81 ಲಕ್ಷಕ್ಕೆ ಗ್ರಾಮ ಪಂಚಾಯಿತಿ ಸದಸ್ಯ ಸ್ಥಾನ ಹರಾಜು!

ಅನಂತಪುರಂ: ಆಂಧ್ರಪ್ರದೇಶದ ಎರಡು ಗ್ರಾಮಗಳಲ್ಲಿ ಪಂಚಾಯಿತಿ ಸದಸ್ಯ ಸ್ಥಾನಕ್ಕಾಗಿ ಬಹಿರಂಗವಾಗಿ ಹರಾಜು ನಡೆದಿರುವ ಬಗ್ಗೆ ವರದಿಯಾಗಿದೆ. ಒಂದು ಗ್ರಾಮದಲ್ಲಿ 29 ಲಕ್ಷ ರೂಪಾಯಿಗೆ ಹರಾಜು ನಡೆದಿದ್ದರೆ, ಮತ್ತೊಂದು ಗ್ರಾಮದಲ್ಲಿ ಬರೋಬ್ಬರಿ 81 ಲಕ್ಷ ರೂಪಾಯಿಗೆ ಬಿಡ್‌ ಮಾಡಲಾಗಿದೆ.

ಅನಂತಪುರಂ ಜಿಲ್ಲೆಯ ಶಿಂಗನಮಲ ಕ್ಷೇತ್ರದ ಗಾರ್ಲದಿನ್ನೆ ತಾಲೂಕಿನ ಕೊಪ್ಪಲಕೊಂಡ ಗ್ರಾಮದಲ್ಲಿ ಈ ಘಟನೆ ನಡೆದಿದೆ. ಗ್ರಾಮದ ರಾಮಮಂದಿರದ ಬಳಿ ಗ್ರಾಮಸ್ಥರು ಸೇರಿ ಗ್ರಾಮ ಪಂಚಾಯಿತಿ ಸದಸ್ಯ ಸ್ಥಾನಕ್ಕೆ ಹರಾಜು ನಡೆಸಿದ್ದಾರೆ ಎಂದು ವರದಿಗಳು ತಿಳಿಸಿದೆ.

ಈ ಹರಾಜಿನಲ್ಲಿ ಟಿಡಿಪಿ ನಾಯಕ ಎಲ್‌ಐಸಿ ಆದಿನಾರಾಯಣ ಅವರು 29 ಲಕ್ಷ ರೂಪಾಯಿ ಬಿಡ್‌ ಮಾಡಿ ಮೊದಲ ಸ್ಥಾನ ಪಡೆದಿದ್ದಾರೆ. ಈ ಹರಾಜಿನ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ.

ಮತ್ತೊಂದು ಗ್ರಾಮದಲ್ಲಿ 81 ಲಕ್ಷ ರೂಪಾಯಿ ಬಿಡ್‌!

ಇದೇ ರೀತಿಯ ಮತ್ತೊಂದು ಘಟನೆ ಪಲ್ನಾಡು ಜಿಲ್ಲೆಯ ನರಸರಾವ್‌ಪೇಟೆ ಸಮೀಪದ ಜೊನ್ನಲಗಡ್ಡ ಗ್ರಾಮದಲ್ಲೂ ನಡೆದಿದೆ.

ಇಲ್ಲಿಯೂ ಸದಸ್ಯ ಸ್ಥಾನಕ್ಕಾಗಿ ಹರಾಜು ನಡೆಸಲಾಗಿದೆ. ಈ ಹರಾಜಿನಲ್ಲಿ ಯರ್ರಾ ಶ್ರೀನಿವಾಸರಾವ್‌ ಅವರು 81 ಲಕ್ಷ ರೂಪಾಯಿ ಬಿಡ್‌ ಮಾಡಿ ಗೆದ್ದಿದ್ದಾರೆ. ಅವರ ಎದುರಾಳಿ ಕೊರಿಟಾಲ ಗೋಪಾಲರಾವ್‌ ಅವರು 77 ಲಕ್ಷ ರೂಪಾಯಿ ನೀಡಲು ಸಿದ್ಧರಿದ್ದರು ಎಂದು ವರದಿ ಹೇಳಿದೆ.

ಒಟ್ಟು ಮೂವರು ಈ ಹರಾಜಿನಲ್ಲಿ ಭಾಗವಹಿಸಿದ್ದರು. ಕೊನೆಗೆ ಅತಿ ಹೆಚ್ಚು ಹಣ ಬಿಡ್‌ ಮಾಡಿದ ಶ್ರೀನಿವಾಸರಾವ್‌ ಅವರನ್ನು ಅಭ್ಯರ್ಥಿಯಾಗಿ ಕಣಕ್ಕಿಳಿಸಲು ಗ್ರಾಮದ ಹಿರಿಯರು ನಿರ್ಧರಿಸಿದ್ದಾರೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.

ಪ್ರಜಾಪ್ರಭುತ್ವದಲ್ಲಿ ಹರಾಜಿಗೆ ಸ್ಥಾನವಿದೆಯೇ?

ಗ್ರಾಮದ ಅಭಿವೃದ್ಧಿ, ಕುಡಿಯುವ ನೀರು, ರಸ್ತೆ, ಚರಂಡಿ, ಸ್ವಚ್ಛತೆ ಸೇರಿದಂತೆ ಜನರ ದಿನನಿತ್ಯದ ಸಮಸ್ಯೆಗಳನ್ನು ಪರಿಹರಿಸಬೇಕಾದ ಜವಾಬ್ದಾರಿ ಗ್ರಾಮ ಪಂಚಾಯಿತಿ ಸದಸ್ಯ ಹುದ್ದೆಯ ಮೇಲಿದೆ. ಇಂತಹ ಜವಾಬ್ದಾರಿಯುತ ಸ್ಥಾನಕ್ಕೆ ಹಣದ ಆಧಾರದ ಮೇಲೆ ಹರಾಜು ನಡೆಯುತ್ತಿರುವ ವರದಿಗಳು ಹಲವು ಪ್ರಶ್ನೆಗಳನ್ನು ಹುಟ್ಟುಹಾಕಿವೆ.