ದೆಹಲಿ: ವಿಶ್ವದ ಅತ್ಯಂತ ಹಳೆಯ ಪರ್ವತ ಶ್ರೇಣಿಗಳಲ್ಲಿ ಒಂದಾದ ಮತ್ತು ಪರಿಸರದ ನೈಸರ್ಗಿಕ ರಕ್ಷಾಕವಚವಾಗಿರುವ ಅರಾವಳಿ ಪರ್ವತಗಳ ಉಳಿವಿಗಾಗಿ ಈಗ ಸಾಮಾಜಿಕ ಮಾಧ್ಯಮಗಳಲ್ಲಿ ದೊಡ್ಡ ಮಟ್ಟದ ಹೋರಾಟ ಆರಂಭವಾಗಿದೆ. ಮೈನಿಂಗ್ ಮಾಫಿಯಾಗೆ ಮೋದಿ ಸರ್ಕಾರ ಮಣಿಯುತ್ತಿದೆ ಎಂಬ ಟೀಕೆಗಳು ಕೇಳಿಬರುತ್ತಿದ್ದು, ಅರಾವಳಿ ನಾಶವಾದರೆ ದೆಹಲಿಯವರೆಗೂ ಮರುಭೂಮಿ ವ್ಯಾಪಿಸುವ ಮತ್ತು ಜಲಮೂಲಗಳು ಬತ್ತಿಹೋಗುವ ಆತಂಕ ಎದುರಾಗಿದೆ.
ಪರಿಸರ ಇಲಾಖೆ ನಿಗದಿಪಡಿಸಿದ ಮಾನದಂಡಗಳನ್ನು ಅಂಗೀಕರಿಸಿ ನವೆಂಬರ್ 20ರಂದು ಸುಪ್ರೀಂ ಕೋರ್ಟ್ ನೀಡಿದ ತೀರ್ಪು ಪರಿಸರವಾದಿಗಳ ಆತಂಕಕ್ಕೆ ಕಾರಣವಾಗಿದೆ. ಈ ತೀರ್ಪಿನ ಪ್ರಕಾರ, ಭೂಮಿಯ ಮೇಲ್ಮೈಯಿಂದ 100 ಮೀಟರ್ ಅಥವಾ ಅದಕ್ಕಿಂತ ಹೆಚ್ಚು ಎತ್ತರವಿರುವ ಗುಡ್ಡಗಳನ್ನು ಮಾತ್ರ ಅರಾವಳಿ ಪರ್ವತಗಳೆಂದು ಪರಿಗಣಿಸಲಾಗುತ್ತದೆ. ಅಥವಾ ಅಂತಹ ಗುಡ್ಡಗಳ ಸಮೂಹವು ಒಂದಕ್ಕೊಂದು 500 ಮೀಟರ್ ವ್ಯಾಪ್ತಿಯಲ್ಲಿದ್ದರೆ ಮಾತ್ರ ಅವುಗಳನ್ನು ಅರಾವಳಿ ಶ್ರೇಣಿಯ ಭಾಗವೆಂದು ಗುರುತಿಸಲಾಗುತ್ತದೆ. ಇದಕ್ಕಿಂತ ಕಡಿಮೆ ಎತ್ತರವಿರುವ ಗುಡ್ಡಗಳು ಅರಾವಳಿ ವ್ಯಾಪ್ತಿಗೆ ಬರುವುದಿಲ್ಲ ಎಂದು ಕೋರ್ಟ್ ಹೇಳಿದೆ.
ಕೇವಲ ಎತ್ತರದ ಆಧಾರದ ಮೇಲೆ ಪರ್ವತವನ್ನು ನಿರ್ಧರಿಸುವುದು ಸರಿಯಲ್ಲ ಎಂದು ಮೇಧಾವಿಗಳು ಮತ್ತು ಪರಿಸರ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಈ ತೀರ್ಪು ಜಾರಿಯಾದರೆ ದೇಶದ ಶೇಕಡಾ 90ರಷ್ಟು ಪರ್ವತಗಳು ಕಾನೂನು ರಕ್ಷಣೆಯನ್ನು ಕಳೆದುಕೊಳ್ಳುತ್ತವೆ. ಇದು ರಿಯಲ್ ಎಸ್ಟೇಟ್ ಮತ್ತು ಮೈನಿಂಗ್ ಮಾಫಿಯಾಗೆ ಹಾದಿ ಮಾಡಿಕೊಟ್ಟು, ಪ್ರಕೃತಿಯ ವಿನಾಶಕ್ಕೆ ದಾರಿ ಮಾಡಿಕೊಡುತ್ತದೆ ಎಂದು ಅವರು ಆತಂಕ ವ್ಯಕ್ತಪಡಿಸಿದ್ದಾರೆ. 700 ಕಿ.ಮೀ ವಿಸ್ತರಿಸಿರುವ ಅರಾವಳಿ ಶ್ರೇಣಿಗಳು ಥಾರ್ ಮರುಭೂಮಿಯ ಧೂಳು ಮತ್ತು ಮರಳನ್ನು ತಡೆಯುತ್ತಿವೆ. ಇವುಗಳಿಲ್ಲದಿದ್ದರೆ ಮರುಭೂಮಿ ದೆಹಲಿಯವರೆಗೆ ವಿಸ್ತರಿಸಲಿದೆ ಎಂದು ಎಚ್ಚರಿಸಿದ್ದಾರೆ.
ಸತತ್ ಸಂಪದ ಕ್ಲೈಮೇಟ್ ಫೌಂಡೇಶನ್ನ ಸಂಸ್ಥಾಪಕ ಹರ್ಜೀತ್ ಸಿಂಗ್ ಮಾತನಾಡಿ, ಈ ತೀರ್ಪು ಉತ್ತರ ಭಾರತದ ನೈಸರ್ಗಿಕ ಸೌಂದರ್ಯ ಮತ್ತು ಜಲಮೂಲಗಳನ್ನು ನಾಶಪಡಿಸುವ “ಡೈನಮೈಟ್” ನಂತಿದೆ ಎಂದು ಬಣ್ಣಿಸಿದ್ದಾರೆ. ಹರಿಯಾಣ ಮತ್ತು ರಾಜಸ್ಥಾನಗಳಲ್ಲಿ ತೀವ್ರ ಪ್ರತಿಭಟನೆಗಳು ನಡೆಯುತ್ತಿವೆ. ಗುರುಗ್ರಾಮದಲ್ಲಿ ಹರಿಯಾಣದ ಸಚಿವ ನರ್ಬೀರ್ ಸಿಂಗ್ ಅವರ ಮನೆಯ ಮುಂದೆ ಪರಿಸರವಾದಿಗಳು ಪ್ರತಿಭಟನೆ ನಡೆಸಿದರೆ, ಉದಯಪುರದಲ್ಲಿ ವಕೀಲರು ಜಿಲ್ಲಾ ಮ್ಯಾಜಿಸ್ಟ್ರೇಟ್ ಅವರಿಗೆ ಮನವಿ ಸಲ್ಲಿಸಿ ಅರಾವಳಿಗೆ ನೀಡಲಾದ ಹೊಸ ವ್ಯಾಖ್ಯಾನವನ್ನು ವಿರೋಧಿಸಿದ್ದಾರೆ.
