ರೈತರು 3 ತಿಂಗಳು ದುಡಿದು, 9 ತಿಂಗಳು ಇಸ್ಪೀಟ್, ಗುಟ್ಕಾ, ಮದ್ಯದಲ್ಲೇ ಕಳೆಯುತ್ತಾರೆ: ಬಿಜೆಪಿ ಸಂಸದ ಜನಾರ್ದನ್ ಮಿಶ್ರಾ ವಿವಾದಾತ್ಮಕ ಹೇಳಿಕೆ!

ಮಧ್ಯಪ್ರದೇಶದ ರೇವಾ ಲೋಕಸಭಾ ಕ್ಷೇತ್ರದ ಬಿಜೆಪಿ ಸಂಸದ ಜನಾರ್ದನ್ ಮಿಶ್ರಾ (Janardan Mishra) ರೈತರ ಕುರಿತು ನೀಡಿರುವ ವಿವಾದಾತ್ಮಕ ಹೇಳಿಕೆಯೊಂದು ಇದೀಗ ರಾಷ್ಟ್ರಮಟ್ಟದಲ್ಲಿ ಭಾರಿ ಕೋಲಾಹಲಕ್ಕೆ ಕಾರಣವಾಗಿದೆ. “ಇವತ್ತಿನ ರೈತರು ವರ್ಷಕ್ಕೆ ಕೇವಲ ಮೂರು ತಿಂಗಳು ಮಾತ್ರ ಹೊಲದಲ್ಲಿ ದುಡಿಯುತ್ತಾರೆ, ಉಳಿದ ಒಂಬತ್ತು ತಿಂಗಳು ಇಸ್ಪೀಟ್ ಆಡುವುದು, ಗುಟ್ಕಾ ಜಗಿಯುವುದು ಹಾಗೂ ಮದ್ಯ ಸೇವನೆಯಲ್ಲೇ ಕಳೆಯುತ್ತಾರೆ” ಎಂದು ಹೇಳುವ ಮೂಲಕ ಅನ್ನದಾತರ ಕೆಂಗಣ್ಣಿಗೆ ಗುರಿಯಾಗಿದ್ದಾರೆ.

ರೇವಾ ಸಂಸದೀಯ ಕ್ಷೇತ್ರದ ವ್ಯಾಪ್ತಿಗೆ ಬರುವ ಮೌಗಂಜ್ ಜಿಲ್ಲೆಯಲ್ಲಿ ಆಯೋಜಿಸಲಾಗಿದ್ದ ಗೋವರ್ಧನ ಪೂಜೆ ಕಾರ್ಯಕ್ರಮದಲ್ಲಿ ಮಾತನಾಡುತ್ತಿದ್ದ ವೇಳೆ ಸಂಸದರು ಈ ಆಕ್ಷೇಪಾರ್ಹ ಹೇಳಿಕೆ ನೀಡಿದ್ದಾರೆ ಎನ್ನಲಾದ ವಿಡಿಯೋವನ್ನು ಕಾಂಗ್ರೆಸ್ ಮುಖಂಡರು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದು, ಸಾರ್ವಜನಿಕ ಕ್ಷಮೆಯಾಚನೆಗೆ ಪಟ್ಟು ಹಿಡಿದಿದ್ದಾರೆ.

ವಿಡಿಯೋದಲ್ಲಿ ಸಂಸದರು ಹೇಳಿದ್ದೇನು?

ಕಾರ್ಯಕ್ರಮದ ವೇದಿಕೆಯಿಂದ ಮಾತನಾಡುತ್ತಿದ್ದ ಮಿಶ್ರಾ, “ಹಿಂದಿನ ಕಾಲದ ರೈತರಂತೆ ಈಗಿನ ರೈತರಿಲ್ಲ. ಈಗಿನವರು ಸುಖ-ಭೋಗದ, ಆರಾಮದಾಯಕ ಜೀವನಶೈಲಿಗೆ ಹೊಂದಿಕೊಂಡಿದ್ದಾರೆ” ಎಂದು ಹೇಳುತ್ತಾ, “ವರ್ಷದ 12 ತಿಂಗಳಲ್ಲಿ ಮೂರೇ ತಿಂಗಳು ಕೆಲಸ ಮಾಡಿದರೆ ಉಳಿದ ಒಂಬತ್ತು ತಿಂಗಳು ಏನು ಮಾಡುತ್ತಾರೆ?” ಎಂದು ನೆರೆದಿದ್ದ ಜನರನ್ನು ಪ್ರಶ್ನಿಸಿದ್ದರು.

ಆಗ ವೇದಿಕೆಯ ಮುಂಭಾಗದಲ್ಲಿದ್ದ ಕೆಲವರು “ಇಸ್ಪೀಟ್ ಆಡುತ್ತಾರೆ” ಎಂದು ಉತ್ತರಿಸಿದಾಗ, ಅದನ್ನೇ ಮುಂದುವರಿಸಿದ ಬಿಜೆಪಿ ಸಂಸದರು, “ಇಂದಿನ ರೈತ ಕೇವಲ 3 ತಿಂಗಳು ಕೆಲಸ ಮಾಡುತ್ತಾನೆ, ಉಳಿದ 9 ತಿಂಗಳು ಇಸ್ಪೀಟ್ ಆಡುವುದು, ‘ರಾಜಶ್ರೀ’ (ಗುಟ್ಕಾ ಬ್ರ್ಯಾಂಡ್) ಜಗಿಯುವುದು, ಬಾಟಲಿ (ಮದ್ಯ) ಕುಡಿಯುವುದು, ಗಾಂಜಾ ಸೇದುವುದು ಮತ್ತು ‘ಜೈ ಭೋಲೆ’ ಎನ್ನುವುದರಲ್ಲೇ ಕಾಲ ಕಳೆಯುತ್ತಾನೆ” ಎಂದು ಲೇವಡಿ ಮಾಡಿದ್ದಾರೆ.

ಬಿಜೆಪಿ ಸಂಸದನ ವಿರುದ್ಧ ಕಾಂಗ್ರೆಸ್ ತೀವ್ರ ವಾಗ್ದಾಳಿ

ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದ್ದಂತೆಯೇ ಕಾಂಗ್ರೆಸ್ ನಾಯಕರು ಬಿಜೆಪಿ ವಿರುದ್ಧ ತೀವ್ರ ಆಕ್ರೋಶ ಹೊರಹಾಕಿದ್ದಾರೆ. ಅಖಿಲ ಭಾರತ ಕಾಂಗ್ರೆಸ್ ಸಮಿತಿ (AICC) ಕಾರ್ಯದರ್ಶಿ ಕುನಾಲ್ ಚೌಧರಿ ‘ಎಕ್ಸ್’ (ಟ್ವಿಟರ್) ತಾಣದಲ್ಲಿ ಪ್ರತಿಕ್ರಿಯಿಸಿ, “ರೈತರ ಆದಾಯವನ್ನು ದುಪ್ಪಟ್ಟು ಮಾಡುತ್ತೇವೆ ಎಂದು ಭರವಸೆ ನೀಡಿದ್ದ ಬಿಜೆಪಿಯ ಸಂಸದರು ಇಂದು ಅನ್ನದಾತರಿಗೆ ಇಂತಹ ಅವಮಾನಕರ ಮಾತುಗಳನ್ನಾಡುತ್ತಿದ್ದಾರೆ. ರೈತರಿಗೆ ಉಪದೇಶ ಮಾಡುವ ಮುನ್ನ ಸಂಸದರು ಒಂದು ದಿನವಾದರೂ ಹೊಲದಲ್ಲಿ ನಿಂತು ದುಡಿಯಲಿ. ಅನ್ನದಾತರಿಗೆ ಮಾಡುವ ಅವಮಾನ ಇಡೀ ದೇಶಕ್ಕೆ ಮಾಡುವ ಅಪಮಾನ,” ಎಂದು ಕಿಡಿಕಾರಿದ್ದಾರೆ.

ಮಧ್ಯಪ್ರದೇಶ ಕಾಂಗ್ರೆಸ್ ವಕ್ತಾರ ರಾಹುಲ್ ರಾಜ್ ಪ್ರತಿಕ್ರಿಯಿಸಿ, “ಇಂತಹ ಲಘು ಹೇಳಿಕೆ ನೀಡುವವರ ಮನೆಗಳಿಗೂ ಅನ್ನ ಒದಗಿಸುವುದು ಇದೇ ರೈತರು. ರೈತ ಕೇವಲ ಮೂರು ತಿಂಗಳು ಮಾತ್ರ ದುಡಿಯುವುದಿಲ್ಲ; ವರ್ಷವಿಡೀ ಹವಾಮಾನ, ಸಾಲ, ಗೊಬ್ಬರ, ಬೀಜ ಹಾಗೂ ಬೆಳೆಗಳ ಚಿಂತೆಯಲ್ಲೇ ಬದುಕುತ್ತಾನೆ. ರೈತರು ಇಸ್ಪೀಟ್ ಆಡುವುದರಲ್ಲಾಗಲಿ, ಕುಡಿಯುವುದರಲ್ಲಾಗಲಿ ಮುಳುಗಿಲ್ಲ. ತಮ್ಮ ಬೆವರಿನಿಂದ ದೇಶದ ಆರ್ಥಿಕತೆಯ ಅಡಿಪಾಯವನ್ನು ಭದ್ರಪಡಿಸುತ್ತಿದ್ದಾರೆ. ಈ ಹೇಳಿಕೆ ಬಿಜೆಪಿಯ ರೈತ ವಿರೋಧಿ ಮನಸ್ಥಿತಿಯನ್ನು ಬಯಲುಮಾಡಿದೆ,” ಎಂದು ವಾಗ್ದಾಳಿ ನಡೆಸಿದ್ದಾರೆ.

ಇದನ್ನೂ ಓದಿ: