2026ರ ಮೊದಲ 9 ತಿಂಗಳಲ್ಲಿ ಮುಸ್ಲಿಮರು, ಕ್ರೈಸ್ತರ ವಿರುದ್ಧ 322 ದ್ವೇಷ ಅಪರಾಧ: 54 ಮಂದಿ ಸಾವು, 83 ದ್ವೇಷ ಭಾಷಣ ದಾಖಲು – ಎಪಿಸಿಆರ್ ವರದಿ

2026ರ ಜನವರಿ 1ರಿಂದ ಸೆಪ್ಟೆಂಬರ್ 30ರ ನಡುವಿನ ಒಂಬತ್ತು ತಿಂಗಳ ಅವಧಿಯಲ್ಲಿ ಭಾರತದ 24 ರಾಜ್ಯಗಳು ಹಾಗೂ ಕೇಂದ್ರಾಡಳಿತ ಪ್ರದೇಶಗಳಲ್ಲಿ ಮುಸ್ಲಿಮರು ಮತ್ತು ಕ್ರೈಸ್ತರನ್ನು ಗುರಿಯಾಗಿಸಿಕೊಂಡು ಒಟ್ಟು 322 ದ್ವೇಷ ಅಪರಾಧಗಳು (Hate Crimes) ನಡೆದಿವೆ. ಈ ಹಿಂಸಾತ್ಮಕ ಘಟನೆಗಳಲ್ಲಿ 54 ಮಂದಿ ಜೀವ ಕಳೆದುಕೊಂಡಿದ್ದಾರೆ ಎಂದು ನಾಗರಿಕ ಹಕ್ಕುಗಳ ರಕ್ಷಣಾ ಸಂಘಟನೆ ‘ಅಸೋಸಿಯೇಷನ್ ಫಾರ್ ಪ್ರೊಟೆಕ್ಷನ್ ಆಫ್ ಸಿವಿಲ್ ರೈಟ್ಸ್’ (APCR) ಬಿಡುಗಡೆ ಮಾಡಿರುವ ನೂತನ ವರದಿ ಬಹಿರಂಗಪಡಿಸಿದೆ.

ಸಂಸ್ಥೆಯು ನಿರ್ವಹಿಸುತ್ತಿರುವ ‘ಹೇಟ್ ಕ್ರೈಮ್ ಟ್ರ್ಯಾಕರ್’ (Hate Crime Tracker) ಮತ್ತು ‘‌ಹೇಟ್ ಸ್ಪೀಚ್ ಟ್ರ್ಯಾಕರ್’ (Hate Speech Tracker) ದತ್ತಾಂಶಗಳ ಆಧಾರದ ಮೇಲೆ ಈ ಎರಡು ವರದಿಗಳನ್ನು ಸಿದ್ಧಪಡಿಸಲಾಗಿದೆ. ಇದೇ ಅವಧಿಯಲ್ಲಿ ಕನಿಷ್ಠ 16 ರಾಜ್ಯಗಳಲ್ಲಿ 57 ಭಾಷಣಕಾರರಿಂದ ದಾಖಲಾದ ಒಟ್ಟು 83 ದ್ವೇಷ ಭಾಷಣಗಳನ್ನು (Hate Speeches) ವರದಿಯಲ್ಲಿ ದಾಖಲಿಸಲಾಗಿದೆ.

ದಾಖಲಾದ ಒಟ್ಟು 322 ದ್ವೇಷ ಅಪರಾಧಗಳ ಪೈಕಿ 119 ಘಟನೆಗಳಲ್ಲಿ (ಸುಮಾರು ಶೇಕಡಾ 37ರಷ್ಟು) ಸರ್ಕಾರಿ ಯಂತ್ರ ಅಥವಾ ಪೊಲೀಸ್ ಆಡಳಿತದ ಪಾತ್ರವಿದೆ ಎಂದು ಎಪಿಸಿಆರ್ ವರದಿ ಆರೋಪಿಸಿದೆ. ಅಲ್ಲದೆ, ರಾಜ್ಯ ಅಧಿಕಾರಿಗಳ ಕೈಯಲ್ಲೇ 21 ಸಾವುಗಳು ಸಂಭವಿಸಿವೆ ಎಂದು ಉಲ್ಲೇಖಿಸಲಾಗಿದೆ. ಇವುಗಳಲ್ಲಿ ಕಥಿತ ಪೊಲೀಸ್ ಎನ್‌ಕೌಂಟರ್‌ಗಳಲ್ಲಿ 12 ಮಂದಿ ಸಾವನ್ನಪ್ಪಿದ್ದರೆ, ಪೊಲೀಸ್ ಕಸ್ಟಡಿ ಅಥವಾ ಕಾರಾಗೃಹದಲ್ಲಿ 9 ಮಂದಿ ಮೃತಪಟ್ಟಿದ್ದಾರೆ.

ಕಳೆದ ಮಾರ್ಚ್‌ನಲ್ಲಿ ಗಾಜಿಯಾಬಾದ್‌ನಲ್ಲಿ ನಡೆದ ಪೊಲೀಸ್ ಎನ್‌ಕೌಂಟರ್‌ನಲ್ಲಿ ಜೀಶಾನ್ ಮತ್ತು ಗುಲ್ಫಾಮ್ ಎಂಬ ಸಹೋದರರು ಮೃತಪಟ್ಟ ಘಟನೆ ಹಾಗೂ ಅಹಮದಾಬಾದ್‌ನಲ್ಲಿ ಪೊಲೀಸ್ ಕಸ್ಟಡಿಯಲ್ಲಿ 70 ವರ್ಷದ ಜಹೀರ್ ಶೇಖ್ ಸಾವನ್ನಪ್ಪಿದ ಪ್ರಕರಣಗಳನ್ನು ವರದಿಯಲ್ಲಿ ಪ್ರಮುಖವಾಗಿ ಪ್ರಸ್ತಾಪಿಸಲಾಗಿದೆ. ಇದರೊಂದಿಗೆ, ಕ್ರೈಸ್ತ ಸಮುದಾಯವನ್ನು ಗುರಿಯಾಗಿಸಿಕೊಂಡು 15 ದ್ವೇಷ ಕೃತ್ಯಗಳು ನಡೆದಿವೆ ಎಂದು ವರದಿ ಹೇಳಿದೆ. ಇವುಗಳಲ್ಲಿ ಹೆಚ್ಚಿನವು ಮತಾಂತರದ ಆರೋಪಗಳಿಗೆ ಸಂಬಂಧಿಸಿದ್ದಾಗಿದ್ದು, ಛತ್ತೀಸ್‌ಗಢದ ಸುಕ್ಮಾದಲ್ಲಿ 25ಕ್ಕೂ ಹೆಚ್ಚು ಜನರು ಭಾಗವಹಿಸಿದ್ದ ಪ್ರಾರ್ಥನಾ ಸಭೆಯ ಮೇಲೆ ನಡೆದ ದಾಳಿಯನ್ನು ಉದಾಹರಿಸಲಾಗಿದೆ.

ವರದಿಯ ಪ್ರಕಾರ, ದಾಖಲಾಗಿರುವ 83 ದ್ವೇಷ ಭಾಷಣಗಳ ಪೈಕಿ 33 ಭಾಷಣಗಳನ್ನು ಸಾರ್ವಜನಿಕ ಮತ್ತು ಸಾಂವಿಧಾನಿಕ ಹುದ್ದೆಗಳಲ್ಲಿರುವ ರಾಜಕೀಯ ಮುಖಂಡರು ಹಾಗೂ ಮುಖ್ಯಮಂತ್ರಿಗಳು ಮಾಡಿದ್ದಾರೆ. ಆದರೆ ಇಷ್ಟೆಲ್ಲಾ ಭಾಷಣಗಳಲ್ಲಿ ಕೇವಲ ಒಂದೇ ಒಂದು ಪ್ರಕರಣದಲ್ಲಿ ಮಾತ್ರ ಬಂಧನ ನಡೆದಿದೆ ಎಂದು ವರದಿ ಎತ್ತಿ ತೋರಿಸಿದೆ.

ದಾಖಲಾದ ಭಾಷಣಗಳ ಪೈಕಿ 37 ಭಾಷಣಗಳಲ್ಲಿ ನೇರವಾಗಿ ಹಿಂಸಾಚಾರಕ್ಕೆ ಪ್ರಚೋದನೆ ನೀಡಲಾಗಿತ್ತು ಅಥವಾ ಶಸ್ತ್ರಾಸ್ತ್ರಗಳನ್ನು ಹಿಡಿಯುವಂತೆ ಕರೆ ನೀಡಲಾಗಿತ್ತು. ಸುಮಾರು 12 ಮಂದಿಯ ಒಂದು ನಿರ್ದಿಷ್ಟ ಗುಂಪು ಸತತವಾಗಿ ಇಂತಹ ದ್ವೇಷ ಭಾಷಣಗಳನ್ನು ಮಾಡಿದ್ದು, ಈ 12 ಜನರೇ ಸುಮಾರು 50 ಭಾಷಣಗಳಿಗೆ ಕಾರಣರಾಗಿದ್ದಾರೆ. ಇವರಲ್ಲಿ ಏಳು ಮಂದಿ ಸಾರ್ವಜನಿಕ ಹುದ್ದೆಗಳನ್ನು ಹೊಂದಿರುವವರಾಗಿದ್ದಾರೆ ಎಂದು ವರದಿ ವಿಶ್ಲೇಷಿಸಿದೆ.

ವರದಿ ಬಿಡುಗಡೆಯ ಬಳಿಕ ನಡೆದ ಚರ್ಚೆಯಲ್ಲಿ ಭಾಗವಹಿಸಿದ ನಾಗರಿಕ ಹಕ್ಕುಗಳ ಕಾರ್ಯಕರ್ತರು, ಸಂಶೋಧಕರು ಮತ್ತು ಪತ್ರಕರ್ತರು ದೇಶದಲ್ಲಿ ಹೆಚ್ಚುತ್ತಿರುವ ದ್ವೇಷ ರಾಜಕಾರಣದ ಬಗ್ಗೆ ಕಳವಳ ವ್ಯಕ್ತಪಡಿಸಿದರು. ಅಲ್ಪಸಂಖ್ಯಾತರ ಮೇಲಿನ ಉದ್ದೇಶಪೂರ್ವಕ ಹಿಂಸಾಚಾರವು ರಾಜಕೀಯ ಪ್ರಚಾರ ಮತ್ತು ಸಾರ್ವಜನಿಕ ಸಂವಾದದ ಸಾಮಾನ್ಯ ಭಾಗವಾಗಿ ಬದಲಾಗುತ್ತಿರುವುದನ್ನು ಅವರು ಆಕ್ಷೇಪಿಸಿದರು. ದ್ವೇಷ ಅಪರಾಧಗಳನ್ನು ತಡೆಯಲು ಸುಪ್ರೀಂ ಕೋರ್ಟ್ ನೀಡಿರುವ ಮಾರ್ಗಸೂಚಿಗಳನ್ನು ಕಟ್ಟುನಿಟ್ಟಾಗಿ ಜಾರಿಗೊಳಿಸಬೇಕು ಹಾಗೂ ದ್ವೇಷ ಭಾಷಣ ಮಾಡುವವರ ವಿರುದ್ಧ ಮುಲಾಜಿಲ್ಲದೆ ಕಾನೂನು ಕ್ರಮ ಜರುಗಿಸಬೇಕು ಎಂದು ಎಪಿಸಿಆರ್ ಆಗ್ರಹಿಸಿದೆ.

ಇದನ್ನೂ ಓದಿ: