ಅಮೆರಿಕ ಮಧ್ಯಂತರ ಚುನಾವಣೆ: ಟ್ರಂಪ್ ಆಡಳಿತಕ್ಕೆ ಜನರ ಪ್ರತ್ಯುತ್ತರಕ್ಕೆ ಕ್ಷಣಗಣನೆ; ಬೆಲೆಯೇರಿಕೆ, ಯುದ್ಧೋನ್ಮಾದಕ್ಕೆ ಬೆಲೆ ತೆರುವರೇ ಹುಚ್ಚು ದೊರೆ?

ವಾಷಿಂಗ್ಟನ್: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಎರಡನೇ ಅವಧಿಯ ಆಡಳಿತಕ್ಕೆ ಜನರು ನೀಡಲಿರುವ ರಾಜಕೀಯ ತೀರ್ಪಿನ ವೇದಿಕೆಯಾಗಿ 2026ರ ಮಧ್ಯಂತರ ಚುನಾವಣೆ ಗಮನ ಸೆಳೆದಿದೆ. ದೇಶದಾದ್ಯಂತ ನವೆಂಬರ್ 3ರಂದು ನಡೆಯುತ್ತಿರುವ ಮತದಾನದಲ್ಲಿ ಅಮೆರಿಕದ ಸಂಸತ್ತಿನ ಎರಡು ಸದನಗಳ ಅಧಿಕಾರ ಸಮೀಕರಣ ಬದಲಾಗುವ ಸಾಧ್ಯತೆಯಿದ್ದು, ಟ್ರಂಪ್ ನೇತೃತ್ವದ ರಿಪಬ್ಲಿಕನ್ ಪಕ್ಷಕ್ಕೆ ಈ ಚುನಾವಣೆ ಮಹತ್ವದ ಅಗ್ನಿಪರೀಕ್ಷೆಯಾಗಿದೆ.

ಅಧ್ಯಕ್ಷೀಯ ಚುನಾವಣೆಗೆ ವ್ಯತಿರಿಕ್ತವಾಗಿ ಮಧ್ಯಂತರ ಚುನಾವಣೆಯಲ್ಲಿ ಅಧ್ಯಕ್ಷ ಸ್ಥಾನಕ್ಕೆ ಮತದಾನ ನಡೆಯುವುದಿಲ್ಲ. ಆದರೆ ಶ್ವೇತಭವನದ ಅಧಿಕಾರಾವಧಿಯ ಮಧ್ಯದಲ್ಲಿ ನಡೆಯುವ ಈ ಚುನಾವಣೆ, ಅಧ್ಯಕ್ಷರ ಆಡಳಿತದ ಬಗ್ಗೆ ಜನರ ಅಭಿಪ್ರಾಯವನ್ನು ಅಳೆಯುವ ಪ್ರಮುಖ ಮಾನದಂಡವಾಗಿದೆ. ಈ ಬಾರಿ ಟ್ರಂಪ್ ಸರ್ಕಾರದ ಆರ್ಥಿಕ ನೀತಿಗಳು, ಜೀವನ ವೆಚ್ಚದ ಏರಿಕೆ, ಇರಾನ್‌ನೊಂದಿಗಿನ ಯುದ್ಧ ಹಾಗೂ ವಲಸೆ ನೀತಿಗಳು ಮತದಾರರ ನಿರ್ಧಾರದ ಮೇಲೆ ಪ್ರಭಾವ ಬೀರುವ ಪ್ರಮುಖ ವಿಚಾರಗಳಾಗಿವೆ.

ಕಾಂಗ್ರೆಸ್‌ನ ಎರಡೂ ಸದನಗಳ ಮೇಲೆ ಕಣ್ಣಿಟ್ಟಿರುವ ಡೆಮಾಕ್ರಟಿಕ್ ಪಕ್ಷ
ಅಮೆರಿಕದ ಕಾಂಗ್ರೆಸ್‌ನ 100 ಸದಸ್ಯ ಬಲದ ಸೆನೆಟ್‌ನಲ್ಲಿ ಬಹುಮತ ಪಡೆಯಲು ಡೆಮಾಕ್ರಟಿಕ್ ಪಕ್ಷಕ್ಕೆ ನಾಲ್ಕು ಸ್ಥಾನಗಳ ನಿವ್ವಳ ಹೆಚ್ಚಳ ಅಗತ್ಯವಿದೆ. 435 ಸದಸ್ಯರ ಜನಪ್ರತಿನಿಧಿಗಳ ಸಭೆಯಲ್ಲಿ ಬಹುಮತ ಪಡೆಯಲು ಮೂರು ಸ್ಥಾನಗಳನ್ನು ಹೆಚ್ಚಿಸಿಕೊಳ್ಳಬೇಕಿದೆ.

ಈ ಗುರಿ ಸಾಧಿಸಿದರೆ ಟ್ರಂಪ್ ಆಡಳಿತದ ಉಳಿದ ಎರಡು ವರ್ಷಗಳಲ್ಲಿ ರಿಪಬ್ಲಿಕನ್ ಪಕ್ಷದ ಶಾಸನಾತ್ಮಕ ಹಿಡಿತಕ್ಕೆ ಸವಾಲು ಎದುರಾಗಲಿದೆ. ಈಗಾಗಲೇ ಹಲವು ರಾಜ್ಯಗಳಲ್ಲಿ ರಿಪಬ್ಲಿಕನ್ ಪಕ್ಷಕ್ಕೆ ಪೈಪೋಟಿ ನೀಡುತ್ತಿರುವ ಡೆಮಾಕ್ರಟಿಕ್ ಅಭ್ಯರ್ಥಿಗಳು ಮತದಾರರ ಅಸಮಾಧಾನವನ್ನು ತಮ್ಮ ಪರವಾಗಿ ಪರಿವರ್ತಿಸಿಕೊಳ್ಳಲು ಪ್ರಯತ್ನಿಸುತ್ತಿದ್ದಾರೆ.

ಇನ್ನೊಂದೆಡೆ, ಸೆನೆಟ್‌ನಲ್ಲಿ ತಮ್ಮ ಬಹುಮತವನ್ನು ಉಳಿಸಿಕೊಳ್ಳುವುದು ಮತ್ತು ಜನಪ್ರತಿನಿಧಿಗಳ ಸಭೆಯ ಮೇಲಿನ ಹಿಡಿತ ಕಳೆದುಕೊಳ್ಳದಿರುವುದು ರಿಪಬ್ಲಿಕನ್ ಪಕ್ಷದ ಪ್ರಮುಖ ಗುರಿಯಾಗಿದೆ.

ಬೆಲೆ ಏರಿಕೆ ಮತ್ತು ಇರಾನ್ ಯುದ್ಧದ ಪರಿಣಾಮ
ಅಮೆರಿಕದ ಜನಸಾಮಾನ್ಯರನ್ನು ಕಾಡುತ್ತಿರುವ ಜೀವನ ವೆಚ್ಚದ ಏರಿಕೆ ಈ ಚುನಾವಣೆಯ ಪ್ರಮುಖ ಚರ್ಚೆಯಾಗಿದೆ. ಇಂಧನ, ದಿನಸಿ ವಸ್ತುಗಳು ಮತ್ತು ಆರೋಗ್ಯ ಸೇವೆಗಳ ವೆಚ್ಚ ಹೆಚ್ಚುತ್ತಿರುವ ಬಗ್ಗೆ ಮತದಾರರಲ್ಲಿ ಅಸಮಾಧಾನ ವ್ಯಕ್ತವಾಗಿದೆ.

ಇದರ ಜೊತೆಗೆ ಇರಾನ್‌ನೊಂದಿಗಿನ ಯುದ್ಧದ ಪರಿಣಾಮವೂ ಚುನಾವಣಾ ಚರ್ಚೆಯಲ್ಲಿ ಪ್ರಮುಖ ಸ್ಥಾನ ಪಡೆದಿದೆ. ಯುದ್ಧದಿಂದ ಉಂಟಾಗಿರುವ ಆರ್ಥಿಕ ಒತ್ತಡ ಹಾಗೂ ಇಂಧನ ಬೆಲೆಗಳ ಏರಿಕೆಗೆ ಟ್ರಂಪ್ ಆಡಳಿತದ ನೀತಿಗಳೇ ಕಾರಣ ಎಂದು ವಿರೋಧ ಪಕ್ಷ ಆರೋಪಿಸುತ್ತಿದೆ.

ಟ್ರಂಪ್ ಆಡಳಿತವು ಆರ್ಥಿಕ ಸಮಸ್ಯೆಗಳನ್ನು ನಿಯಂತ್ರಿಸುವಲ್ಲಿ ವಿಫಲವಾಗಿದೆ ಎಂಬ ಡೆಮಾಕ್ರಟಿಕ್ ಪಕ್ಷದ ಟೀಕೆಗೆ ಮತದಾರರ ಪ್ರತಿಕ್ರಿಯೆ ಹೇಗಿರಲಿದೆ ಎಂಬುದು ಚುನಾವಣೆಯ ಪ್ರಮುಖ ಕುತೂಹಲವಾಗಿದೆ.

ಟ್ರಂಪ್ ಜನಪ್ರಿಯತೆಯಲ್ಲಿ ಕುಸಿತದ ಸೂಚನೆ
ಅಸೋಸಿಯೇಟೆಡ್ ಪ್ರೆಸ್–ನಾರ್ಕ್ ನಡೆಸಿದ ಸಮೀಕ್ಷೆಯ ಪ್ರಕಾರ, ಟ್ರಂಪ್ ಅವರ ಆಡಳಿತದ ಕಾರ್ಯವೈಖರಿಯನ್ನು ಶೇ.35ರಷ್ಟು ಅಮೆರಿಕನ್ನರು ಮಾತ್ರ ಅನುಮೋದಿಸಿದ್ದಾರೆ. ಆರ್ಥಿಕ ನಿರ್ವಹಣೆಗೆ ಸಂಬಂಧಿಸಿದಂತೆ ಅವರ ಮೇಲಿನ ಜನರ ವಿಶ್ವಾಸವೂ ಕುಸಿದಿರುವ ಸೂಚನೆಗಳು ಸಮೀಕ್ಷೆಯಲ್ಲಿ ವ್ಯಕ್ತವಾಗಿವೆ.

ರಾಯಿಟರ್ಸ್–ಇಪ್ಸೋಸ್ ಸಮೀಕ್ಷೆಯಲ್ಲಿಯೂ ಡೆಮಾಕ್ರಟಿಕ್ ಅಭ್ಯರ್ಥಿಗಳಿಗೆ ರಿಪಬ್ಲಿಕನ್ ಅಭ್ಯರ್ಥಿಗಳಿಗಿಂತ ಹೆಚ್ಚಿನ ಒಲವು ವ್ಯಕ್ತವಾಗಿರುವುದು ವರದಿಯಾಗಿದೆ. ಆದರೆ ಸಮೀಕ್ಷೆಗಳ ಫಲಿತಾಂಶವೇ ಚುನಾವಣೆಯ ಅಂತಿಮ ತೀರ್ಪಲ್ಲ. ರಾಜ್ಯ ಮತ್ತು ಕ್ಷೇತ್ರವಾರು ಮತದಾನದ ಪ್ರಮಾಣವೇ ನಿಜವಾದ ಫಲಿತಾಂಶವನ್ನು ನಿರ್ಧರಿಸಲಿದೆ.

57 ದಶಲಕ್ಷಕ್ಕೂ ಅಧಿಕ ಮಂದಿ ಮುಂಗಡ ಮತದಾನ
ಚುನಾವಣೆಯ ಅಧಿಕೃತ ಮತದಾನದ ದಿನಕ್ಕೂ ಮುನ್ನವೇ 5.7 ಕೋಟಿಗೂ ಅಧಿಕ ಅಮೆರಿಕನ್ನರು ತಮ್ಮ ಮತ ಚಲಾಯಿಸಿದ್ದಾರೆ. ಹಲವು ಪ್ರಮುಖ ಸ್ಪರ್ಧಾತ್ಮಕ ರಾಜ್ಯಗಳಲ್ಲಿ ಹಿಂದಿನ ಮಧ್ಯಂತರ ಚುನಾವಣೆಗಳಿಗಿಂತ ಮುಂಗಡ ಮತದಾನದ ಪ್ರಮಾಣ ಹೆಚ್ಚಾಗಿದೆ.

ಈ ಬಾರಿ ಸೆನೆಟ್, ಜನಪ್ರತಿನಿಧಿಗಳ ಸಭೆಯ ಜೊತೆಗೆ 36 ರಾಜ್ಯಗಳಲ್ಲಿ ಗವರ್ನರ್ ಆಯ್ಕೆಗೂ ಮತದಾನ ನಡೆಯುತ್ತಿದೆ. ಹೀಗಾಗಿ ಫಲಿತಾಂಶವು ಕೇವಲ ವಾಷಿಂಗ್ಟನ್‌ನ ಅಧಿಕಾರ ಸಮೀಕರಣಕ್ಕೆ ಸೀಮಿತವಾಗದೆ, ಹಲವು ರಾಜ್ಯಗಳ ಆಡಳಿತದ ಮೇಲೆಯೂ ಪರಿಣಾಮ ಬೀರಲಿದೆ.

ಟ್ರಂಪ್ ಆಡಳಿತದ ಮುಂದಿನ ಹಾದಿಯನ್ನು ನಿರ್ಧರಿಸಲಿರುವ ಫಲಿತಾಂಶ
ಡೆಮಾಕ್ರಟಿಕ್ ಪಕ್ಷವು ಕಾಂಗ್ರೆಸ್‌ನ ಕನಿಷ್ಠ ಒಂದು ಸದನದ ಮೇಲಾದರೂ ಹಿಡಿತ ಸಾಧಿಸಿದರೆ ಟ್ರಂಪ್ ಸರ್ಕಾರದ ನೀತಿಗಳ ಮೇಲೆ ಹೆಚ್ಚಿನ ನಿಗಾ ವಹಿಸುವ ಅವಕಾಶ ಸಿಗಲಿದೆ. ಸರ್ಕಾರದ ವಿವಿಧ ನಿರ್ಧಾರಗಳ ಕುರಿತು ತನಿಖೆ ನಡೆಸುವುದು, ಆಡಳಿತಾತ್ಮಕ ನೇಮಕಾತಿಗಳಿಗೆ ತಡೆ ಒಡ್ಡುವುದು ಮತ್ತು ನೀತಿ ನಿರ್ಧಾರಗಳನ್ನು ಪ್ರಶ್ನಿಸುವ ಅಧಿಕಾರವೂ ಬಲಗೊಳ್ಳಲಿದೆ.

ಮತ್ತೊಂದೆಡೆ ರಿಪಬ್ಲಿಕನ್ ಪಕ್ಷ ಎರಡೂ ಸದನಗಳಲ್ಲಿನ ಬಹುಮತವನ್ನು ಉಳಿಸಿಕೊಂಡರೆ ಟ್ರಂಪ್ ಅವರ ಉಳಿದ ಎರಡು ವರ್ಷಗಳ ಆಡಳಿತಕ್ಕೆ ರಾಜಕೀಯವಾಗಿ ಹೆಚ್ಚಿನ ಬಲ ದೊರೆಯಲಿದೆ.