ಚೆನ್ನೈ: ನಟ ವಿಜಯ್ ಅವರ ನೇತೃತ್ವದ ‘ತಮಿಳಗ ವೆಟ್ರಿ ಕಳಗಂ’ (ಟಿವಿಕೆ) ಪಕ್ಷಕ್ಕೆ ಕೇಂದ್ರ ಚುನಾವಣಾ ಆಯೋಗವು ‘ಸೀಟಿ’ ಚಿಹ್ನೆಯನ್ನು ಮಂಜೂರು ಮಾಡಿದೆ. ಅದೇ ವೇಳೆ, ನಟ ಕಮಲ್ ಹಾಸನ್ ಅವರ ‘ಮಕ್ಕಳ್ ನೀದಿ ಮಯ್ಯಂ’ (ಎಂಎನ್ಎಂ) ಪಕ್ಷಕ್ಕೆ ‘ಬ್ಯಾಟರಿ ಟಾರ್ಚ್’ ಚಿಹ್ನೆ ನೀಡಲಾಗಿದೆ.
234 ಸದಸ್ಯ ಬಲದ ತಮಿಳುನಾಡು ವಿಧಾನಸಭೆಗೆ ಮುಂಬರುವ ತಿಂಗಳಲ್ಲಿ ನಡೆಯಲಿರುವ ಚುನಾವಣೆಯಲ್ಲಿ ಸ್ಪರ್ಧಿಸಲು ಈ ಎರಡೂ ಪಕ್ಷಗಳಿಗೆ ಚಿಹ್ನೆಗಳನ್ನು ಹಂಚಿಕೆ ಮಾಡಲಾಗಿದೆ ಎಂದು ಚುನಾವಣಾ ಆಯೋಗವು ಸ್ಪಷ್ಟಪಡಿಸಿದೆ.
ಚುನಾವಣಾ ಚಿಹ್ನೆಗಳ ಆದೇಶ–1968ರ ಅಡಿಯಲ್ಲಿ ತಮ್ಮ ಪಕ್ಷಕ್ಕೆ ಚಿಹ್ನೆ ನಿಗದಿಪಡಿಸುವಂತೆ ಟಿವಿಕೆ ಪಕ್ಷವು ಕಳೆದ ವರ್ಷ ನವೆಂಬರ್ 11ರಂದು ಆಯೋಗಕ್ಕೆ ಅರ್ಜಿ ಸಲ್ಲಿಸಿತ್ತು. ಈ ಅರ್ಜಿಯೊಂದಿಗೆ ಈಗಾಗಲೇ ಲಭ್ಯವಿದ್ದ ಏಳು ಮುಕ್ತ ಚಿಹ್ನೆಗಳು ಹಾಗೂ ಪಕ್ಷವೇ ರೂಪಿಸಿದ್ದ ಮೂರು ಸ್ವಯಂ-ನಿರ್ಮಿತ ಚಿಹ್ನೆಗಳ ಪಟ್ಟಿಯನ್ನು ಸಲ್ಲಿಸಲಾಗಿತ್ತು. ಅಂತಿಮವಾಗಿ ಆಯೋಗವು ‘ಸೀಟಿ’ ಚಿಹ್ನೆಯನ್ನು ಟಿವಿಕೆ ಪಕ್ಷಕ್ಕೆ ಹಂಚಿಕೆ ಮಾಡಿದೆ.
ವಿಜಯ್ ಅಭಿನಯದ ‘ಜಿಒಎಟಿ’ (ಗೋಟ್) ಸಿನಿಮಾದಲ್ಲಿನ ಜನಪ್ರಿಯ ‘ವಿಷಲ್ ಪೋಡು’ ಹಾಡಿನೊಂದಿಗೆ ಈಗ ಪಕ್ಷಕ್ಕೆ ಲಭಿಸಿರುವ ‘ಸೀಟಿ’ ಚಿಹ್ನೆಯ ಸಂಬಂಧವನ್ನು ಅಭಿಮಾನಿಗಳು ಮತ್ತು ರಾಜಕೀಯ ವಲಯ ವಿಶ್ಲೇಷಕರು ಗಮನಿಸುತ್ತಿದ್ದಾರೆ.
ವಿಜಯ್ ಪ್ರತಿಕ್ರಿಯೆ
ಚಿಹ್ನೆ ಘೋಷಣೆಯ ಬಳಿಕ ನಟ ವಿಜಯ್ ಅವರು ಸಾಮಾಜಿಕ ಜಾಲತಾಣ ‘ಎಕ್ಸ್’ನಲ್ಲಿ ಪ್ರತಿಕ್ರಿಯಿಸಿ, “ಸೀಟಿ ಚಿಹ್ನೆಯು ಜನರ ಆಶಯಗಳು ಹಾಗೂ ವಿಜಯದ ಸಂಕೇತವಾಗಿದೆ. ನಾವು ಕೇಳಿದ್ದ ಚಿಹ್ನೆಗಳ ಪೈಕಿ ಇದಕ್ಕೆ ಆದ್ಯತೆ ನೀಡಿದ್ದೆವು. ಆಯೋಗವು ಅದನ್ನೇ ನೀಡಿರುವುದು ಸಂತೋಷ ತಂದಿದೆ” ಎಂದು ಹೇಳಿದ್ದಾರೆ.
ಪಕ್ಷದ ನಾಯಕರು ಕೂಡ, “ಸೀಟಿ ಚಿಹ್ನೆಯು ಕೇವಲ ಸಿನಿಮಾ ಸಂಬಂಧಿತವಲ್ಲ. ಫುಟ್ಬಾಲ್ ಪಂದ್ಯದಲ್ಲಿ ನಿಯಮ ಉಲ್ಲಂಘನೆಯಾದಾಗ ರೆಫರಿ ಸೀಟಿ ಊದುವಂತೆ, ವ್ಯವಸ್ಥೆಯಲ್ಲಿನ ಲೋಪದೋಷ ಹಾಗೂ ಭ್ರಷ್ಟಾಚಾರದ ವಿರುದ್ಧ ಎಚ್ಚರಿಸುವ ರಾಜಕೀಯ ಸಂಕೇತವೂ ಹೌದು” ಎಂದು ಅಭಿಪ್ರಾಯಪಟ್ಟಿದ್ದಾರೆ.
ವಿಜಯ್ಗೆ ಎದುರಾಗಿರುವ ಸವಾಲುಗಳು
ಚಿಹ್ನೆ ಮಂಜೂರಿಯಿಂದ ಸಂಭ್ರಮದ ವಾತಾವರಣವಿದ್ದರೂ, ನಟ ವಿಜಯ್ ಮುಂದೆ ಹಲವು ಸವಾಲುಗಳಿವೆ. ಅವರ ಕೊನೆಯ ಸಿನಿಮಾ ‘ಜನನಾಯಗನ್’ ಇನ್ನೂ ಬಿಡುಗಡೆಯಾಗದೆ ಅಡಕದಲ್ಲಿದ್ದು, ಮತ್ತೊಂದೆಡೆ ಕರೂರು ಕಾಲ್ತುಳಿತ ದುರಂತದ ತನಿಖೆಗೆ ಸಂಬಂಧಿಸಿದಂತೆ ಸಿಬಿಐ ವಿಚಾರಣೆಗೆ ಅವರು ಹಾಜರಾಗುತ್ತಿದ್ದಾರೆ.
