗಿಲು ಸರಿಯಾಗಿ ಮುಚ್ಚಲು  ಬಾರದ ಹಾಳಾದ ಬಾಗಿಲುಗಳೋ, ಚಿಲಕವಿಲ್ಲದ ಬಾಗಿಲುಗಳೋ ಇರುವುದು.

 ಸಾಮಾನ್ಯವಾಗಿ ಲಭ್ಯವಾಗುವ  ಶಾಲೆಗಳಲ್ಲಿ ಸಾಕಷ್ಟು ಕೋಣೆಗಳಿದ್ದರೂ ಆ ಸಂದರ್ಭ ಕರ್ತವ್ಯ ನಿರತ ಸಿಬ್ಬಂದಿಗಳಿಗೆ ಹೆಚ್ಟಾಗಿ ಮತಗಟ್ಟೆಯಾಗಿ ಇರುವ ಒಂದು ಕೋಣೆ ಮತ್ತು ರಕ್ಷಣಾ ಸಿಬ್ಬಂದಿಗಳಿಗೆಂದು ಮತ್ತೊಂದು ಕೋಣೆಯ ಕೀ ಮಾತ್ರ ಒದಗಿಸುತ್ತಾರೆ. ಇದರಿಂದಾಗಿ ಪುರುಷ – ಮಹಿಳೆ ಸಿಬ್ಬಂದಿಗಳು ಒಂದು ತಂಡದಲ್ಲಿ ಜೊತೆಯಾಗಿ ಕಾರ್ಯನಿರ್ವಹಿಸುವ ಸಂದರ್ಭ  ತಂಗುವ ವ್ಯವಸ್ಥೆಗೂ, ಮರುದಿನದ ಉಡುಗೆ ಬದಲಾವಣೆಗೂ ಪ್ರತ್ಯೇಕ ವ್ಯವಸ್ಥೆಗಳಿಲ್ಲದೆ ಪರದಾಡಬೇಕಾಗುತ್ತದೆ.

ಮತಗಟ್ಟೆಯ ಕರ್ತವ್ಯ ನಿರತ ಚುನಾವಣಾ ಸಿಬ್ಬಂದಿಗಳಿಗೆ ಸ್ಥಳೀಯ ಪಂಚಾಯತ್ ಸಹಕಾರದಿಂದ ಸಾಮಾನ್ಯವಾಗಿ ಸ್ಥಳೀಯ ಕ್ಯಾಂಟೀನ್ ನ ಊಟತಿಂಡಿಯನ್ನೂ, ಚಹಾಕಾಫಿಯನ್ನೂ ಪಾರ್ಸೆಲ್ ತಂದುಕೊಡುವ ವ್ಯವಸ್ಥೆ ಇರುತ್ತದೆ. ತೀರ ಗ್ರಾಮೀಣ ಪ್ರದೇಶಗಳಲ್ಲಿ ಸಣ್ಣಪುಟ್ಟ ಕ್ಯಾಂಟೀನ್ ಗಳಲ್ಲಿ ಚಹಾ-ಕಾಫಿ ಪಾರ್ಸೆಲ್ ನೀಡಲು ಫ್ಲಾಸ್ಕ್ ವ್ಯವಸ್ಥೆ ಇಲ್ಲದೆ ಪ್ಲಾಸ್ಟಿಕ್ ಕವರ್ ಗಳಲ್ಲಿ ಚಹಾವನ್ನು ಕಟ್ಟಿಕೊಡುವುದೂ ಇದೆ. ಒಂದೇ ಕಡೆ ಆಸುಪಾಸಲ್ಲಿ ಮೂರು – ನಾಲ್ಕು ಮತಗಟ್ಟೆ ಇದ್ದಾಗ 30-40 ಮಂದಿ ಸಿಬ್ಬಂದಿಗಳಿಗೆ ಸಾಕಷ್ಟು ಪ್ರಮಾಣದಲ್ಲಿ  ಊಟ-ತಿಂಡಿ ತಯಾರು ಮಾಡುವಂಥಹ ಸೌಲಭ್ಯ ಸ್ಥಳೀಯ ಸಣ್ಣ ಕ್ಯಾಂಟೀನ್ ಗಳಲ್ಲಿ ಇಲ್ಲದೆ ಕೆಲವು ಸಿಬ್ಬಂದಿಗಳಿಗೆ ಊಟ-ತಿಂಡಿಯ ಕೊರತೆಯಾದದ್ದೂ ಇದೆ. ಕೆಲವೊಂದು ಊರುಗಳಲ್ಲಿ ಕರ್ತವ್ಯಕ್ಕೆ ಬರುವ ಸಿಬ್ಬಂದಿಗಳು ತಮ್ಮೂರಿನ ಅತಿಥಿಗಳು ಎಂದು ಸ್ಥಳೀಯ ಮಂದಿ ಒಳ್ಳೆಯ ಊಟೋಪಚಾರದ ವ್ಯವಸ್ಥೆ ಮಾಡುವುದೂ ಇದೆ. ಆದರೆ ಇಂಥಹ ಆದರಾತಿಥ್ಯ ಗ್ರಾಮೀಣ ಪ್ರದೇಶಗಳಲ್ಲಿ ಲಭ್ಯವಾದರೂ ನಗರ ಪ್ರದೇಶಗಳಲ್ಲಿ ಇಂಥಹ ಮನೋಭಾವವಿರುವುದು ದುರ್ಲಭ. ಅದೂ ಅಲ್ಲದೆ ಯಾವುದೇ ಪಕ್ಷದ ಕಾರ್ಯಕರ್ತರಿಂದ ಸಿಬ್ಬಂದಿಗಳು ಊಟೋಪಚಾರವನ್ನು ಸ್ವೀಕರಿಸಬಾರದು ಎಂದು ನಿಯಮ ಇರುವುದರಿಂದ ಊರ  ಮಂದಿಯ ಆತಿಥ್ಯವನ್ನು ಸ್ವೀಕರಿಸಲೂ ಸಿಬ್ಬಂದಿಗಳು ಸೂಕ್ತವಾಗಿ ಪರಿಶೀಲಿಸಿ ನಿರ್ಧರಿಸಬೇಕಾಗುತ್ತದೆ. ದೂರದೂರಿನಿಂದ ಬರುವ ಸಿಬ್ಬಂದಿಗಳಿಗೆ ಊರಮಂದಿಯೋ, ಪಕ್ಷದ ಕಾರ್ಯಕರ್ತರೋ ಎಂದು ತಿಳಿಯುವುದು ಕಷ್ಟದ ಕೆಲಸವಾದ್ದರಿಂದ ಇಂತಹ ಆತಿಥ್ಯದ ಬಗ್ಗೆ ಸಿಬ್ಬಂದಿಗಳಿಗೆ ಯಾವುದೇ ನಿರೀಕ್ಷೆಯೂ ಇರುವುದಿಲ್ಲ.

 ಒಂದಿವ್ಸಲ್ಲ .. ಅಡ್ಜೆಸ್ಟ್ ಮಾಡ್ಕೊಳ್ಳಿ..

ಚುನಾವಣೆ ಮತದಾರಸ್ನೇಹಿ ಆಗುವಂತೆ  ಚುನಾವಣಾ ಆಯೋಗ ಪ್ರತಿಬಾರಿ ಹೊಸ ಹೊಸ ದಿಟ್ಟ ಕ್ರಮಗಳನ್ನು ಕೈಗೊಳ್ಳುತ್ತಿರುವಾಗ ಮತಗಟ್ಟೆಗಳು ಸಿಬ್ಬಂದಿ ಸ್ನೇಹಿಯಾಗುವುದರಲ್ಲಿ ಮಾತ್ರ ವಿಶೇಷ ಮುನ್ನಡೆ ಕಂಡು ಬರುತ್ತಿಲ್ಲ. ಇದಕ್ಕೆ ಕಾರಣವೆಂದರೆ ಸಿಬ್ಬಂದಿಗಳು ಚುನಾವಣಾ  ಕರ್ತವ್ಯಕ್ಕಾಗಿ ಮತಗಟ್ಟೆಯಲ್ಲಿ ವಾಸ್ತವ್ಯ ಇರುವುದು ಒಂದು ದಿನ ಮಾತ್ರವಲ್ಲವೇ, ಅಡ್ಜಸ್ಟ್ ಮಾಡಿಕೊಳ್ತಾರೆ ಎನ್ನುವ ಧೋರಣೆಯೇ ಆಗಿದೆ.

ಮಸ್ಟರಿಂಗ್ ಕೇಂದ್ರದಿಂದ ತಮ್ಮ ಬಟ್ಟೆಬರೆಯ ಲಗೇಜಿನೊಂದಿಗೆ  ಮತಯಂತ್ರ, ಇತರ ಪರಿಕರಗಳ ಭಾರಗಳನ್ನೆಲ್ಲ ಹೊತ್ತುಕೊಂಡು  ಮಧ್ಯಾಹ್ನ ಬಿರುಬಿಸಿಲಿನ ವೇಳೆಯಲ್ಲಿ ಮತಗಟ್ಟೆ ತಲುಪಿದರೆ ಧೂಳುಮಯವಾಗಿರುವ ಕೋಣೆಯಲ್ಲೇ ಸಿಬ್ಬಂದಿಗಳು ತಮ್ಮ ಸಾಮಾನು, ಮತಯಂತ್ರ ಎಲ್ಲವನ್ನೂ ಇಡಲು ಅಡ್ಜಸ್ಟ್ ಮಾಡಿಕೊಳ್ಳಬೇಕಾಗುತ್ತದೆ.

ತಾವೇ ಧೂಳು ತೆಗೆಯೋಣ ಎಂದು ಹೊರಟಾಗ ಅಲ್ಲಿ ಪೊರಕೆ, ನೆಲ ಒರೆಸುವ ಕೋಲು ಇಲ್ಲದೆ ಹೋದರೂ ಅಡ್ಜಸ್ಟ್ ಮಾಡಿಕೊಳ್ಳಬೇಕಿರುತ್ತದೆ. ಆ ಉರಿಬಿಸಿಲಿಗೆ ಬಂದು ಸುಸ್ತಾಗಿ ಮುಖಕ್ಕೆ ಒಂದಿಷ್ಟು ತಣ್ಣೀರು ಹಾಕಿಕೊಳ್ಳೋಣ ಎಂದಾಗ, ಟ್ಯಾಪ್ ತಿರುಗಿಸಿ ನೀರು ಬರದಿರಲು.. ಇನ್ನು ನೀರು ಪಂಪ್ ಆಗುವುದಕ್ಕೆ ಒಂದು ಘಂಟೆ ಕಾಯಬೇಕು ಎಂದರೂ ಅಡ್ಜಸ್ಟ್ ಆಗಲೇಬೇಕಿರುತ್ತದೆ. ಶೌಚಾಲಯದಲ್ಲಿ ಸ್ನಾನ ಮಾಡಲು, ಬಟ್ಟೆ ಇಟ್ಟುಕೊಳ್ಳಲು ಯಾವ ವ್ಯವಸ್ಥೆ ಇಲ್ಲದಿದ್ದರೂ, ನೀರು ತುಂಬಿಕೊಳ್ಳಲು ಬಕೇಟೇ ಇಲ್ಲದಿದ್ದರೂ ಹೇಗೋ ಅಡ್ಜೆಸ್ಟ್ ಆಗ್ಬೇಕಿರುವುದೂ ಅನಿವಾರ್ಯ.

ಅಡ್ಜೆಸ್ಟ್ ಆಗುವುದು ಸರಿ.. ಆದರೆ ಅದರ ಪರಿಣಾಮ…?  

 ಅಡ್ಜೆಸ್ಟ್ ಆಗ್ಬೇಕು ನಿಜ.. ಒಪ್ಪೋಣ.. ಆದರೆ ಒಂದೆರೆಡು ಸಂಗತಿಗೆ ಅಡ್ಜೆಸ್ಟ್ ಆಗುವುದು ಸರಿ. ಇಷ್ಟೆಲ್ಲ ಸಂಗತಿಗಳಿಗೂ ಸಿಬ್ಬಂದಿಗಳು ಅಡ್ಜೆಸ್ಟ್ ಆಗ್ಬೇಕು ಎನ್ನುವ ನಿರೀಕ್ಷೆ ಸೂಕ್ತವೇ? ಎಲ್ಲಕ್ಕಿಂತ ಮುಖ್ಯವಾಗಿ ಮತದಾನ ದಿನದ ಕರ್ತವ್ಯ ಬೆಳಗ್ಗೆ 5.30 ಗೆ ಆರಂಭವಾಗಿ ಸಂಜೆ 8.30ಗೆ ಮುಕ್ತಾಯವಾಗುವುದು.  ಕೆಲವೊಮ್ಮೆ ಅದಕ್ಕಿಂತಲೂ ತಡವಾಗಿ  ಮತಪೆಟ್ಟಿಗೆಯನ್ನು ಕೇಂದ್ರಕ್ಕೆ ಸುರಕ್ಷಿತವಾಗಿ ತಲುಪಿಸುವ ತನಕ  ಎಲ್ಲ ಜವಾಬ್ದಾರಿಯೂ ಮತಗಟ್ಟೆ ಸಿಬ್ಬಂದಿಗಳದೇ ಆಗಿರುತ್ತದೆ.  ಸಿಬ್ಬಂದಿಗಳು ಮತದಾನದ ದಿನ ಈ ಕರ್ತವ್ಯದ ಸಮಯಕ್ಕೆ ಯಾವ ದಣಿವೂ ಗಮನಿಸದೆ ನಿರಂತರವಾಗಿ 15-16 ಘಂಟೆಗಳ ಕಾಲ ದುಡಿಯುತ್ತಾರೆ. ಉಳಿದಂತೆ  ಇವರು ಮತಗಟ್ಟೆಯಲ್ಲಿ ಯಾವ ಐಷಾರಾಮಿ ಸೌಲಭ್ಯಗಳನ್ನು ನಿರೀಕ್ಷಿಸುವುದಿಲ್ಲ. ಕನಿಷ್ಟ ಮೂಲಭೂತ ಸೌಲಭ್ಯಗಳಿಗೂ ಕೊರತೆಯಾದಾಗ ಎಲ್ಲ ಅವ್ಯವಸ್ಥೆಗಳೊಂದಿಗೆ ಅಡ್ಜೆಸ್ಟ್ ಮಾಡಿಕೊಳ್ಳುವುದೆಂದರೆ ಮನಸ್ಸಿಗಾಗುವ ಕಿರಿಕಿರಿ, ಜವಾಬ್ದಾರಿಯುತ ಕಾರ್ಯಗಳಿಂದ ದಣಿದ ದೇಹಕ್ಕೆ ಮತ್ತಷ್ಟು ಆಯಾಸವಾಗುವುದು. ಅಲ್ಲದೆ  ಇಂಥಹ ಅವ್ಯವಸ್ಥೆಯ ವಾತಾವರಣವು ಸಿಬ್ಬಂದಿಗಳ   ಕರ್ತವ್ಯದ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರಬಲ್ಲದು. ಸಿಬ್ಬಂದಿಗಳೂ ಒಂದಿವ್ಸಕ್ಕಲ್ವ.. ಅಡ್ಜೆಸ್ಟ್ ಮಾಡ್ಕೊಳ್ಳೋಣ ಎಂದು ಸಕಾರಾತ್ಮಕವಾಗಿ ಯೋಚಿಸಿದರೂ ಊಟತಿಂಡಿ ಸರಿಯಾಗಿ ಲಭ್ಯವಾಗದೇ ಇದ್ದಾಗ ಹೆಚ್ಚಿನ ಸುಸ್ತು ಬಾಧಿಸದೇ ಇರದು. ಈ ಆಯಾಸ, ಸುಸ್ತು ತರುವ ಬಳಲಿಕೆಗಳು ಯಾವುದೇ ಸಮರ್ಥ ಸಿಬ್ಬಂದಿಯ ದಕ್ಷತೆಯ ಮೇಲೆ ಪರಿಣಾಮ ಬೀರುವ ಸಾಧ್ಯತೆಯನ್ನೂ ಅಲ್ಲಗಳೆಯಲಾಗದು.

ಇದನ್ನೂ ಓದಿ-ʼಸಖಿʼ ಮತಗಟ್ಟೆಯ ಸಖಿಯರ ಅಳಲು

ಬದಲಾವಣೆಯತ್ತ ಹೆಜ್ಜೆಯಿಡೋಣ

ಮತಗಟ್ಟೆಗಳು ಸಿಬ್ಬಂದಿಗಳಿಗೆ ಕರ್ತವ್ಯ ನಿರ್ವಹಿಸಲು ಸೂಕ್ತ ಮೂಲಭೂತ ಸೌಲಭ್ಯಗಳನ್ನು ಹೊಂದಿಲ್ಲವಾದರೆ ಮಹಿಳಾ ಸಿಬ್ಬಂದಿಗಳಿಗೆ ಮಾತ್ರವಲ್ಲದೆ ಪುರುಷ ಸಿಬ್ಬಂದಿಗಳಿಗೂ ಕಷ್ಟವೇ ಆಗುತ್ತದೆ. ಮೂಲಭೂತ ಸೌಲಭ್ಯಗಳ ಕೊರತೆಯಾದರೆ ಹೆಚ್ಚು ಬಾಧೆಗೊಳಪಡುವವರು ಮಹಿಳಾ ಸಿಬ್ಬಂದಿಗಳೇ ಆಗಿರುತ್ತಾರೆ. ಋತುಚಕ್ರದ ಸಂದರ್ಭಗಳಲ್ಲಿಯೂ ಕರ್ತವ್ಯ ನಿರ್ವಹಿಸಬೇಕಾದ ಸಂದರ್ಭಗಳು  ಬರುವುದರಿಂದ ಮಹಿಳೆಯರಿಗೆ ಮೂಲಭೂತ ಸೌಲಭ್ಯಗಳ ವ್ಯವಸ್ಥೆ ಅತಿ ಅಗತ್ಯವಾಗಿ ಬೇಕಾಗುತ್ತದೆ. ಮತದಾನವನ್ನು ಯಶಸ್ವಿಗೊಳಿಸುವ ಜವಾಬ್ದಾರಿಯಿಂದ ಮನೆ ಬಿಟ್ಟು ಬಹಳ ದೂರದಿಂದ ಕರ್ತವ್ಯ ನಿರ್ವಹಿಸಲು ಸಿಬ್ಬಂದಿಗಳು ಬರುವಾಗ, ಸಿಬ್ಬಂದಿಗಳ ಬದ್ಧತೆಗೆ ಬೆಲೆ ನೀಡಿ  ಒಂದು ದಿನದ ವಾಸ್ತವ್ಯಕ್ಕೆ ಅಗತ್ಯವಾದ ಮೂಲಭೂತ ಸೌಲಭ್ಯಗಳನ್ನು ಮತ್ತಷ್ಟು ವ್ಯವಸ್ಥಿತವಾಗಿ ನೀಡಬೇಕೆನ್ನುವ ನಿರೀಕ್ಷೆ ಎಲ್ಲರಿಗೂ ಇರುತ್ತದೆ. ಚುನಾವಣೆಯ ಸಂದರ್ಭ ರಜಾದಿನಗಳಲ್ಲಿಯೂ ತರಬೇತಿಗೋ, ಕರ್ತವ್ಯಕ್ಕೋ ಹಾಜರಾಗುವ ಸಿಬ್ಬಂದಿಗಳು ತಮ್ಮ ಕರ್ತವ್ಯದ ವಿಷಯದಲ್ಲಿ ವೈಯಕ್ತಿಕ ಹಿತಾಸಕ್ತಿಗಳನ್ನು ಬದಿಗಿಟ್ಟು ಬಹಳಷ್ಟು ಹೊಂದಾಣಿಕೆ ಮಾಡಿಕೊಳ್ಳಲು ಸಿದ್ಧರಿದ್ದಾರೆ. ಆದರೆ ಒಂದು ದಿನವೇ ಆದರೂ ಅವ್ಯವಸ್ಥೆಗಳೊಂದಿಗೆ  ಸಿಬ್ಬಂದಿಗಳು ಅಡ್ಜಸ್ಟ್ ಆಗಬೇಕು ಎನ್ನುವ ನಿರೀಕ್ಷೆ ತರವಲ್ಲ. ಕರ್ತವ್ಯ ನಿರ್ವಹಣೆಗೆ ಪೂರಕ ವಾತಾವರಣ ಲಭ್ಯವಾದಾಗ ಸಿಬ್ಬಂದಿಗಳ ಕಾರ್ಯಕ್ಷಮತೆಯೂ ಹೆಚ್ಚುವುದು.

ಚುನಾವಣಾ ಆಯೋಗ ಪ್ರತಿಬಾರಿ ಕೈಗೊಂಡಿರುವ ಹಲವಾರು ಸುಧಾರಣಾ ಕ್ರಮಗಳಿಂದ ಮತಗಟ್ಟೆಗಳು ಇದೀಗ ಮತದಾರ ಸ್ನೇಹಿಯಾಗಿ ರೂಪುಗೊಂಡಿವೆ.  ಇನ್ನೊಂದಿಷ್ಟು ಮುತುವರ್ಜಿಯ ಕ್ರಮಗಳಿಂದ ಮುಂದಿನ ವರ್ಷಗಳಲ್ಲಿ ಮತಗಟ್ಟೆಗಳನ್ನು ಸಿಬ್ಬಂದಿಸ್ನೇಹಿಯಾಗಿಯೂ ರೂಪಿಸುವುದು ಕಷ್ಟಕರವಲ್ಲ. ಈ ರೀತಿ ಮತಗಟ್ಟೆಗಳನ್ನು ಸಿಬ್ಬಂದಿಸ್ನೇಹಿಯಾಗಿ ಮಾಡುವುದು ಪ್ರತಿ ಸಾಮಾನ್ಯ ವ್ಯಕ್ತಿಗೆ ತೋರಿಸುವ ಗೌರವವೇ ಆಗಿದೆ. ಇದು ಪ್ರಜಾಪ್ರಭುತ್ವ ದೇಶದ ಚುನಾವಣೆಯ ಘನತೆಯ ಪ್ರತೀಕವೂ ಆಗಿದೆ.

ವಿದ್ಯಾ ಕಾರ್ಕಳ.

ಇದನ್ನೂ ಓದಿ-ಮಹಿಳೆ | ಮತದಾನಕ್ಕೆ ಬೇಕೇಬೇಕು; ಅಧಿಕಾರಕ್ಕೆ ಬೇಕೆಂದಿಲ್ಲ!