ಆರ್‌ಎಸ್‌ಎಸ್, ದೆಹಲಿ ಪೊಲೀಸರ ಹೆಸರಿನಲ್ಲಿ ನಕಲಿ ನೋಟಿಸ್: ಡಿಜಿಟಲ್ ಹಕ್ಕುಗಳ ಸಂಘಟನೆಗಳಿಗೆ ಬೆದರಿಕೆ ಹಾಕಿದವರಾರು?

ದೆಹಲಿ: ರಾಷ್ಟ್ರೀಯ ಸ್ವಯಂಸೇವಕ ಸಂಘ (ಆರ್‌ಎಸ್‌ಎಸ್) ಮತ್ತು ದೆಹಲಿ ಪೊಲೀಸರ ಹೆಸರಿನಲ್ಲಿ ಡಿಜಿಟಲ್ ಹಕ್ಕುಗಳ ಸಂಘಟನೆಗಳಿಗೆ ಕಳುಹಿಸಲಾಗಿದ್ದ ಕಾನೂನು ನೋಟಿಸ್‌ಗಳು ನಕಲಿ ಎಂಬುದು ಬೆಳಕಿಗೆ ಬಂದಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ಕೆಲವು ಪೋಸ್ಟ್‌ಗಳನ್ನು ತೆಗೆದುಹಾಕುವಂತೆ ಮತ್ತು ಆನ್‌ಲೈನ್ ಸೆನ್ಸಾರ್‌ಶಿಪ್ ಕುರಿತು ದಾಖಲೆಗಳನ್ನು ಪ್ರಕಟಿಸುವುದನ್ನು ನಿಲ್ಲಿಸುವಂತೆ ಒತ್ತಾಯಿಸಿ ಕಳುಹಿಸಲಾಗಿದ್ದ ಈ ನೋಟಿಸ್‌ಗಳ ಹಿಂದೆ ನಕಲಿ ಗುರುತು ಬಳಸಿದ ವ್ಯಕ್ತಿಯೊಬ್ಬರ ಕೈವಾಡವಿರುವುದು ತನಿಖೆಯಿಂದ ತಿಳಿದುಬಂದಿದೆ.

ಇಂಟರ್‌ನೆಟ್ ಫ್ರೀಡಂ ಫೌಂಡೇಶನ್ (IFF) ಮತ್ತು ಸಾಫ್ಟ್‌ವೇರ್ ಫ್ರೀಡಂ ಲಾ ಸೆಂಟರ್ (SFLC) ಸೇರಿದಂತೆ ಡಿಜಿಟಲ್ ಹಕ್ಕುಗಳ ಸಂಘಟನೆಗಳು ಈ ನೋಟಿಸ್‌ಗಳನ್ನು ಸ್ವೀಕರಿಸಿದ್ದವು. ಅಕ್ಟೋಬರ್ 30ರಂದು ಈ ವಿಚಾರವನ್ನು ಬಹಿರಂಗಪಡಿಸಿದ ಬಳಿಕ ದೇಶದಲ್ಲಿ ಅಂತರ್ಜಾಲ ಸ್ವಾತಂತ್ರ್ಯ, ಅಭಿವ್ಯಕ್ತಿ ಸ್ವಾತಂತ್ರ್ಯ ಮತ್ತು ಸಾಮಾಜಿಕ ಜಾಲತಾಣಗಳಲ್ಲಿನ ವಿಷಯ ನಿಯಂತ್ರಣದ ಕುರಿತು ಚರ್ಚೆ ಆರಂಭವಾಗಿತ್ತು.

ಇದನ್ನೂ ಓದಿ: https://peepalmedia.com/sports/bengaluru-family-massacre-seven-murder-property-dispute/

ಆರ್‌ಎಸ್‌ಎಸ್ ಹೆಸರಿನಲ್ಲಿ ಕಾನೂನು ನೋಟಿಸ್

ಅಕ್ಟೋಬರ್ 29ರಂದು ರಾತ್ರಿ ಇಂಟರ್‌ನೆಟ್ ಫ್ರೀಡಂ ಫೌಂಡೇಶನ್‌ಗೆ ಗೌರವ್ ತಿವಾರಿ ಎಂಬ ವಕೀಲರ ಹೆಸರಿನಲ್ಲಿ ಇಮೇಲ್ ಬಂದಿತ್ತು. ಆರ್‌ಎಸ್‌ಎಸ್‌ನ ಸೂಚನೆ ಮತ್ತು ಅಧಿಕಾರದ ಮೇರೆಗೆ ಕಾನೂನು ನೋಟಿಸ್ ಕಳುಹಿಸುತ್ತಿರುವುದಾಗಿ ಅದರಲ್ಲಿ ತಿಳಿಸಲಾಗಿತ್ತು.

ಸರ್ಕಾರದ ವಿಷಯ ತೆಗೆದುಹಾಕುವ ಆದೇಶಗಳನ್ನು ವಿರೋಧಿಸುವುದು ಮತ್ತು ಅವುಗಳ ಕುರಿತು ದಾಖಲೆಗಳನ್ನು ಪ್ರಕಟಿಸುವುದನ್ನು ನಿಲ್ಲಿಸಬೇಕು ಎಂದು ನೋಟಿಸ್‌ನಲ್ಲಿ ಒತ್ತಾಯಿಸಲಾಗಿತ್ತು. ಒಂದು ವಾರದೊಳಗೆ ಇದಕ್ಕೆ ಒಪ್ಪಿಗೆ ನೀಡಿರುವುದನ್ನು ಖಚಿತಪಡಿಸುವಂತೆಯೂ ಸೂಚಿಸಲಾಗಿತ್ತು.

ಇದೇ ರೀತಿಯ ನೋಟಿಸ್‌ಗಳನ್ನು ಸಾಫ್ಟ್‌ವೇರ್ ಫ್ರೀಡಂ ಲಾ ಸೆಂಟರ್ ಮತ್ತು ‘ಜಿಯೋ ಬ್ಲಾಕ್ಡ್ ಇನ್ ಇಂಡಿಯಾ’ ಎಂಬ ಎಕ್ಸ್ ಖಾತೆಗೂ ಕಳುಹಿಸಲಾಗಿತ್ತು.

ಆದರೆ, ಈ ನೋಟಿಸ್‌ನಲ್ಲಿ ಯಾವುದೇ ನಿರ್ದಿಷ್ಟ ಕಾನೂನು ಉಲ್ಲಂಘನೆಯ ವಿವರಗಳನ್ನು ನೀಡಿಲ್ಲ. ಅಲ್ಲದೆ, ಸರ್ಕಾರದ ವಿಷಯ ನಿರ್ಬಂಧ ಆದೇಶಗಳನ್ನು ವಿರೋಧಿಸುವುದಕ್ಕೂ ಆರ್‌ಎಸ್‌ಎಸ್‌ಗೂ ಏನು ಸಂಬಂಧ ಎಂಬುದನ್ನೂ ಸ್ಪಷ್ಟಪಡಿಸಿಲ್ಲ ಎಂದು ಇಂಟರ್‌ನೆಟ್ ಫ್ರೀಡಂ ಫೌಂಡೇಶನ್ ಆಕ್ಷೇಪ ವ್ಯಕ್ತಪಡಿಸಿತ್ತು.

ಆರು ಗಂಟೆಗಳ ಹಿಂದಷ್ಟೇ ಸೃಷ್ಟಿಯಾಗಿದ್ದ ಇಮೇಲ್ ಖಾತೆ

Scroll ನಡೆಸಿದ ತನಿಖೆಯಲ್ಲಿ ಈ ನೋಟಿಸ್ ಕಳುಹಿಸಲು ಬಳಸಿದ್ದ ಪ್ರೋಟಾನ್ ಮೇಲ್ ಖಾತೆಯನ್ನು ಅಕ್ಟೋಬರ್ 29ರಂದು ಸಂಜೆ 3.57ಕ್ಕೆ ಸೃಷ್ಟಿಸಲಾಗಿತ್ತು ಎಂಬುದು ಪತ್ತೆಯಾಗಿದೆ. ಅದೇ ದಿನ ರಾತ್ರಿ 9.54ಕ್ಕೆ ಇಂಟರ್‌ನೆಟ್ ಫ್ರೀಡಂ ಫೌಂಡೇಶನ್‌ಗೆ ನೋಟಿಸ್ ಕಳುಹಿಸಲಾಗಿತ್ತು. ಅಂದರೆ, ಇಮೇಲ್ ಖಾತೆ ಸೃಷ್ಟಿಯಾದ ಕೇವಲ ಆರು ಗಂಟೆಗಳಲ್ಲಿ ನೋಟಿಸ್ ರವಾನೆಯಾಗಿತ್ತು.

ನೋಟಿಸ್‌ನಲ್ಲಿದ್ದ ವಿಳಾಸ ಮತ್ತು ದೂರವಾಣಿ ಸಂಖ್ಯೆಯನ್ನು ಪರಿಶೀಲಿಸಿದಾಗ ಅವು ‘ರಾಷ್ಟ್ರೀಯ ಸೇವಾ ಸಂಘ’ ಎಂಬ ಮತ್ತೊಂದು ಸಂಘಟನೆಯ ವಿಳಾಸಕ್ಕೆ ಸಂಬಂಧಿಸಿದ್ದವು. ಆದರೆ, ಈ ಸಂಘಟನೆಯ ಅಧ್ಯಕ್ಷ ಹಿಮಾಂಶು ಜೋಶಿ, ತಮ್ಮ ಸಂಘಟನೆಯಿಂದ ಯಾವುದೇ ನೋಟಿಸ್ ಕಳುಹಿಸಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ತಮ್ಮ ಸಂಘಟನೆಯ ವಿಳಾಸ ಮತ್ತು ದೂರವಾಣಿ ಸಂಖ್ಯೆಯನ್ನು ದುರುಪಯೋಗಪಡಿಸಿಕೊಂಡ ವ್ಯಕ್ತಿಯ ವಿರುದ್ಧ ಕ್ರಮ ಕೈಗೊಳ್ಳುವುದಾಗಿ ತಿಳಿಸಿದ್ದಾರೆ. ರಾಷ್ಟ್ರೀಯ ಸೇವಾ ಸಂಘ ಮತ್ತು ರಾಷ್ಟ್ರೀಯ ಸ್ವಯಂಸೇವಕ ಸಂಘ ಎರಡೂ ಪ್ರತ್ಯೇಕ ಸಂಘಟನೆಗಳಾಗಿವೆ ಎಂಬುದನ್ನೂ ಅವರು ಹೇಳಿದ್ದಾರೆ.

ದೆಹಲಿ ಪೊಲೀಸರ ಹೆಸರಿನಲ್ಲೂ ನಕಲಿ ದೂರು

ಇಷ್ಟಕ್ಕೇ ಈ ಪ್ರಕರಣ ಮುಗಿದಿರಲಿಲ್ಲ. ನವೆಂಬರ್ 3ರಂದು ಇಂಟರ್‌ನೆಟ್ ಫ್ರೀಡಂ ಫೌಂಡೇಶನ್ ಮತ್ತು ಸಾಫ್ಟ್‌ವೇರ್ ಫ್ರೀಡಂ ಲಾ ಸೆಂಟರ್‌ಗೆ ಎಕ್ಸ್ ಸಾಮಾಜಿಕ ಜಾಲತಾಣದಿಂದ ಮತ್ತೊಂದು ಮಾಹಿತಿ ಬಂದಿತ್ತು.

ಅಕ್ಟೋಬರ್ 31 ಮತ್ತು ನವೆಂಬರ್ 2ರಂದು ದೆಹಲಿ ಪೊಲೀಸರು ತಮ್ಮಲ್ಲಿ ದೂರು ಸಲ್ಲಿಸಿದ್ದು, ಈ ಸಂಘಟನೆಗಳ ಎಕ್ಸ್ ಖಾತೆಗಳು ಮತ್ತು ಕೆಲವು ಪೋಸ್ಟ್‌ಗಳನ್ನು ತೆಗೆದುಹಾಕುವಂತೆ ಕೋರಿದ್ದಾರೆ ಎಂದು ಎಕ್ಸ್ ತಿಳಿಸಿತ್ತು.

ಆ ಪೋಸ್ಟ್‌ಗಳು ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಮಾನಹಾನಿ ಮಾಡುತ್ತಿವೆ ಎಂದು ಭಾರತೀಯ ನ್ಯಾಯ ಸಂಹಿತೆಯ ಸೆಕ್ಷನ್ 356ರ ಅಡಿಯಲ್ಲಿ ಆರೋಪಿಸಲಾಗಿತ್ತು. ದೆಹಲಿ ಪೊಲೀಸ್ ವಿಶೇಷ ಆಯುಕ್ತರ ಹೆಸರನ್ನೂ ಈ ದೂರಿನಲ್ಲಿ ಬಳಸಲಾಗಿತ್ತು.

ಆದರೆ, ಈ ದೂರಿನ ಸತ್ಯಾಸತ್ಯತೆಯನ್ನು ಪರಿಶೀಲಿಸಿದ ಸಾಫ್ಟ್‌ವೇರ್ ಫ್ರೀಡಂ ಲಾ ಸೆಂಟರ್, ಪೊಲೀಸರು ಅಗತ್ಯ ನ್ಯಾಯಾಲಯದ ಆದೇಶವನ್ನು ಉಲ್ಲೇಖಿಸಿಲ್ಲ ಎಂದು ಪ್ರಶ್ನಿಸಿತು. ಅಲ್ಲದೆ, ಇಂತಹ ಮಾನಹಾನಿ ಪ್ರಕರಣದಲ್ಲಿ ಪೊಲೀಸರು ಕ್ರಮ ಕೈಗೊಳ್ಳಲು ನ್ಯಾಯಾಲಯದ ಆದೇಶದ ಅಗತ್ಯವಿದೆ ಎಂದು ಸಂಘಟನೆ ವಾದಿಸಿತು.

ದೆಹಲಿ ಹೈಕೋರ್ಟ್‌ಗೆ ಎಕ್ಸ್ ಸ್ಪಷ್ಟನೆ

ನವೆಂಬರ್ 5ರಂದು ಇಂಟರ್‌ನೆಟ್ ಫ್ರೀಡಂ ಫೌಂಡೇಶನ್ ಮತ್ತು ಸಾಫ್ಟ್‌ವೇರ್ ಫ್ರೀಡಂ ಲಾ ಸೆಂಟರ್ ದೆಹಲಿ ಹೈಕೋರ್ಟ್ ಮೆಟ್ಟಿಲೇರಿದ್ದವು. ನೋಟಿಸ್‌ಗಳ ಸತ್ಯಾಸತ್ಯತೆ ಕುರಿತು ದೆಹಲಿ ಪೊಲೀಸರಿಂದ ಸ್ಪಷ್ಟನೆ ಸಿಗದ ಹಿನ್ನೆಲೆಯಲ್ಲಿ ಈ ಅರ್ಜಿ ಸಲ್ಲಿಸಲಾಗಿತ್ತು.

ನವೆಂಬರ್ 6ರಂದು ವಿಚಾರಣೆ ವೇಳೆ ಎಕ್ಸ್ ಪರ ವಕೀಲರು ನ್ಯಾಯಾಲಯಕ್ಕೆ ಮಹತ್ವದ ಮಾಹಿತಿ ನೀಡಿದರು. ಸಂಸ್ಥೆಯ ಆಂತರಿಕ ತನಿಖೆಯಲ್ಲಿ ದೆಹಲಿ ಪೊಲೀಸರ ಹೆಸರಿನಲ್ಲಿ ಬಂದಿದ್ದ ನೋಟಿಸ್‌ಗಳನ್ನು ನಕಲಿ ವ್ಯಕ್ತಿಯೊಬ್ಬರು ಕಳುಹಿಸಿರುವುದು ಪತ್ತೆಯಾಗಿದೆ ಎಂದು ತಿಳಿಸಿದರು. ಈ ಸಂಬಂಧ ದೆಹಲಿ ಪೊಲೀಸರಿಗೆ ದೂರು ನೀಡಿರುವುದಾಗಿಯೂ ಹೇಳಿದರು.

ಎರಡೂ ಸಂಘಟನೆಗಳ ಎಕ್ಸ್ ಖಾತೆಗಳನ್ನು ತೆಗೆದುಹಾಕುವುದಿಲ್ಲ ಎಂಬ ಭರವಸೆಯನ್ನೂ ನ್ಯಾಯಾಲಯಕ್ಕೆ ನೀಡಿದರು. ಇದನ್ನು ದಾಖಲಿಸಿಕೊಂಡ ದೆಹಲಿ ಹೈಕೋರ್ಟ್ ಅರ್ಜಿಗಳ ವಿಚಾರಣೆಯನ್ನು ಮುಕ್ತಾಯಗೊಳಿಸಿತು.